ABANYA ROMA 13

1Obuli mundu akenge abatabalĩ b'ekihugo. Kusangwa sihali ehamũlĩ eyĩtalũa uku Nyamuhanga, n' ab'ehamũlĩ baliho, bahĩrĩrweho na Nyamuhanga. 2Neryo oyukalwa n'abenye ehamũlĩ akalwa n'ekilayiro kya Nyamuhanga, n'abakalwa n'abatabalĩ basyayiretera erĩsĩngwa. 3Kusangwa abatabalĩ sibaliho busana n'erĩũbahya oyukakola ndeke, nĩkwa busana n'erĩũbahya oyukakola nabi. Ũnanzĩre eritindiubaha omundu w'ehamũlĩ kwehĩ? Ego, ukole ndeke neryo basyakupipa. 4Kusangwa abatabalĩ ni bagombe ba Nyamuhanga busana n'erikukola ndeke. Nĩkwa wamakola ekibi, wubahe; kusangwa sialiheka omũyalĩ go busa; kandi ni mugombe wa Nyamuhanga oyũkakĩsaya busana n'erireta erihitana oko yukakola ekibi. 5Neryo litolere iwakengabo, butsira busana n'erihitana lya Nyamuhanga lisa, nĩkwa busana n'obunya-mutima bwawe. 6Kandi busana n'ekĩ mukasola nibya, kusangwa abatabalĩ ni bagombe ba Nyamuhanga omugulu bakakola omũbĩrĩ wabo. 7Mulihe abosĩ b'emĩnda yabo, omusolo oko yutolere omusolo, engemu oko mwenye ngemu, erikenga ukw'oyo wangakengwa, erĩsĩkya ukw'oyo wangasĩkĩbwa. 8Subye n'omwĩnda w'omundu n'omuguma, lye n'erianzana lisa; kusangwa oyukanza mũlĩkyabo abĩrĩberererya Emigambo. 9Kusangwa ebihano biti, Isiwasĩngĩra, ĩsĩwĩta, ĩsĩwĩba, isiwarumawa. Kandi hamabya ekindi kihano, ebyosĩ bĩkahĩkana omo kihano kiguma kiti, Wanze mũlĩkyenyũ ngoko ukayanza. 10Olwanzo silulikola mũlĩkyabo yo kibi. Neryo olwanzo lũkaberereraya Emigambo yosĩ. 11Neryo ĩmũnasĩ omugulu oyũ, nĩ ndambĩ yenyũ y'eribuka omo tũgotserĩ; kusangwa erilama liri hakũhĩ netu, kwilaba ekiro twĩkĩrĩraya. 12Obũtũkũ bũkĩsĩya ibwakya, eritungi iryasa. Neryo tuleke emĩbĩrĩ y'omwĩrĩmya, twambale ebindu by'amalwa by'ekyakakala. 13Tulendere ngoko litolere omugulu bukere, situtamire n'erĩkũnda, situbye n'oburagane n'esyongumbu nyibi, situlwe, situbye n'obũha. 14Nĩkwa muleke Yesu Kristo abye oyukabalwira n'ebindu biwe by'amalwa; simubye n'obũlengekanĩa bw'omubiri erikwama esyongumbu syago.

will be added

X\