ABANYA ROMA 5

1Neryo kusangwa twabiriyirwa mo batunganene busana n'erĩkĩrĩrya, tunawite obuholo uku Nyamuhanga, n'obuholo obo mobwahĩka busana n'Omukama wetu Yesu Kristo. 2Iye abĩrĩtũhĩra omwisi w'olukogo olo lwa Nyamuhanga busana n'erĩkĩrĩrya, aho twimene ndeke. Kandi tukatsema omo maha w'erisangira olukengerwa lwa Nyamuhanga. 3Nĩkwa tukatsema omo malĩge wetu, kusangwa tũnasĩ obũlĩge bukaleta erĩyĩyĩnĩa. 4N'erĩyĩyĩnĩa likaleta erĩsĩmwa na Nyamuhanga, n'erĩsĩmwa likaleta amaha. 5Kandi amaha sialituteba, kusangwa Omũlĩmũ Abũyĩrĩre ogo Nyamuhanga atuha, abĩrĩũtũlĩra olwanzo lwa Nyamuhanga omo mitima yetu. 6Kusangwa omugulu twabya butsira maka, Kristo mwaholera abakola-nabi, oko mugulu Nyamuhanga ayisoga. 7Lĩkalĩre busana n'omundu eriholera omundu oyutunganene, nĩkwa, kwamũhwa omundu anganahanda omutima eriholera omundu mubuya. 8Nĩkwa Nyamuhanga akakangaya olwanzo luwe busana netu, kusangwa omugulu twabya tukine bakola-nabi, Kristo mwatuholera. 9Neryo twamabya twabiriyirwa mo batunganene busana n'omusasi wuwe, neryo kwilaba aho, Kristo asyatũlamya okw'ihitana lya Nyamuhanga. 10Nĩkwa twabya nzĩgũ sya Nyamuhanga, neryo mwatũsanganĩa omo luholo lwa Mugala wuwe; nĩkwa kwilaba aho, kusangwa twabĩrĩsanganĩbwa, twasyalamĩbwa omo ngebe ya Kristo! 11Neryo kandi kwilaba aho, tukatsema uku Nyamuhanga busana n'Omukama wetu Yesu Kristo, oyo wabĩrĩtũsanganĩa na Nyamuhanga. 12Neryo ebibi mobyahĩka munakihugo busana n'omundu muguma, n'oluholo molwingira busana n'ekibi kiwe, neryo litya oluholo molwahĩka oko bandu bosĩ, kusangwa abosĩ mobakola ebibi. 13Ebibi mobyabya omo kihugo embere w'erihuluka ly'Emigambo; nĩkwa ebibi mobitaganzwa ahate Migambo. 14Nĩkwa oluholo molwatabala oko bandu erĩtsũka uku Adamu n'erĩhĩka uku Musa; nibya molwatabala oko batakola ekibi ekiringene ng'erĩlolo lya Adamu. 15Adamu ali ng'ekĩsosekanĩo ky'oyukandisyasa. Nĩkwa olũsũnzo lwa Nyamuhanga silulingene n'erĩhalya lya Adamu. Kusangwa erĩhalya ly'omundu muguma molyaleta oluholo l'oko bandu bangi. Nĩkwa olukogo lwa Nyamuhanga ni lunene kw'aho, n'olũsũnzo busana n'olukogo lw'omundu muguma, ye Yesu Kristo lwasyakanyirira oko bandu bangi. 16N'akandi olũsũnzo lwa Nyamuhanga silulingene n'ekibi ky'omundu muguma; kusangwa olubanza lw'erĩhalya liguma lo lwaleta omusango, nĩkwa olũsũnzo lw'olukogo lũkalũsaya omusango w'amalolo mangi. 17Kusangwa erĩhalya ly'omundu muguma molyaleka oluholo ilwatabala busana n'omundu oyo; kwilaba aho, omundu muguma ye Yesu Kristo akaleka abandu abakangirira olukogo lunene n'olũsũnzo lw'eritunganene, ibatabala omo ngebe busana na Yesu Kristo. 18Neryo ngoko erĩhalya liguma molyahĩra abandu bosĩ kw'omusango; litya erikola eritunganene liguma likabohola abandu bosĩ, n'erihabo engebe. 19Kusangwa busana n'erĩtendĩowa ly'omundu muguma, abandu bangi mobayirwa mo bakola-nabi, neryo litya busana n'erĩowa ly'omundu muguma, abandu banene basyayirwa mo batunganene embere sya Nyamuhanga. 20Emigambo moyahĩka erireka erĩhalya iryakanyirira. Nĩkwa aho ebibi byakanyirira, olukogo lwa Nyamuhanga molwakanyirira kutsibu. 21Neryo ngoko ebibi byatabala omo luholo, litya olukogo lwa Nyamuhanga lukatabala omo litunganene, n'erireta engebe y'erikota busana n'Omukama wetu Yesu Kristo.

will be added

X\