ABANYA ROMA 2

1Neryo uwe mundu ukatswera omwatsi, suwite eky'erĩyĩhambũlyamo. Omugulu ukatswera ogundi, ũkayĩsĩnga. Kusangwa uwe ukatswera, nawe ukakola emyatsi eyo. 2Tũnasĩ ko Nyamuhanga akatswera omo kwenene omugulu akatswera abandu abakakola emyatsi eyĩ. 3Nawe ũtĩkĩ? Uwe ukatswera abakakola emyatsi eyĩ, nawe unemukolayo! Uti wasyabala eritswera lya Nyamuhanga kwehĩ? 4Kutse ukapona obubuya buwe bunene, n'erisasira liwe, n'eririndirira liwe kwehĩ? Sĩwasĩ ngoko bubuya bwa Nyamuhanga bũkakũkolaya okw'ibindula omutima n'erireka ebibi kwehĩ? 5Nĩkwa busana n'obutsibu b'omutima wawe owatebinduka, ukayibikyira erihitana oko kiro ekyo ky'erihitana lya Nyamuhanga n'eritswera litunganene riwe lyasyabĩsũlwa. 6Nyamuhanga asyaliha obuli mundu ng'emĩbĩrĩ yiwe ko yiri. 7Nyamuhanga asyaha engebe y'erikota oko bakayitsingirira omo mikolere yowene, ibakasonda olukengerwa, n'erĩsĩkya n'ebitehola. 8Nĩkwa erihitana n'erikarama lya Nyamuhanga lyasyabya oko bakayanza, n'erigana erĩowa eby'ekwenene, nĩkwa bakakwama ebitatunganene. 9Hasyabya eriagalwa n'obũlĩge oko buli mundu oyukakola ebibi, erĩtsũka oko Bayũda, n'akandi oko mundu w'ebindi Bihanda. 10Nĩkwa hasyabya olukengerwa, n'erĩsĩkĩbwa, n'obuholo oko buli mundu oyukakola ebibuya, erĩtsũka oko Bayũda, n'akandi oko bandu b'ebindi Bihanda. 11Kusangwa Nyamuhanga sialisombola ebitaga. 12Nĩkwa abosĩ abakakola nabi, isibawite Emigambo, basyahera butsira Migambo. Kandi abosĩ abakakola nabi, ibanawite Emigambo, basyatswerwa omo Migambo. 13Kusangwa Nyamuhanga sĩalĩtũngananaya abakowa Emigambo omo matwĩ masa. Nĩkwa abakakola ebyo Migambo ikahana, bo basyatũngananĩbwa. 14Kusangwa Ebihanda sibiwite Migambo nĩkwa omugulu bakakola ebyo Migambo ikategeka n'omutima owene, bakahĩra emigambo yabo, nomo batanawite Emigambo. 15Kusangwa bakakangaya emikolere y'Emigambo ng'ĩsakĩre omo mitima yabo. Obunya-mutima bwabo bũkakangaya ko biri bitya. Amalengekanĩa wabo akahandikirirabo kutse erihanganirabo. 16Engulu Yowene eyo ngatũlaganaya iti, Ko kyasyabya kitya oko kiro Nyamuhanga asyatswera, omwisi wa Kristo Yesu, emyatsi n'amalengekanĩa w'abandu ebĩbĩsamĩre. 17Nawe, wamayahula mo Mũyũda, ukayiketera Emigambo, kandi ukayihalamba umu Nyamuhanga. 18Kandi uti ũnasĩ erisonda lya Nyamuhanga, kandi uti ũnasĩ eriyisoga emyatsi itolere, kusangwa wabiryiga Emigambo. 19Kandi uti wabiriminya k'uli mũsondolĩ w'esyondĩmatĩme, ekyakakala busana n'abandu abali omo mwĩrĩmya, 20kandi uli mũkangĩrĩrya w'abakĩrũ, n'omwĩgĩsya w'abana. Uti uwite omo Migambo amenge gosĩ n'ekwenene. 21Neryo uwe ũkakangĩrĩraya abandi, sũlĩyĩkangĩrĩraya kwehĩ? Uwe ũkatũlago uti, omundu syĩbe, nawe ũkĩba kwehĩ? 22Ũkabũga uti omundu ĩsyasĩngĩra, nawe ũkasĩngĩra kwehĩ? Uwe ukagana esyosanamu syo kutsibu, ũkahũnga ebindu omo syohekalũ kwehĩ? 23Ukayihalamba omo Migambo, sulihemula Nyamuhanga omugulu ũkahalaya oko Migambo kwehĩ? 24Kusangwa kĩsakĩre kiti, Erĩna lya Nyamuhanga likatsumawa omo katĩkatĩ k'Ebihanda, busana nenyũ Abayũda. 25Kusangwa eribana liwite endũndĩ ndeke, wamabya ukakola Emigambo. Nĩkwa wamahalya oko Migambo, eribana lyawe likabya ng'eritendibana. 26Neryo omundu oyutabwene amakwama ebikahamulawa n'Emigambo, Nyamuhanga siendisyamuganza ng'oyubwene kwehĩ? 27Neryo omundu oyutabwene, kusangwa akakwama ndeke emyatsi y'Emigambo, siendisyabatswera kwehĩ? nĩkwa, nomo munawite ebĩnywa by'Emigambo n'akandi mũkabanĩbawa, nĩkwa mũkahalaya oko Migambo. 28Kusangwa omundu sĩ Mũyũda busana n'omubiri, kutse erĩbanĩbwa si ry'omubiri. 29Nĩkwa omundu nĩ Mũyũda oyuli Mũyũda omo mutima wuwe, ĩnĩabĩrĩbanĩbwa omo mutima busana n'omũbĩrĩ w'Omũlĩmũ Abũyĩrĩre, butsira n'ebĩnywa by'Emigambo. Omundu oyo akapipawa na Nyamuhanga, butsira bandu.

will be added

X\