ABANYA ROMA 11

1Neryo ngabũlaya nyiti, Nyamuhanga abirigana abandu buwe kwehĩ? Iyihi n'ahake! Kusangwa nage indi Mũĩsraelĩ, og'olubuto lwa Abrahamũ, ow'ekihanda kya Benyamĩna. 2Nyamuhanga sialitagana abandu buwe, abo abiriyisoga kera. Unasĩ ngoko Amasako akabũga busana na Elĩa kwehĩ? Elĩa ahandĩkĩrĩraya Abaĩsraelĩ b'uku Nyamuhanga ati, 3Mukama, babĩrĩta abamĩnyererĩ bawe, babĩrĩhĩmbũla ebiherero byawe. Ĩngye nyĩkĩnasĩya, kandi bakasonda erĩnylĩta. 4Nĩkwa Nyamuhanga mwasũbĩrya atĩkĩ kwehĩ? Ati, Nabiriyibikira abandu elfu irinda (7000), abatetakũkamira Baali. 5Ko liri ritya lino, hali abasĩgalira, abo Nyamũhanga abiriyisoga omo lukogo luwe. 6Neryo eriyisoga liwe lyamabya busana n'olukogo luwe, silwimene oko mĩbĩrĩ. Kite kitya olukogo luwe si kwenene. 7Ko byabere biti kwehĩ? Abaĩsraelĩ mobatabana ekyo babya bakasonda. Nĩkwa abake abayisogawa mobabanakyo N'abandi emitima yabo moyakala. 8Ngoko kĩsakĩre kiti, Nyamuhanga mwahabo ekĩrĩmũ ky'eritendiminya kindu, Ameso wabo sialilangira, n'amatwĩ wabo sĩalĩowa, ko bane batya erĩhĩka na mũnabwĩre, 9Kandi Dawĩdĩ akabũga ati, Emesa yabo yibye mũlyatĩ n'ekitego. Batwĩkale n'erisuyirwa. 10Ameso wabo abye mwĩrĩmya ibatatoka erilangira, Kandi ũnamaye emigongo yabo y'ebiro byosĩ. 11Neryo ngabũlaya nyiti, Batwĩkere n'eriwa kwehĩ? Iyihi n'ahake! Nĩkwa busana n'erĩlolo lyabo, erilama lyabĩrĩhĩka oko Bihanda, erireka Abayũda ibabya n'obũha. 12Neryo erĩlolo ly'Abayũda lyamaleta omũyĩsa oko kihugo, n'eritaluka lyabo lyamaleta omũyĩsa g'oko Bihanda. Omũyĩsa asyabya munene kw'aho omugulu Abayũda basyabyaho ndeke. 13Neryo ngabwira ĩnywe b'Ebihanda, Kusangwa indi mukwenda w'Ebihanda, ngayihalamba omo mũbĩrĩ wage. 14Kumbe nangatoka erireka ab'ekihanda kyage ibabya n'obũha; n'erĩlamya abandi ba kubo. 15Kusangwa kumbe eriganwa lyabo likabya erĩsanganĩa ly'abandu b'ekihugo neryo erĩrĩgwa lyabo likabya liti kwehĩ? Lyasyabya n'engebe busana n'abaholĩ. 16Omukanyo amabya abũyĩrĩre, neryo obundu nabo bũbũyĩrĩrĩre. Kandi omũlĩhĩ amabya abũyĩrĩre, neryo emitahi nayo yĩbũyĩrĩre. 17Nĩkwa eyindi mitahi y'omuti w'omũzeĩtũnĩ yamatahulwa, nawe omutahi w'omũzeĩtũnĩ w'omolĩ ũkahĩrawa omo muti oyo ukasangira mo muboga w'amatsitsi awakalũa omo mũlĩhĩ. 18Subye ukayiheka embere w'emitahi; kusangwa wamayiheka, si iwe ukaheka omũlĩhĩ nĩkwa omũlĩhĩ akakuheka. 