ABANYA ROMA 3

1Neryo nĩ ndũndĩ eribya Mũyũda kwehĩ? Kutse eribana likakuba lwahi kwehĩ? 2Linawite endũndĩ omo myatsi yosĩ. Erĩtsũka Nyamuhanga mwahĩra erĩkangĩrĩrya liwe omo byala by'Abayũda. 3Neryo abandu bamabya bakalegula, eriregula lyabo lyasyalũsya eritendiregula lya Nyamuhanga kwehĩ? 4Iyihi n'ahake. Nĩkwa Nyamuhanga aminyikale mo w'ekwenene, n'obuli mundu abye mũbehĩ. Ngoko kĩsakĩre kiti, Omo bĩnywa byawe ubanike n'eritunganene, Kandi ĩwasĩngana omo lubanza. 5Nĩkwa eritenditunganana lyetu lyamakangya eritunganene lya Nyamuhanga, tũbũgekĩ kwehĩ? Nyamuhanga siatunganene omugulu akatuhitanako kwehĩ? (ngabũga ng'abandu). 6Iyihi, n'ahake. Nyamuhanga amabya isiatunganene, asyatswera ekihugo ky'ati kwehĩ? 7Nĩkwa eribiha lyage lyamakangya ndeke ekwenene ya Nyamuhanga, n'erimuha olukengerwa, busana nakĩ nyikinatswerawa ng'omukola-nabi kwehĩ? 8Tũbũge tuti, Tukole nabi busana n'erireta ebibuya kwehĩ? Abandi bakatulega bati, tũkabũga tutya. Basyasĩngwa ngoko litolere. 9Neryo ĩtwe Abayũda tũlabĩre abandi bosĩ kwehĩ? Iyihi, kusangwa twabĩrĩhandĩkĩrĩrya Abayũda n'ab'ebindi Bihanda, abosĩ tuti bali kw'ebibi. 10Ngoko kĩsakĩre kiti, Sihali mundu n'omuguma oyutunganene; 11Sihali oyukaminya, Sihali oyukasonda-sonda Nyamuhanga; 12Abosĩ babirikitira emũsĩke, babiribya buyira, Sihali oyukakola ebibuya, sihali n'omuguma; 13Obuno bwabo buli ng'eyisinda eyĩtalĩbĩre; Bakateba omo syondimi syabo. Obuti bw'esyonzoka bũkalũa omwisi w'emĩnywa yabo. 14Erĩbũga lyabo lyoswĩre n'eritakira n'erikaliha. 15Ebisando byabo bikanguha erĩũta omusasi. 16Erĩherya n'obũlĩge biri ehosĩ bakaya. 17Sĩbasĩ enzira y'obuholo. 18Kandi sibetaminya eriubaha Nyamuhanga. 19Neryo tũnasĩ ebyosĩ Emigambo yĩkabũga, ĩkabũga busana n'abandu abakakwama Emigambo, abandu bosĩ basĩngawe, n'ekihugo kyosĩ kibye k'olubanza lwa Nyamuhanga. 20Kusangwa sihali mundu oyo wasyatũngananĩbwa embere sya Nyamuhanga busana n'erikola Emigambo. Kusangwa Emigambo ĩkamĩnyĩsaya abandu ko bakakola nabi. 21Nĩkwa lino kyabĩrĩmĩnyĩsĩbwa ko Nyamuhanga akatũngananaya abandu butsira busana n'Emigambo. Kandi Emigambo n'abamĩnyererĩ bĩkatũla omwatsi w'eritunganene erĩ. 22Nĩkwa Nyamuhanga akatũngananaya abandu busana n'erĩkĩrĩrya Yesu Kristo. Eritunganene erĩ ni ry'abandu bosĩ abakĩkĩrĩraya Kristo, kusangwa sialisombola mundu. 23Nĩkwa abandu bosĩ babirikola ebibi, kandi sĩbehĩka oko lukengerwa lwa Nyamuhanga. 24Nyamuhanga akatũngananaya abandu omo lũsũnzo lw'olukogo luwe busana n'erĩtongolĩbwa, erikabanika busana na Kristo Yesu. 25Kusangwa Nyamuhanga mwatuma Yesu Kristo erĩũta omusasi wuwe eribya mbanulo busana n'abandu abakĩkĩrĩraya. Nyamuhanga . mwamutuma busana n'erĩkangya ngoko akatũngananaya abandu. Kusangwa Nyamuhanga mwalindirira, mwakĩrũkya ameso oko bibi ebyakolawa kera; 26iniatoka erĩkangya eritunganene riwe oko mugulu ono. Atya, Nyamuhanga akakangaya kw'atunganene, kandi kw'akatũngananaya omundu oyũkĩkĩrĩraya Yesu. 27Neryo eky'eriyipipira kiri hahi kwehĩ? Sikiri. Busana nakĩ sikiri kwehĩ? Ni busana n'erikola Emigambo kwehĩ? Iyihi, nĩkwa ni busana n'erĩkĩrĩrya. 28Kusangwa ĩtwe tuti, omundu akatũngananĩbawa busana n'erĩkĩrĩrya, butsira erikola Emigambo. 29Ko Nyamuhanga ni w'Abayũda basa kwehĩ? Si Nyamuhanga w'Ebihanda nibya kwehr? Ega, ni w'Ebihanda nibya. 30Nyamuhanga ni muguma, naye asyatũngananĩa Abayũda omw'ĩkĩrĩrya lyabo, kandi asyatũngananĩa Ebihanda busana n'erĩkĩrĩrya lyabo. 31Neryo tũkaganaya Emigambo busana n'erĩkĩrĩrya kwehĩ? Iyihi, n'ahake. Nĩkwa tũkahanganaya Emigambo.

will be added

X\