ABANYA ROMA 1

1Ĩngye Paũlo, omugombe wa Kristo Yesu n'omukwenda oyo Nyamuhanga abirikira n'erimusombola busana n'Engulu Yowene yiwe. 2Engulu Yowene eyi Nyamuhanga alagayo erĩmbere omo muno w'abamĩnyerĩ buwe, kandi ĩsakĩre omo Masako abũyĩrĩre. 3Engulu Yowene eyĩ ni y'Omugala wuwe, Omukama wetu Yesu Kristo. Naye abutawa ng'omundu omo lubuto lwa Dawĩdĩ. 4Nĩkwa omo BuNyamuhanga buwe bũbũyĩrĩre, erĩlũbũka liwe oko baholĩ lĩkakangaya omo bũtokĩ bunene, Yesu kw'ali Mugala wa Nyamuhanga. 5Busana na Kristo twabirihabwa olukogo kandi twabĩrĩhĩrwa mo bakwenda buwe, erisondola abandu b'ebihanda byosĩ erĩmwĩkĩrĩrya n'erimukenga. 6Nenyũ nibya ĩnywe muli eRoma, Nyamuhanga abiribabirikira eribya bandu ba Yesu Kristo. 7Neryo ngabasakira ĩnywe, ab'eRoma, abo Nyamuhanga abirianza n'eribabirikira eribya bana buwe. Nyamuhanga Tata wetu, n'Omukama Yesu Kristo, abahe olukogo n'obuholo. 8Ngatsũka eriha Nyamuhanga wage y'ewasĩngya busana na Yesu Kristo, busana nenyũ ĩnywe bosĩ. Kusangwa erĩkĩrĩrya lyenyũ lĩkatũlawa omo kihugo kyosĩ. 9Kusangwa Nyamuhanga nĩ mũlangĩrĩ wage, oyo ngakolera n'omutima wage gosĩ omo mũbĩrĩ w'Engulu Yowene y'Omugala wuwe, anasĩ ngoko ngabahula emigulu yosĩ omw'isaba, lyage, butsira erĩũmbya. 10Ngabũlaya omw'isaba lyage nyiti omw'isonda lya Nyamuhanga, kumbe ĩnahĩka eyo eribabana. 11Kusangwa nyĩbakwĩre olukando lw'eribalolako, inatoka eribaha emyatsi y'Omũlĩmũ, imwatoka erihangana ndeke. 12Nyiti itwatoka erĩsĩkanĩa emitima omw'ĩkĩrĩrya lyenyũ n'eryage ĩtwe bosĩ. 13Nyanzĩre imwaminya ndeke, balĩkyetu, ko nalenga esyongendo nyingi eriyabalolako. Nĩkwa nabĩrĩkakĩrĩbwa kandi n'akandi. Nabya nyanzĩre eribana abandu busana na Nyamuhanga omo katĩkatĩ kenyũ, ngoko twabanabo, omo katĩkatĩ k'ebindi bihanda. 14Indi m'omwĩnda w'abandu bosĩ, abasĩ ebarua n'abayĩra, ow'amenge, n'oyũtasĩkĩ. 15Neryo ĩngye indi n'omũhwa w'erĩbatũlĩra Engulu Yowene, ĩnywe muli eRoma. 16Kandi sĩnyĩkwĩre esĩsonĩ busana n'Engulu Yowene, kusangwa nĩ bũtokĩ bwa Nyamuhanga, obũkalamaya obuli mundu oyũkĩkĩrĩraya, erĩtsũka oko Bayũda, n'akandi oko bandu b'ebindi bihanda nibya. 17Kusangwa Engulu Yowene ĩkatũbĩsũlĩra ngoko Nyamuhanga akatũngananaya omundu embere siwe, omw'ĩkĩrĩrya lisa, ngoko kĩsakĩre kiti, Nĩkwa oyukatunganana embere sya Nyamuhanga busana n'erĩkĩrĩrya asyakota. 18Kusangwa erikarama lya Nyamuhanga lyabĩrĩbĩsũlwa, lĩkalũa elubula busana n'ebyosĩ ebitatunganene by'abandu, n'ebitekenga Nyamuhanga. Kusangwa omo nzira nyibi yabo bakakakĩraya eky'ekwenene eriminyikala. 19Kusangwa ebyasĩbwe bya Nyamuhanga byabĩrĩmĩnyĩkalĩbwa kubo, kusangwa Nyamuhanga abĩrĩmĩnyĩsyabo. 20Erĩtsũka omugulu Nyamuhanga ahangika ekihugo, emyatsi ya Nyamuhanga eyitalolawako, y'obũtokĩ buwe bw'erikota, n'Obunyamuhanga buwe, byabiriminyikala ndeke-ndeke omo bindu ebyo ahangika. Neryo abandu sibawite eky'erĩyĩhambũlyamo. 21Kusangwa nomo banabya basĩ Nyamuhanga, mobatamũsĩkya nga Nyamuhanga, kutse erimuha ewasĩngya. Amalengekanĩa wabo abiribya buyira, kandi omwĩrĩmya abiringira omo mitima mĩkĩrũ yabo. 22Bakayihalamba ng'ab'amenge, kwesĩ ibabiribya bakĩrũ. 23Mobahĩnganĩa olukengerwa lwa Nyamuhanga olutetsanda, omo bĩsosekanĩo by'abandu abakatsanda, n'eby'esyonyonyũ, n'eby'esyonyama, n'esikakululuka. 24Busana n'emyatsi eyĩ, Nyamuhanga mwalekabo ati bakwame esyongumbu sy'emitima yabo, n'erikola ebĩtĩsĩrĩre. Kandi bakakola emyatsi y'esĩsonĩ omo mibiri yabo. 25Bakahĩnganaya ekwenene ya Nyamuhanga omo mabehĩ, ĩbaramya n'erikolera ekyahangikawa butsira Omũhangĩkĩ oyutolere eripipwa kera na kera! Amina. 26Busana n'ebĩ, Nyamuhanga mwalekabo erikwama esyongumbu syabo sy'esĩsonĩ, N'abakalĩ ĩbakahĩnganaya emyatsi y'obũkalĩ omo myatsi eyite y'obũkalĩ. 27N'abalume nabo ibakaleka emyatsi eyitolere erikola n'omũkalĩ, ibakabeberera omo syongumbu syabo, omulume iniakakola n'ogundi mulume eby'esĩsonĩ. Aba bakabana omwisi wabo eririha eritolere erĩhalya lyabo. 28Kusangwa bakagana erĩrĩga Nyamuhanga omo bũlengekanĩa bwabo, Nyamuhanga mwalekabo omo bũlengekanĩa bũtsandĩre erikola emyatsi itatolere. 29Boswĩre mw'ebitatunganene, n'ebibi, n'erirumwa, n'omwaga, boswĩre n'eritsura, erĩĩta, n'amalwa, eriteba, erirega abandi, n'eritonga nabi, 30bakaIega abandu, bakakwa Nyamuhanga y'obusu, bakapona, bakayanza, bakayihalamba, bakayibanira emĩsĩndo yosĩ y'ebibi. Kandi sĩbalĩowa ababutabo. 31Sibaliminya, bakatwa erilagana lyabo, sibawite olwanzo, sibeganyira mundu. 32Kandi nomo banabya basĩ Emigambo ya Nyamuhanga eyĩkabũga iti, abakakola emyatsi eyĩ, batolere ibahola; nomo banabya basĩ ebĩ, bakakolabyo, kandi bakasĩma abandu abakakolabyo.

will be added

X\