ERĨBĨSŨLĨRWA 8

1Neryo Ekyana ky'Embũlĩ kyabere kyatũa ekĩbohĩ ky'akalinda, mohahita ĩsyerere omo lubula oko mbindi y'esaa. 2Neryo monalangira abamalaĩka balinda abakahangana embere sya Nyamuhanga; nabo mobahabwa esyongubi sirinda. 3Neryo ogundi mũlaĩka mwasa mwa-hangana hakũhĩ n'ekiherero ĩnĩahambĩre ekibindi ky'esyamagetsi. Naye mwahabwa obukwa bunene atomekebo okw'isaba ly'abandu bosĩ ba Nyamuhanga oko kiherero ky'esyamagetsi, ekyabya embere w'ekĩtũmbĩ ky'obwami. 4Kandi omũkĩ w'obukwa mwahetuka embere sya Nyamuhanga haguma n'erisaba ly'abandu ba Nyamuhanga bĩkalũa omo byala by'omũlaĩka. 5Neryo omũlaĩka mwahamba ekibindi, kandi mũsũlyakyo omo muliro w'ekiherero, neryo mwagusakyo omo kihugo. Neryo emĩlũmo, n'emirenge, n'erĩpalya, n'omũsĩkĩ mobyakwamana. 6Nĩkwa abamalaĩka balinda ababya bawite esyongubi sirinda mobayĩtegekanĩa eribuha esyongubi. 7Neryo omũlaĩka w'erĩmbere mwabuha engubi yiwe. Neryo amatwa n'omuliro, ĩbĩtũlũngene n'omusasi, mobyaguswa omo kihugo. N'ekihande kiguma ky'omo bisatu ky'ekihugo mokyahya, n'ekiguma ky'omo bisatu ky'emiti mokyahya, n'ebiti bibisi byosĩ mobyahya. 8N'omũlaĩka w'akabiri mwabuha engubi yiwe. Neryo ekindu ekĩsosĩre ekitwa kinene ekikaka m'omuliro mokyaguswa omo ngetsi. N'ekiguma ky'omo bisatu ky'engetsi mokyahinduka musasi, 9n'ekiguma ky'omo bisatu ky'esyonyama esiriho omo ngetsi, mosyahola; n'ekiguma ky'omo bisatu ky'amato mokyaherĩbwa. 10Neryo omũlaĩka w'akasatu mwabuha engubi yiwe. Neryo engũnũnũ nene, eyikaka ng'olumole, moyatoga ĩkalũa elubula, moyatogera oko kiguma ky'omo bisatu ky'esyonyũsĩ, n'oko syongũnũnũko sy'amagetsi. 11Erĩna ly'engũnũnũ eyo ni Engalihira. N'ekiguma ky'omo bisatu ky'amagetsi mokyakaliha; kandi abandu bangi mobahola busana n'erĩpũlya amagetsi ayo, kusangwa abirikalĩhĩbwa. 12Neryo omũlaĩka w'akani mwabuha engubi yiwe. Neryo ekiguma ky'omo bisatu ky'eryuba, n'ekiguma ky'omo bisatu ky'omo mukera, n'ekiguma ky'omo bisatu ky'esyongũnũnũ mobyabandwako, kyaleka ekiguma ky'omo bisatu ky'erĩkolerya lyabo ikyabya mwĩrĩmya. Kandi ekiguma ky'omo bisatu ky'omusibo mokĩtakolerya, n'ekiguma ky'omo bisatu omo kiro mokyabya kitya. 13Neryo monalangira, kandi monowa erĩsamba likaguluka omo kyanya, erĩkabũga n'omulenge munene liti, Obũlĩge! Obũlĩge! Obũlĩge oko bĩkere omo kihugo busana n'eribuha ly'esyongubi sy'abamalaĩka basatu abakĩsĩya ibabuha esyongubi syabo!

will be added

X\