ABANYA ROMA 15

1Nĩkwa ĩtwe tuli n'amaka, litolere ĩtwawatĩkya obolo bw'abandu abate n'amaka, butsira erĩyĩtsemesya. 2Obuli mundu kwĩtwe atsemesaye mũlĩkyabo, busana n'erĩmũwatĩkya n'erĩmũhanganĩa ndeke. 3Kusangwa Kristo mwatayĩtsemesya; nĩkwa kĩsakĩre kiti, Ebĩtsũmĩ ebyo bakutsuma mobyambĩkako. 4Kusangwa ebyosĩ ebyasakawa erĩmbere omo Masako byasakawa busana n'erĩtũkangĩrĩrya. Neryo Amasako akatuha eriyitsingirira n'erihanda omutima, itwatoka eribya n'amaha. 5Nĩkwa Nyamuhanga oyukaha erĩyĩyĩnĩa n'erihanda omutima, abahe obũlengekanĩa bwa Kristo Yesu. 6Neryo ĩnywe bosĩ haguma n'omulenge muguma, imwapipa Nyamuhanga Tata w'Omukama wetu Yesu Kristo. 7Neryo mũkokanaye ngoko Kristo atũkokaya, Nyamuhanga abane olukengerwa. 8Kusangwa ngabũga nyiti, Kristo abiribya omugombe oko Bayũda busana n'erĩhanganĩa ekwenene ya Nyamuhanga, n'erĩberererya esyondagane siwe oko boso-kulu. 9Kandi Kristo atokesaye ebihanda ibyapipa Nyamuhanga busana n'eriganyira liwe. Ngoko kĩsakĩre kiti, Neryo busana n'ekyo, nasyakupipa omo katĩkatĩ k'ebihanda, Nasyimba ebikapipa erĩna lyawe. 10N'akandi, kiti, Mutseme, ĩnywe Bihanda, haguma n'abandu ba Nyamuhanga. 11N'akandi, kiti, Mupipe Omwami Mukulu, ĩnywe Bihanda byosĩ, N'abandu b'ebihanda byosĩ bamupipe! 12N'akandi Ĩsaya akabũga ati, Omwana wa Yese asyasa, Iye asyahanganĩbwa eritabala oko Bihanda. N'ebihanda basyamũhĩra kw'amaha wabo. 13Nĩkwa Nyamuhanga, oyukaleta maha, abosũlaye n'obutseme bosĩ n'obuholo bosĩ busana n'erĩmwĩkĩrĩrya, amaha wenyũ akanyirire kutsibu omo bũtokĩ bw'Omũlĩmũ Abũyĩrĩre. 14Balĩkyetu, nyĩnasĩ ndeke ko moswĩre n'obubuya, mwabiribana eriminya ebyo byo kutsibu, kandi mukatoka erihanana. 15Nĩkwa nabiribasakira butsira buba omo myatsi eyo erĩbĩbũkya. Ngabũga butsira buba kusangwa Nyamuhanga mwamba ekibuya omo lukogo luwe, 16eribya mugombe wa Yesu Kristo oko Bihanda. Ngakola ng'omũhererĩ busana n'erĩtũla Engulu Yowene eyĩkalũa uku Nyamuhanga, Ebihanda bibye buhere obũkasĩmawa na Nyamuhanga, obo Mũlĩmũ Abũyĩrĩre abirihigula. 17Neryo busana n'erimatikana na Kristo Yesu nabiribana ekyangaleka inayihalamba omo mũbĩrĩ wa Nyamuhanga. 18Kusangwa sindiendirenga eriahula ogundi mwatsi go n'ogo Kristo abirikola omo byala byage busana n'erisondola Ebihanda erĩowa Nyamuhanga omo bĩnywa n'omo mĩbĩrĩ, 19busana n'obũtokĩ bw'ebitiko-tiko n'eby'eriswekera, omo bũtokĩ bw'Omũlĩmũ. Neryo nabĩrĩtũla ndeke-ndeke Engulu Yowene erĩtsũka eYerũsalema n'omo bihugo hakũhĩ naho, n'erĩhĩka oko kihugo ky'eĨlĩrĩko. 20Litya nyinemusonda erĩtũla Engulu Yowene aho Kristo ate ahulirwa, ĩsĩnangahĩmba oko kibanza ky'ogundi mundu. 21Ngoko kĩsakĩre kiti, Abatetabwirwa engulu yiwe, basyalangira, N'abandu abate bowa, basyaminya. 22Busana n'omwatsi oyũ, nabĩrĩkakĩrĩbwa esyongendo nyingi erĩbahĩkako. 23Nĩkwa lino nabiribuga erikola omo bihugo ebĩ. Kandi kusangwa nabiribya n'olukando lw'erĩbahĩkako emyaka mingi, 24lino indi n'amaha w'eribalolako omugulu ngalabira eSpania. Neryo namabibunga haguma nenyũ oko katambĩ, ĩmwanyĩwatĩkya eriyayo. 25Nĩkwa lino ngaya eYerũsalema busana n'erĩwatĩkya abandu ba Nyamuhanga abaliyo. 26Kusangwa kyabĩrĩtsemesya amakanĩsa w'eMakedonĩa n'eAkaya erĩlabya ekĩbo busana n'abera abali omo katĩkatĩ k'abandu ba Nyamuhanga eYerũsalema. 27Ega mokyatsemesya amakanĩsa, kandi bali n'omwĩnda w'erikola batya. Kusangwa Abayũda mobawatĩkya ab'Ebihanda omo myatsi y'ekĩrĩmũ neryo ab'Ebihanda bali n'omwĩnda w'erĩwatĩkya Abayũda omo myatsi eyĩkawatĩkaya omubiri. 28Namabibuga omũbĩrĩ mubuya oyũ, n'erihabo ebyosĩ ebiri omo kĩbo kyabo, nasyaya eSpania, n'erilaba ewenyũ omo nzira. 29Nyĩnasĩ omugulu nasyahĩka ewenyũ, nasyasa n'omũyĩsa gosĩ wa Kristo. 30Neryo balĩkyetu, ngabalembalemba, busana n'Omukama wetu Yesu Kristo, n'akandi busana n'olwanzo olo Mũlĩmũ akaha, muhatikane Nyamuhanga haguma nage omw'isaba lyenyũ busana nage, 31nyĩteyĩbawe oko bandu batĩowa eYũdea; kandi omũbĩrĩ wage eYerũsalema asĩmawe n'abandu ba Nyamuhanga eyo. 32Litya inatoka erĩbahĩkako n'obutseme omw'isonda lya Nyamuhanga, n'erĩyĩsyandira ndeke busana n'erĩyabalũngũlĩra. 33Neryo Nyamuhanga oyukatuha obuholo abye haguma nenyũ ĩnywe bosĩ. Amina.

will be added

X\