ERĨBĨSŨLĨRWA 6

1Neryo monalangira Ekyana ky'Embũlĩ kĩkatwa ekiguma ky'oko bĩbohĩ birinda, kandi monowa ekiguma ky'ebĩhangĩkĩre bini kĩkabũga omo mulenge w'omũlũmo, kiti; Wase! 2Kandi monalangira, neryo lebaya, mohabya esabayĩrĩ nyeru-nyeru. N'oyo wĩkere kuyo iniawite oko buta, kandi mwahabwa embĩta. Nĩkwa mwahuluka ĩnĩakakĩnda, n'erisingula, 3Neryo Ekyana ky'Embũlĩ mokyatũa ekĩbohĩ ky'akabiri, neryo monowa ekĩhangĩkĩre ekiriho ky'akabiri kĩkabũga kiti, Wase! 4Neryo eyindi sabayĩrĩ y'olukula-kula moyahuluka. Nĩkwa oyo wĩkere kuyo, mwahabwa amaka w'erĩlũsya obuholo oko kihugo, abandu bĩtane, kandi mwahabwa omũyalĩ munene. 5Neryo Ekyana ky'Embũlĩ mokyatũa ekĩbohĩ ky'akasatu, neryo monowa ekĩhangĩkĩre ky'akasatu kĩkabũga kiti, Wase! Kandi monalangira, neryo lebaya, mohabya esabayĩrĩ eyĩkĩnĩre. N'oyo wĩkere kuyo iniawite olulengero omo byala biwe. 6Kandi monowa owali nga mulenge omo katĩkatĩ k'ebĩhangĩkĩre ebiriho bini, ati, Akalengĩ kaguma k'engano busana n'esyofranka ĩkũmĩ, n'otũlengĩ tusatu tw'ekisusu busana n'esyofranka ĩkũmĩ. Nĩkwa sĩmũtsandaye amagũta n'ebĩnyũ! 7Neryo Ekyana ky'Embũlĩ mokyatũa ekĩbohĩ ky'akani, neryo monowa omulenge w'ekĩhangĩkĩrwe ekiriho ky'ebini kiti, Wase! 8Neryo monalangira, nĩkwa talebaya, habya esabayĩrĩ y'ekigondo. N'oyo wĩkere kuyo erĩna liwe iyo Luholo, n'Ekũlĩmũ moyakwamalo hakũhĩ. Nabo mobahabwa ehamũlĩ oko kiguma ky'ebini by'ekihugo, erĩĩta omo mũyalĩ, n'omo nzala, n'omo syondwala, n'omo syonyama sĩkalĩre sy'ekihugo. 9Neryo Ekyana ky'Embũlĩ mokyatũa ekĩbohĩ ky'akatanu. Neryo monalangira eyĩkwa oko kiherero ebĩrĩmũ by'abandu abĩtawa busana n'ekĩnywa kya Nyamuhanga, kandi kusangwa batũla omwatsi wa Nyamuhanga. 10Neryo mobabirikira n'omulenge munene bati, Uwe Mukama, oyũbũyĩrĩre n'ow'ekwenene! Wasyalinda emigulu yingahi okw'itswera n'erĩkĩsya omusasi wetu ukw'abo bĩkere omo kihugo kwehĩ? 11Neryo obuli mundu wa kubo mwahabwa ekanzu nyeru-nyeru kandi mobabwirwa baluhuke akandi katambĩ, eriganza ly'abagombe balĩkyabo, n'abagala babo abakandĩsyĩtwa ngabo, lyasyabya lyahĩkana. 12Neryo monalangira Ekyana ky'Embũlĩ kĩkatũa ekĩbohĩ ky'endatu. Mohabya omũsĩkĩ munene, n'eryuba molyakĩna ng'olukimba l'obweya olũkĩnĩre, n'omukera gosĩ mwahinduka erisosa ng'omusasi. 13N'esyongũnũnũ sy'ekyanya mosyatogera oko kitaka, ng'omuti w'omũtĩnĩ kw'akatogaya ebĩgũma byago omo lihunga lĩkalĩre. 14N'ekyanya mokyasatika n'erĩlũaho ng'akaratasi akakalĩngawa. N'obuli kitwa, n'obuli kitsira mobyalũsĩbwa omo myanya yabyo. 15Neryo abami b'ekihugo, n'abandu bakulu, n'abandu abakasondola abasĩrĩkanĩ, n'abandu b'ebindu, n'esyombangĩ, n'obuli mukobe, n'obuli mundu w'obwĩranda, mobayĩbĩsa omo myangalũ n'omo katĩkatĩ k'amabwe w'ebitwa. 16Kandi mobabirikira oko bitwa n'amabwe bati, Mututogereko, mũtũbĩse oko meso ag'oyo wĩkere oko kĩrũmbĩ ky'obwami, n'okw'ihitana ly'Ekyana ky'Embũlĩ! 17Kusangwa ekiro kinene ky'erihitana lyabo kyabĩrĩhĩka, kandi nindi wangatoka erihanganaho kwehĩ?

will be added

X\