19Ũkandĩbũga uti, Emitahi yatahulawa inatoka erĩhĩrwamo. 20Kwenene, nĩkwa moyatahulwa busana n'erĩtendĩkĩrĩrya lyabo, nawe ukabyamo busana n'erĩkĩrĩrya lyawe. Subye ukayiheka, nĩkwa ubahe. 21Kusangwa Nyamuhanga amabya ĩsĩalĩtabalya emitahi y'omuti gowene, ĩsĩendĩsyakũbalya nawe. 22Lebaya obubuya n'obukali bya Nyamuhanga. Akalĩre busana n'abandu abawa, nĩkwa ni mubuya uk'uwe, wamakwamirira omo bubuya buwe. Bite bitya, nawe, wasyatũbwa nibya. 23Nabo Abayũda, bamaleka erikwamirira erĩtendĩkĩrĩrya lyabo, basyahĩrwa aho babya. Kusangwa Nyamuhanga akatoka erĩswahĩrabomo. 24Nawe ow'Ebihanda watũbawa oko muti w'omũzeĩtũnĩ w'omũsĩndo w'omolĩ, mowahĩrwa omo muti w'omũzeĩtũnĩ w'omũsĩndo w'eka. Kwilaba aho emitahi eyo y'omũsĩndo w'eka yasyahĩrwa omo muti w'omũzeĩtũnĩ wabo w'eka. 25Balĩkyetu, nyanzĩre imwaminya ndeke erĩkũmbo erĩ, mukasyabya n'amenge omo malengekanĩa wenyũ. Erĩkũmbo lyerĩ liti, erikala hake ly'omutima lyabirihamba Ĩsraelĩ erĩhĩka aho eriganza ly'Ebihanda lyamahĩka uku Nyamuhanga. 26Neryo Abaĩsraelĩ bosĩ basyalamĩbwa, ngoko kĩsakĩre kiti, Omũlamya asyalũa eSĩonĩ, Asyalũsya amalolo oko bana ba Yakobo. 27Kandi eyĩ ni ndagane yage hagtuma nabo, Omugulu ngalũsaya ebibi byabo. 28Kusangwa omo mwatsi w'Engulu Yowene Abayũda, nĩ nzĩgũ busana nenyũ, nĩkwa omw'iyisoga lya Nyamuhanga, ni banze busana n'abotata-kulu wabo. 29Kusangwa olũsũnzo lubuya n'eribirikira lya Nyamuhanga sibyebinduka. 30Nenyũ ab'Ebihanda mwabya ĩsĩmũlĩowa Nyamuhanga, nĩkwa lino mwabiribana eriganyira kusangwa Abayũda mobatowa. 31Neryo kusangwa ĩnywe b'Ebihanda mwabiribana eriganyira, litya Abayũda lino ni bandu batyowa, ibatoka nabo eribana eriganyira lya Nyamuhanga. 32Kusangwa Nyamuhanga abĩrĩhĩra abosĩ okw'ĩtendĩowa, iniatoka eriganyira abosĩ. 33Kwenene obukulu bwa Nyamuhanga ni bunene! Kwenene Nyamuhanga awite amenge gosĩ n'eriminya lyosĩ! Sihali mundu wangaminya erisoha liwe! Sihali mundu wangaminyerera esyonzira siwe! 34Ngoko kĩsakĩre kiti, Nindi wabiriminya obũlengekanĩa bw'Omukama kwehĩ? Nindi wangabya mũhanĩ wuwe kwehĩ? 35Nindi wabirimuha kindu, atũhawe kandi kwehĩ? 36Kusangwa iye mwahangika emyatsi yosĩ, kandi emyatsi yosĩ iye yo wabumbayo kandi emyatsi yosĩ iri busana naye. Olukengerwa lubye uku Nyamuhanga kera na kera. Amina.

will be added

X\