ABANYA ROMA 12

1Balĩkyetu, ngabalemba-lemba busana n'eriganyira ĩnene lya Nyamuhanga, nyiti, muyihe uku Nyamuhanga ng'obuhere obuliho, kandi obũbũyĩrĩre, obũkamũtsemesaya. Erĩ nĩ 'ramya erikutolere. 2Sĩmũsosekanĩbawe n'emyatsi y'ekihugo kino, nĩkwa muleke Nyamuhanga eribahindula n'eribaha obũlengekanĩa buhya-buhya. Mutya mwasyatoka eriminya erisonda lya Nyamuhanga. Erisonda erĩ ni ribuya, kandi lĩkatsemesaya, kandi lĩhĩkene. 3Kusangwa Nyamuhanga abirimba olukogo olũ, ngabwira obuli mundu omo katĩkatĩ kenyũ nyiti, siayiganze eribya mukulu kwilaba aho atolere, nĩkwa aganĩraye ndeke n'eriyitswera omo lulengo lw'erĩkĩrĩrya olo Nyamuhanga abiriha oko buli mundu. 4Tuwite ebĩtsũko bingi oko mubiri muguma, n'obuli kĩtsũko kiwite omũbĩrĩ wakyo. 5Netu tutya tuli bangi, tuli mubiri muguma itumatikene na Kristo, kandi tuwatene haguma ng'ebĩtsũko mĩsĩndo-mĩsĩndo by'omubiri muguma. 6Kandi kusangwa tuwite olũsũnzo mĩsĩndo-mĩsĩndo olũkalũa uku Nyamuhanga busana n'olukogo olo abirituha tukole mulo. Twamabya tuwite olũsũnzo lw'erĩtũla Engulu Yowene, tũtũleyo omo lulengo lw'erĩkĩrĩrya lyetu. 7Kumbe nĩ lũsũnzo lw'omũbĩrĩ, tukole. Kumbe amatuha erĩkangĩrĩrya, tũkangĩrĩraye abandu. 8Amatuha erĩsĩkya emitima y'abandu, tukole tutya. Amatuha erĩhĩtya, tũhĩtaye ndeke. Oyukasondola asondole n'omũhwa. Oyukaganyira abandi akole atya n'obutseme. 9Olwanzo lubye butsira eriteba. Ũkwe ekibi kyo nye. Ukwamirire ekibuya. 10Mwanzane kutsibu ng'abasubeneko. Mukengane n'eribya n'omutima w'erĩsĩkya abandi. 11Mukole n'omũhwa butsira bugata. Mubye n'omũhwa munene omo kĩrĩmũ, n'erikolera Omukama. 12Mutseme omo maha, mũyĩyĩnaye omo malĩge, eriyitsingirira omw'isaba, 13musangire omo bwaga bw'abandu ba Nyamuhanga, mũkokaye abagenĩ. 14Mutsumule abakabendereraya; mutsumulebo, simutakirebo. 15Mutseme haguma n'abakatsema, mulire haguma n'abakalira. 16Mubye n'obũlengekanĩa buguma omo katĩkatĩ kenyũ; simubye n'obũlengekanĩa bw'eriyiheka, nĩkwa musibe n'abahehere. Simuyiganze ng'ab'amenge. 17Omundu amakukolera ekibi, sumulihe ekibi. Mũganĩraye ekitunganene omo meso w'abandu bosĩ. 18Kyamatokekana, oko luhande lwenyũ, mubye n'obuholo oko bandu bosĩ. 19Abanze, sĩmũyĩkĩsaye, nĩkwa muleke erihitana lya Nyamuhanga likole, kusangwa kĩsakĩre kiti, Omukama ati, Erĩkĩsya ni ryage. Nasyaliha. 20Kandi kĩsakĩre kiti, Enzĩgũ yawe yamawira, iwamwaganula, amakwa enyota, iwamuha aw'erĩpũlya; kusangwa mwamakola mutya imwamalunda amakala w'omuliro oko mutwe wuwe. 21Suleke ekibi kĩkakũkĩnda, nĩkwa ũkĩnde ekibi omo kibuya.

will be added

X\