ABANYA ROMA 6

1Tũbũge tũtĩkĩ kwehĩ? Tukwamirire ebibi, olukogo lwa Nyamuhanga ilwatoka erikanyirira kwehĩ? 2Iyihi n'ahake. Ĩtwe twamahola oko bibi, twanganatoka eriswabya omo bibi kwehĩ? 3Sĩmwasĩ kwehĩ? ĩtwe bosĩ ngoko twabatĩsĩbawa erimatikana na Kristo ĩtwabĩrĩbatĩsĩbwa erĩmatana n'oluholo luwe kwehĩ? 4Neryo omo lũbatĩso lwetu twabiritabwa haguma na Kristo omo luholo luwe, neryo ngoko Kristo alũbũkĩbawa oko baholĩ omo lukengerwa lwa Tata, litya netu itwatoka erirendera omo mibere y'engebe nyihya-nyihya. 5Kusangwa twamabohana naye omo luholo luwe, kwenene litya twasyabya buguma naye omw'ĩlũbũka liwe, 6kusangwa tũnasĩ ngoko mundu wetu wa kera abiribambwa oko musalaba haguma na Kristo, neryo amalengekanĩa w'ebibi atoke erĩherĩbwa, situbye kandi abakobe b'ebibi. 7Kusangwa oyo wabirihola, abiriboholwa oko maka w'ebibi. 8Neryo twamabya twabirihola haguma na Kristo, tũkĩkĩrĩraya ko twasyabyaho haguma naye. 9Tũnasĩ Kristo abĩrĩlũbũkĩbwa oko baholĩ, isiendisyaswahola na kera; oluholo silukimuwite ko hamũlĩ. 10Kusangwa omo luholo luwe, mwahola busana n'ebibi engendo nguma nyisa; na lino engebe yiwe ikabyaho busana na Nyamuhanga. 11Nenyũ nibya muyiganze ng'abaholĩ oko bibi, nĩkwa ng'abaliho uku Nyamuhanga busana n'erimatikana na Kristo Yesu. 12Simuleke ebibi bikabatabalako omo mibiri yenyũ y'erihola, ebikaleka ĩmwowa esyongumbu sy'omubiri. 13Kandi simuhe ebĩtsũko by'emibiri yenyũ busana n'ebibi, erikola ebitatunganene; nĩkwa muyihe uku Nyamuhanga ng'abandu ababĩrĩlũbũka oko baholĩ, kandi muhe ebĩtsũko byenyũ uku Nyamuhanga, bikole ebitunganene. 14Kusangwa ebibi sibikibawite ko hamũlĩ, kusangwa simuli oko Migambo nĩkwa oko lukogo lwa Nyamuhanga. 15Neryo, tũkolekĩ kwehĩ? Tukole ebibi kusangwa situli omo Migambo, nĩkwa omo lukogo lwa Nyamuhanga kwehĩ? Iyihi, n'ahake! 16Sĩmwasĩ ngoko mugulu mukayiha oko mundu erĩmowa ng'omukobe, kwenene muli bakobe b'oyo mũkowa, amabya w'ebibi, akaleta oluholo, amabya w'erĩowa, akabayira mo batunganene. 17Nĩkwa wasĩngya uku Nyamuhanga, kusangwa nomo mwanabya bakobe b'ebibi erĩmbere, lino mũkowa n'omutima gosĩ erĩkangĩrĩrya ly'ekwenene eryo mwahabawa. 18Kandi momwaboholwa oko bibi, n'eribya bakobe b'eritunganene. 19Ngabũga omobĩnywa by'abandu busana n'obolo-bolo bw'omubiri wenyũ. Ngoko mwabya mukaha ebĩtsũko byenyũ ng'abakobe b'ebĩtĩsĩrĩre n'ebibi, ebikaleta emigendere mibi, neryo lino muhe ebĩtsũko byenyũ ng'abakobe b'eritunganene erikaleta emigendere mĩbũyĩrĩre. 20Omugulu mwabya bakobe b'ebibi, mwabya bwĩranda oko litunganene. 21Neryo momwabana endũndĩ yahi omo myatsi eyo eyikabahemula lino kwehĩ? Kusangwa endũlĩ y'emyatsi eyo ni luholo. 22Nĩkwa lino mwabiriboholwa oko bibi, mwabiribya bakobe ba Nyamuhanga, mukabana endũndĩ y'eribya n'emigendere mĩbũyĩrĩre, n'endũlĩ ni ngebe y'erikota. 23Kusangwa obũhĩngĩ bw'erikola ebibi ni luholo, nĩkwa olũsũnzo olũkalũa uku Nyamuhanga ni ngebe y'erikota busana n'erimatikana na Kristo Yesu, Omukama wetu.

will be added

X\