ABANYA ROMA 4

1Neryo tũbũgekĩ busana na Abrahamũ, so-kulu w'ekihanda kyetu kwehĩ? Mwabanakĩ kwehĩ? 2Kusangwa kumbe Abrahamũ alĩtũngananĩbawa busana n'emĩbĩrĩ, kumbe awite omwatsi w'eriyihalambira, nĩkwa siawitego embere sya Nyamuhanga. 3Kusangwa Amasako atĩkĩ kwehĩ? Ati, Abrahamũ mwĩkĩrĩrya Nyamuhanga, neryo Nyamuhanga mwamuganziralyo mo litunganene. 4Oyukakola omũbĩrĩ akalihawa; nĩkwa oluhembo luwe siluliganzawa ng'olũsũnzo, nĩkwa ng'obũhĩngĩ. 5Nĩkwa oyutakola omũbĩrĩ, nĩkwa akĩkĩrĩraya oyũkatũngananaya abandu babi, erĩkĩrĩrya liwe likaleka iniaganzwa mo mutunganene. 6Ngoko Dawĩdĩ akahula obutseme bw'omundu oyo Nyamuhanga abiriganza mo mutunganene butsira busana n'emĩbĩrĩ yiwe. Dawĩdĩ ati, 7Obutseme buli oko babiribuyirwa kw'amalolo wabo, Kandi obutseme buli ukw'abo ebibi byabo byabĩrĩkũnĩngĩrwa na Nyamuhanga. 8Obutseme buli oko mundu oyo Omukama siendisyamuganzira kw'ebibi biwe. 9Obutseme obũ ni bw'abandu babwene basa, kutse busana n'abatabwene nibya kwehĩ? Kusangwa tuti, ngoko kĩsakĩre kiti, Abrahamũ mwaganzwa mo mutunganene busana n'erĩkĩrĩrya liwe. 10Abrahamũ aganzawa mo mutunganene omugulu abya abwene kutse omugulu abya atabwene kwehĩ? Aganzawa atya omugulu abya atabwene, neryo mwabanĩbwa enyũma. 11N'erĩbanĩbwa liwe lyabya ekiminyikalo, erĩmĩnyĩsya ngoko Nyamuhanga mwamuganza mo mutunganene busana n'erĩkĩrĩrya, isiabwene. Abrahamũ atoke eribya tata w'abosĩ abakĩkĩrĩraya Nyamuhanga isibabwene, baganzawe mo batunganene. 12Kandi atoke eribya tata w'ababwene, nĩkwa si busana n'erĩbanĩbwa lyabo, nĩkwa kusangwa bakakwama emikolere y'erĩkĩrĩrya lya tata wetu ye Abrahamũ, oyo wĩkĩrĩraya isiabwene. 13Kusangwa Nyamuhanga mwalaga Abrahamũ n'olubuto luwe ati, Ekihugo kyasyabya kiwe. Erilaga erĩ siryabya busana n'erikwama Emigambo, nĩkwa kusangwa mwaganzwa mo mutunganene busana n'erĩkĩrĩrya liwe. 14Kusangwa omwandu amabanika busana n'erikwama Emigambo, erĩkĩrĩrya ini buyira n'erilaga lya Nyamuhanga ini buyira. 15Kusangwa Emigambo yikaleta erihitana lya Nyamuhanga, nĩkwa ahate Migambo sihali erĩhalya. 16Busana n'omwatsi oyũ, Erĩlaga ly'omwandu ni busana n'erĩkĩrĩrya. Kusangwa lĩkahĩka busana n'olukogo lwa Nyamuhanga, erilaga eryo iryatoka eribya kwenene oko lubuto losĩ lwa Abrahamũ. Kandi si busana n'abo basa abakakwama Emigambo, nĩkwa nibya busana n'abakakwama erĩkĩrĩrya nga Abrahamũ, oyuli tata wetu ĩtwe bosĩ. 17Ngoko kĩsakĩre kiti, Nabirikuyira mo tata w'ebihanda bingi. Neryo erilaga likabya kwenene uku Nyamuhanga, oyo Abrahamũ ĩkĩrĩraya. Nyamuhanga akaha engebe oko baholĩ, kandi akabũga n'emyatsi eyiteho iyabyaho. 18Abrahamũ mwĩkĩrĩrya n'eribya n'amaha omugulu hate omwatsi w'eriha amaha. Busana n'ekĩ mwabya tata w'ebihanda bingi, ngoko kyabũgawa kiti, Olubuto lwawe lwasyabya lutya. 19Kandi erĩkĩrĩrya liwe molitoloba omugulu aganĩraya omwatsi w'omubiri wuwe ĩnĩakĩsĩya iniahola, kusangwa abya w'emyaka hakũhĩ n'erĩgana liguma. Kandi kusangwa Sara abya mugumba. 20Abrahamũ mwatatika-tika erĩkĩrĩrya erilaga lya Nyamuhanga, nĩkwa mwayitsinga omw'ĩkĩrĩrya, mwapipa Nyamuhanga. 21Kusangwa abya ĩnĩabĩrĩrĩga omo mutima wuwe ati, Nyamuhanga angatoka erĩberererya erilaga liwe. 22Neryo ngoko kĩsakĩre, Nyamuhanga mwamuganza mo mutunganene. 23Ebĩnywa ebĩ bĩkabũga biti, Mwaganzwa mo mutunganene, mobitasakwa busana naye musa. 24Nĩkwa mobyasakwa busana netu nibya. Ĩtwe twasyaganzwa mo batunganene ĩtũkĩkĩrĩraya ukw'oyo walũbũkaya Omukama wetu Yesu oko baholĩ. 25Yesu mwatwalwa oko luholo busana n'amalolo wetu, neryo mwalũbũkĩbwa erituyira mo batunganene.

will be added

X\