ERĨBĨSŨLĨRWA 7

1Enyũma w'aho monalangira abamalaĩka bani ibanimene oko nũnga ĩnĩ sy'ekihugo, ĩbakakakĩraya amahunga ani w'ekihugo, sihabye erihunga erikabuhirira oko kihugo, kutse oko ngetsi, kutse oko miti yosĩ. 2Kandi monalangira ogundi mũlaĩka akalũa eyo eryuba likahuluka, iniawite ekĩbohĩ kya Nyamuhanga oyuliho. Neryo mwabirikira omo mulenge munene oko bamalaĩka bani ababirihamulwa na Nyamuhanga erĩagalya ekihugo n'engetsi. 3Omũlaĩka oyo mwabũga ati, Sĩmwagalaye ekihugo, kutse ngetsi, kutse miti, tute twahĩra ekiminyikalo oko mbũmo sy'abagombe ba Nyamuhanga wetu. 4Kandi monowa emiganzo y'abo abahĩrawa kw'ekiminyikalo, ni elfu ĩgana, n'amakũmĩ ani n'ĩnĩ (144,000), bakalũa oko buli kihanda ky'abana ba Ĩsraelĩ. 5Oko kihanda kya Yũda habya elfu ĩkũmĩ n'ĩbĩrĩ (12,000) abasakawa kw'ekiminyikalo ekyo; n'oko kihanda kya Rũbenĩ, elfu ĩkũmĩ n'ĩbĩrĩ (12,000), n'oko kihanda kya Gadĩ, habya elfu ĩkũmĩ n'ĩbĩrĩ (12,000). 6N'oko kihanda kya Aserĩ, elfu ĩkũmĩ n'ĩbĩrĩ (12,000), n'oko kihanda kya Nafũtalĩ elfu ĩkũmĩ n'ĩbĩrĩ (12,000); n'oko kihanda kya Manase, elfu ĩkũmĩ n'ĩbĩrĩ (12,000); 7n'oko kihanda kya Sĩmeoni, elfu ĩkũmĩ n'ĩbĩrĩ (12,000); n'oko kihanda kya Lawĩ elfu ĩkũmĩ n'ĩbĩrĩ (12,000); n'oko kihanda kya Ĩsakarĩ elfu ĩkũmĩ n'ĩbĩrĩ (12,000); 8n'oko kihanda kya Zebũlũnĩ, elfu ĩkũmĩ n'ĩbĩrĩ (12,000); n'oko kihanda kya Yosefũ, elfu ĩkũmĩ n'ĩbĩrĩ (12,000); n'oko kihanda kya Benyamĩna, elfu ĩkũmĩ n'ĩbĩrĩ (12,000). 9Enyũma w'emyatsi eyĩ monalangira, neryo, lebaya, habya endeko nene, eyo mundu ate angatoka eriganza. Endeko eyĩ yalũa oko buli kĩtũnga, n'ebihanda byosĩ, n'abandu bosĩ, n'emĩbũge yosĩ. Babya bimene embere w'ekĩtũmbĩ ky'obwami, n'embere w'Ekyana ky'Embũlĩ, ibambite esyokanzu nyeru-nyeru, kandi ibawite oko mitahi y'amabondo omo byala byabo. 10Nabo mobabirikira omo mulenge munene bati, Erilama lyetu lĩkalũa uku Nyamuhanga wetu, oyo wĩkere oko kĩtũmbĩ ky'obwami, kandi lĩkalũa oko Kyana ky'Embũlĩ! 11Nĩkwa abamalaĩka bosĩ babya bimene ĩbakatĩmba oko kĩtũmbĩ ky'obwami, n'oko bakulu, n'oko bĩhangĩkĩrwe ebiriho bini. Neryo mobatũlama ahisi embere sy'ekĩtũmbĩ ky'obwami, mobaramya Nyamuhanga bati, 12Amina! omũyĩsa, n'olukengerwa, n'amenge, n'ewasĩngya, n'erĩsĩkya, n'obũtokĩ, n'amaka, bibye uku Nyamuhanga wetu kera na kera! Amina! 13Neryo omuguma g'oko bakulu mwanyĩbũlya ati, Abambite esyongimba nyeru-nyeru aba, ni bahi, kandi bakalũa hayi kwehĩ? 14Neryo monamubwira nyiti, Mukama wage, ũnasĩ. Neryo mwambwira ati, Aba ni bandu abakalũa omw'endererya lĩnene, ĩbabĩrĩerya esyokanzu syabo n'eriyirasyo mo nyeru-nyeru omo musasi w'Ekyana ky'Embũlĩ. 15Busana n'ekyo bakahangana embere sy'ekĩtũmbĩ ky'obwami kya Nyamuhanga, kandi bakamukolera omo musibo n'omo kiro omo Hekalũ yiwe. N'oyo wĩkere oko kĩtũmbĩ ky'obwami asyĩkala omo katĩkatĩ kabo. 16Kandi sĩbendĩsyakwa enzala, kutse enyota, kutse eryuba, kutse erĩhũhana sibyendisyahĩsyabo. 17Kusangwa, Ekyana ky'Embũlĩ oyuli omo katĩkatĩ k'ekĩtũmbĩ ky'obwami, asyabya mũlĩsya wabo, kandi asyasondolabo oko syongũnũnũko sy'amagetsi w'engebe; kandi Nyamuhanga asyasangula obuli mĩsonĩa oko meso wabo.

will be added

X\