ABANYA ROMA 14

1Nĩkwa mũkokaye oyuli molo omw'ĩkĩrĩrya liwe. Nĩkwa sukube buhaka naye busana n'amalengekanĩa wuwe. 2Omundu muguma akĩkĩrĩraya ati anganalya ebyosĩ, nĩkwa oyuli molo akalya esyomboka nyisa. 3Omundu oyukalya ebyosĩ siapone oyuterya ebyosĩ. N'oyuterya ebyosĩ siatswere oyukalya ebyosĩ, kusangwa Nyamuhanga abĩrĩmũlĩga. 4Nawe uwendi uti ukatswera omugombe w'ogundi kwehĩ? Embere sy'omukama wuwe asyasĩngana kutse asyasĩngwa. Asyasĩngana ndeke kusangwa Omukama awite obũtokĩ bw'erĩmũhanganĩa ndeke. 5Omundu muguma akaganza ekiro kiguma mo kikulu kwilaba ekindi, n'ogundi akaganza ebiro byosĩ ng'ebindi. Obuli mundu aminye ndeke ebyo amalĩga omo bũlengekanĩa buwe. 6Oyukakenga ekiro kiguma, akakengakyo busana n'Omukama. N'oyukalya ebyosĩ akalya n'erikenga Omukama, kusangwa akaha Nyamuhanga y'ewasĩngya; n'oyuterya ebyosĩ akakola atya busana n'erikenga Omukama, kandi akaha Nyamuhanga y'ewasĩngya. 7Kusangwa sihali oyukabyaho busana naye ĩyowene-wene, kandi sihali oyukahola busana naye ĩyowene-wene. 8Kusangwa twamabyaho tukabyaho busana n'Omukama, kandi twamahola tukahola busana n'Omukama. Neryo, twamabyaho kutse. twamahola, tuli b'Omukama. 9Kusangwa Kristo mwahola neryo mwaswabyaho, atoke eribya Mukama w'abaholĩre n'abaliho. 10Nĩkwa nawe, busana nakĩ ukatswera mũlĩkyenyũ kwehĩ? Kandi nawe busana nakĩ ukapona mũlĩkyenyũ kwehĩ? Kusangwa ĩtwe bosĩ twasyahangana embere w'ekĩtũmbĩ ky'eritswera kya Nyamuhanga. 11Kusangwa kĩsakĩre kiti, Omukama ati, Ĩngye nyiriho! Obuli mundu asyakũkama embere syage, N'obuli mundu asyatũlago ko nyiri Nyamuhanga. 12Neryo obuli mundu asyakanganĩa Nyamuhanga ebyo akola. 13Neryo tuleke eritswerana, nĩkwa mũbũge muti, omundu sĩahĩre kindu ekyangatwĩkalya mũlĩkyabo, kutse erireka akawa omo bibi. 14Nyĩnasĩ, kandi nabĩrĩmĩnyĩsĩbwa busana n'Omukama Kristo ko hate kindu kĩtĩsĩrĩre ĩkyokyene; nĩkwa omundu amaganĩrya kw'ekindu kĩtĩsĩrĩre, busana naye, kĩtĩsĩrĩre. 15Wamĩta mũlĩkyenyũ y'obũlĩge busana n'ebyo ukalya, sulirendera omo lwanzo. Suleke akalyo kawe kakaherya omundu oyo Kristo aholera. 16Neryo simuleke ekiri kibuya ũkw'ĩnywe kikatsumwa ng'ekibi. 17Kusangwa obwami bwa Nyamuhanga si mwatsi w'erirya kutse w'erĩpũlya, nĩkwa ni butunganene, n'obuholo, n'obutseme obo Mũlĩmũ Abũyĩrĩre akaha. 18Kusangwa oyukakolera Kristo atya akatsemesaya Nyamuhanga, kandi abandu bakamũsĩma. 19Neryo tukwame emyatsi eyikaleta obuholo n'ebĩkatũhanganaya. 20Busana n'akalyo sũtsandaye omũbĩrĩ wa Nyamuhanga. Ebyosĩ bĩsĩrĩre, nĩkwa ni kibi busana n'oyukalyabyo amaleka ogundi erikola ebibi. 21Sĩryowene erirya esĩswĩ kutse erĩpũlya ebĩnyũ, kutse erikola ekĩndũkĩ ekikaleka mũlĩkyenyũ iniakola ebibi. 22Ekyo ũkĩkĩrĩraya nga kyowene, ubye nakyo ĩwowene embere sya Nyamuhanga. Obutseme buli n'oyute n'omusango omo mutima wuwe busana n'ebyo akasĩma. 23Nĩkwa oyukatikatikira ekyo akalya ali n'omusango, kusangwa erikola liwe siriwite erĩkĩrĩrya. N'ekĩndũkĩ akakola atĩkĩrĩrye ni kibi.

will be added

X\