ERĨBĨSŨLĨRWA 4

1Enyũma w'emyatsi eyĩ, neryo lebaya, monalangira olũyĩ lukingukere elubula. N'omulenge ogo nowa erĩmbere, owali ng'omulenge w'engubi akabũga nage, mwabũga ati, Wase endata eno, nage ngandĩkũkangya ebitolere ĩbyahĩka enyũma w'emyatsi eyĩ. 2Neryo-neryo Omũlĩmũ mwambĩkako. Kandi lebaya, habya ekĩtũmbĩ ky'obwami eyo elubula, kandi habya Oyo wĩkere oko kĩtũmbĩ ky'obwami ekyo. 3N'oyo wabya wĩkere kukyo abya akangabasenĩe ng'erĩbwe ly'eYaspĩ n'erĩbwe ly'eSardĩo. Kandi habya ekima ekĩsosĩre ng'erĩbwe ly'eZũmarĩdĩ ĩkĩtĩmbĩre oko kĩtũmbĩ ekyo ky'obwami. N'erĩtĩmba oko kĩtũmbĩ ky'obwami ekyo, habya ebindi bĩtũmbĩ by'obwami amakũmĩ abiri n'ebini. 4N'oko bĩtũmbĩ ebyo monalangira abakulu makũmĩ abiri n'abani ĩbĩkereho, ibambite esyongimba nyeru-nyeru, n'esyombĩta sy'esyamagetsi syabya oko mitwe yabo. 5Neryo erĩpalya ly'akarabyo, n'emirenge, n'emĩlũmo mobyalũa oko kĩtũmbĩ ky'obwami ekyo. Kandi habya esyotala sy'omuliro esikaka embere sy'ekĩtũmbĩ ky'obwami. Esyotala esyo nĩ Mĩrĩmũ irinda ya Nyamuhanga. 6Neryo embere w'ekĩtũmbĩ ky'obwami habya ekĩsosĩre ng'engetsi ey'ekiyo ng'erĩbwe erilabangene mw'ameso. Kandi omo katĩkatĩ k'ekĩtũmbĩ ky'obwami n'erĩtĩmba kukyo habya ebĩhangĩkĩre bini ebyoswĩre n'ameso embere n'enyũma. 7N'ekĩhangĩkĩre eky'erĩmbere kyabya kĩsosĩre endale, n'ekĩhangĩkĩre ky'akabiri kyabya kĩsosĩre enyana, n'ekĩhangĩkĩre ky'akasatu kyabya kiwite obũsũ ng'obw'omundu, n'ekĩhangĩkĩre ky'akani kyabya kĩsosĩre erĩsamba erikaguluka. 8Obuli ekĩhangĩkĩre oko bĩhangĩkĩre bini ebiriho ikiwite ebĩpũpa ndatu, n'ebĩhangĩkĩre ebĩ ĩbyoswĩre n'ameso ehosĩ n'oko mbande syosĩ. Kandi omo musibo n'omo kiro sĩbalĩũmbaya erĩbũga bati, Omukama Nyamuhanga, Omũtokĩ W'ebyosĩ, Abũyĩrĩre, abũyĩrĩre, abũyĩrĩre, Oyutula, n'oyuliho, n'oyukandisyasa. 9N'omugulu ebĩhangĩkĩre ebiriho bini bikaha olukengerwa, n'erĩsĩkya, n'ewasĩngya oko yo wĩkere oko kĩtũmbĩ ky'obwami, n'oko yukakota kera na kera, 10abakulu amakũmĩ abiri n'abani bakatũlama embere sy'oyo wĩkere oko kĩtũmbĩ ky'obwami, kandi bakaramaya oyukakota kera na kera. Kandi bakagusa esyombĩta syabo embere w'ekĩtũmbĩ ky'obwami ekyo, bati, 11Omukama wetu na Nyamuhanga wetu! Uwe utolere eribana olukengerwa, n'erĩsĩkya, n'obũtokĩ, Kusangwa wahangika ebindu byosĩ, Kandi busana n'erisonda lyawe mobyabyaho kandi mobyahangikwa.

will be added

X\