ERĨBĨSŨLĨRWA 9

1Neryo omũlaĩka w'akatanu mwabuha engubi yiwe, neryo monalangira engũnũnũ eyalũa elubula n'eritogera oko kihugo. Neryo engũnũnũ moyahabwa ekĩboholĩ ky'obuhya obutawite kabuno. 2N'engũnũnũ moyalĩbũla obuhya obutawite kabuno, n'omũkĩ mwalũamo, ng'omũkĩ w'erĩsĩngo lĩnene, n'eryuba n'ekyanya mobyakĩna busana n'omũkĩ owalũa omo buhya obo. 3Neryo esyongĩke mosyalũa omo mũkĩ oyo, mosyahĩka omo kihugo. Nĩkwa esyongĩke mosyahabwa amaka ng'esyonge sy'ekihugo ko siwite amaka. 4Nasyo mosyabwirwa sĩsĩtsandaye ebiti by'ekihugo, kutse ekindi kindu kibisi, kutse miti, nĩkwa sĩagalaye abandu abatawite ekiminyikalo kya Nyamuhanga oko mbũmo syabo. 5Esyongĩke esĩ mositahabwa ehamũlĩ y'erĩĩta abandu aba, nĩkwa erĩagalyabo emikera ĩtanu. Eryagalwa lyabo lyabya ng'eryagalya ly'enge omugulu ikaluma omundu. 6Kandi oko biro ebyo, abandu basyasondya oluholo, nĩkwa sibendisyabanalo, kandi basyasonda-sonda erihola nĩkwa oluholo lwasyasagabo. 7Esyongĩke esyo syabya sĩsosĩre esyosabayĩrĩ esĩyĩtegekenĩe oko malwa. N'oko mitwe yasyo habya ng'esyombĩta sy'esyamagetsi, n'obũsũ bwasyo bwabya ng'obũsũ bw'abandu. 8Esyonzwiri syasyo syabya ng'esyonzwiri sy'abakalĩ, n'ameno wasyo abya ng'ameno w'esyondale. 9Kandi syabya n'amupa ng'amupa w'ebyuma, n'erihuha ly'ebĩpũpa byasyo lyabya ng'emirenge y'esyogalĩ sy'esyosabayĩrĩ esikatibita eyiri amalwa. 10Kandi siwite emikira ng'emikira y'esyonge, n'ehisuti, kandi omo mikira yasyo siwite amaka w'erĩagalya bandu oko mikera ĩtanu. 11Kandi siwite omwami oyukatabala kusyo, yo mũlaĩka w'obuhya. Erĩna liwe omo Kiebrania ni Abadonĩ, n'omo Kĩgĩrĩkĩ ni Apolĩonĩ liti, Erihera. 12Obũlĩge bw'erĩmbere bwabirilaba. Lebaya, enyũma w'emyatsi eyĩ awandi malĩge abiri akahĩka. 13Neryo omũlaĩka w'endatu mwabuha engubi yiwe, neryo monowa omulenge akalũa oko mahembe ani w'ekiherero ky'esyamagetsi ekiri embere sya Nyamuhanga. 14Omulenge oyo mwabwira omũlaĩka ow'endatu, oyuwite engubi, ati, Ubohole abamalaĩka bani ababohere ahali olũsĩ lunene eFũratĩ. 15Neryo abamalaĩka bani abo mobaboholwa. Babya ibabiritegekanĩbwa busana n'endambĩ eno, y'ekiro kino, y'omukera ono, n'omwaka oyũ, busana n'erĩĩta ekiguma ky'omo bisatu ky'abandu. 16Kandi monowa emiganzo y'emilondo y'abandu abali oko syosabayĩrĩ babya emĩlĩonĩ magana abiri, ( 200,000,000 ). 17Neryo omw'ilota monalangira esyosabayĩrĩ, n'ababya kusyo, ibambite amupa awasosĩre ng'omuliro, ng'amabwe w'esamawĩ, kandi ng'ekirimi. Emitwe y'esyosabayĩrĩ yabya ng'emitwe y'esyondale. Kandi omuliro, n'omũkĩ, n'ekirimi mobyahuluka omo muno wasyo. 18Neryo ekiguma ky'omo bisatu ky'abandu mobĩtwa omo malĩge asatu aya: omuliro, n'omũkĩ, n'obũsĩngo ebyahuluka omo muno w'esyosabayĩrĩ. 19Kusangwa amaka w'esyosabayĩrĩ abya omo muno wasyo, n'omo mikira yasyo. Kusangwa emikira y'esyosabayĩrĩ iri ng'esyonzoka, kandi iwite emitwe. Nĩkwa sĩkagalaya muyo mw'abandu. 20Abandi bandu abasaka, abatĩtawa omo malĩge aya mobataleka ebindu ebyo bakokotaya. Kandi mobataleka erĩramya esyombĩnga, n'esyosanamu sy'esyamagetsi, n'esyosanamu sy'ebĩtsĩpa, n'esy'omulinga, n'esy'amabwe, n'esy'emiti, esitetoka erilangira kutse erĩowa, kutse eribasula. 21Kandi abandu abo mobatabindula emitima yabo bakaleka ebibi byabo by'erĩĩta lyabo, kutse amalagu wabo, kutse erĩsĩngĩra lyabo, kutse obwĩbĩ bwabo.

will be added

X\