ABANYA ROMA 16

1Ngasĩma eribatumira Foĩbe, omũlĩkyetu w'obũkalĩ, oyukakolera ekanĩsa y'eKenkũrea. 2Mũmũkokaye omo lĩna ly'Omukama ngoko litolere busana n'abandu ba Nyamuhanga, Kandi mũmũwatĩkaye omo buli mwatsi ali nago bwaga bw'erĩwatĩkĩbwa nenyũ. Kusangwa abĩrĩwatĩkya abandu bangi, nage nibya. 3Mũkeraye Pĩrĩsĩla na Akwĩla abakakola nage omo mũbĩrĩ wa Kristo Yesu, 4kandi mobatalanda oko ngebe yabo busana n'erĩnyĩlamya. Ngahabo ewasĩngya n'esyokanĩsa syosĩ sy'Ebihanda nasyo sikahabo ewasĩngya. 5Kandi mũkeraye ekanĩsa eyiri omo nyũmba yabo. Mũkeraye omwanze wage ye Epenetũ, oyo watsũka erĩkĩrĩrya Kristo eAsĩa. 6Mũkeraye Marĩa oyo wakola kutsibu busana nenyũ. 7Mũkeraye Andronĩka na Yũnĩa ab'ekihanda kyetu, ababya omo mũlĩkĩ haguma nage. Kandi ni bakulu omo katĩ-katĩ k'abakwenda, kandi mobĩkĩrĩrya Kristo embere kwĩngye. 8Mũkeraye Ampũlĩato omwanze wage omwisi w'Omukama. 9Mũkeraye Ũrbano, oyukakola haguma netu omo mũbĩrĩ wa Kristo. Kandi mũkeraye omwanze wage ye Stakĩ. 10Mũkeraye Apele oyũkasĩmawa omo mũbĩrĩ wa Kristo. Mũkeraye ab'omwa Arĩstabũlo. 11Mũkeraye Herodĩo w'ekĩtũnga kyetu. Mũkeraye ab'omwa Narkĩso, abamatikene na Kristo. 12Mũkeraye Tĩrĩfena na Tĩrĩfosa, abakakola omũbĩrĩ w'Omukama. Mũkeraye omwanze wetu ye Persĩ, oyo wabirikola kutsibu omo mũbĩrĩ w'Omukama. 13Mũkeraye Rũfo, Omukristo mukulu omo mũbĩrĩ w'Omukama. Mũkeraye nyĩnya wuwe, ni koyo wage nibya. 14Mũkeraye Asĩnkrĩto na Fũlego, na Herme, na Patroba, na Herma, n'abalĩkyetu abali haguma nabo. 15Mũkeraye Fĩlologo, na Yũlĩa, na Nereo, na mwali wabo na Olĩmpa, n'abandu bosĩ ba Nyamuhanga abali haguma nabo. 16Mũkeranaye omw'iwanako erĩbũyĩrĩre. Esyokanĩsa syosĩ sya Kristo sĩkabakeraya. 17Balĩkyetu, ngabalemba-lemba, mũtegaye busana n'abo bakaleta erigabana, n'emyatsi y'erĩtwĩkalya, abatekwama erĩkangĩrĩrya eryo mwakangĩrĩrĩbawa. Musagebo. 18Kusangwa abandu ng'abo sibekolera Omukama wetu Kristo, nĩkwa bakakolera esyonda syabo. Kusangwa bakateba emitima y'abandu bate n'amenge, omo bĩnywa bitendere n'eby'ekĩsehya. 19Kusangwa engulu yenyũ ambu mũkowa Kristo, yabĩrĩhĩka oko bandu bosĩ; neryo ngatsema kutsibu busana nenyũ. Nĩkwa nyanzĩre mubye b'amenge omo bibuya, kandi mubye ng'abalere omo myatsi y'ebibi. 20Kandi Nyamuhanga oyukatuha obuholo, asyahĩnolera Satanĩ yo lũba omwisi w'ebisando byenyũ. Olukogo lw'Omukama wetu Yesu lubye nenyũ. 21Tĩmoteo oyukakola haguma nage akabakeraya; kandi Lũkĩo na Yasona, na Sosĩpatere ab'ekihanda kyetu, bakabakeraya. 22Ĩngye Teretĩo, oyukasaka ebarua eno, ngabakeraya omwisi w'Omukama. 23Gayo akabakeraya. Ĩngye indi mũgenĩ wuwe, kandi ekanĩsa ĩkahĩndana omo nyũmba yiwe. Erasto omũbĩkĩ w'esyofranka (esyoshĩllĩng) sy'omũyĩ akabakeraya. Kandi mũlĩkyetu Kwarto akabakeraya. 24Olukogo lw'Omukama wetu Yesu Kristo lubye nenyũ ĩnywe bosĩ. Amina.] 25Tupipe Nyamuhanga! Iye akatoka erĩbahanganĩa ndeke omo Ngulu Yowene eyo ngatũla, omwatsi wa Yesu Kristo, erĩkũmbo eryabĩsawa omo syondengo sya kera. Nĩkwa lino lyabĩrĩbĩsũlwa, 26kandi lyabĩrĩmĩnyĩkalĩbwa omo Masako w'abamĩnyererĩ. Neryo busana n'ekihano kya Nyamuhanga w'erikota, omwatsi oyũ abĩrĩmĩnyĩsĩbwa oko bihanda byosĩ, ibatoka erĩkĩrĩrya Kristo n'erĩmowa. 27Neryo uku Nyamuhanga oyuwite amenge ĩyowene, ukw'iye habye olukengerwa busana na Yesu Kristo, kera na kera! Amina.

will be added

X\