ERĨBĨSŨLĨRWA 3

1Kandi usake oko mũlaĩka w'ekanĩsa y'eSardĩ uti, Oyuwite Emĩrĩmũ irinda ya Nyamuhanga n'esyongũnũnũ sirinda, akabũga ebĩnywa ebĩ ati, Nyĩnasĩ emĩbĩrĩ yawe, kandi nyĩnasĩ ambu uneho, nĩkwa ĩgũholĩre! 2Ubuke, ũsĩkaye emyatsi eyĩkĩsĩya, eyikasonda erihola. Kusangwa namabana emĩbĩrĩ yawe sĩrĩtahĩkana omo meso wa Nyamuhanga wage. 3Neryo wibuke ebyo wangirira, n'ebyo wowa, neryo ukwamebyo, ubindule omutima wawe uleke ebibi. Nĩkwa wamatindabuka, nasyakũhĩkako ng'omũrahĩ, isiwendisyaminya endambĩ nasyakũhĩkako. 4Nĩkwa munawite abandu bake eSardĩ, abatatsandĩrye esyongimba syabo. Aba basyalendera nage omo syongimba nyeru-nyeru, kusangwa batolere. 5Oyũkakĩnda asyambalĩbwa esyongimba nyeru-nyeru, kandi sindiendisyasangula erĩna liwe omo kitabu ky'engebe. Nasyakangya erĩna liwe embere sya Tata wage, n'abamalaĩka buwe. 6Oyuwite amatwĩ, owe ebyo Mũlĩmũ akabũga n'esyokanĩsa. 7Usake oko mũlaĩka w'ekanĩsa y'eFĩladelfĩa, uti, Oyuli mũbũyĩrĩre, n'oyuli kwenene, oyuwite ekifungulo kya Dawĩdĩ, n'oyukakingula, isihali oyo wasyakingaho, n'oyukakinga, isihali omundu oyukakingula, akabũga ebĩnywa ebĩ ati, 8Nyĩnasĩ emĩbĩrĩ yawe. Lebaya, nabĩrĩhĩra embere syawe olũyĩ lũkĩngwĩre, isihali mundu wangatoka erikingalo, kusangwa uwite amaka make, kandi wabĩrĩteya ekĩnywa kyage, isulitagana erĩna lyage. 9Lebaya! Endeko eyo ye nyũmba y'erĩhĩndanamo ya Satanĩ, ababehĩ abo, abakayahula mo Bayũda, nĩkwa isibo, lebaya, nasyaleka ibasa n'erĩũnama n'erĩramya embere sy'ebisando byawe, baminye ko nyĩkwanzĩre. 10Kusangwa wabĩrĩteya ekĩnywa ky'eriyitsingirira lyage, nage nasyakũteya oko ndambĩ y'erirengwako, kandi nasyakũteya nibya oko ndambĩ eyikandisyasa oko kihugo kyosĩ, erirenga bandu bosĩ abĩkere omo kihugo. 11Ngandiasa lũba! Muhambe ndeke ebyo muwiteko, sihabye omundu oyukahunga embĩta yawe. 12Oyukakinda, nasyamuyira mo ndũyĩ y'omo Hekalũ ya Nyamuhanga wage, kandi isiendĩsyalũamo kera na kera. Kandi nasyamusaka kw'erĩna lya Nyamuhanga wage, n'erĩna ly'omũyĩ wa Nyamuhanga wage, go mũyĩ w'eYerũsalema muhya-muhya, owakandisyandagala akalũa elubula uku Nyamuhanga wage. Kandi nasyamusakako erĩna lyage lihya-lihya. 13Oyuwite amatwĩ, owe ebyo Mũlĩmũ akabũga n'esyokanĩsa! 14Usake oko mũlaĩka w'ekanĩsa y'eLaodĩkĩa, uti, Amina oyo, Omũlangĩrĩ oyuteregula n'ow'ekwenene, Enzũko y'erihangika lya Nyamuhanga, akabũga ebĩnywa ebĩ ati, 15Nyĩnasĩ emĩbĩrĩ yawe, nyĩnasĩ sĩgũhũhĩrĩre, kutse sĩgũhũhene. Kumbe gũhũhĩrĩre kutse kumbe gũhũhene! 16Neryo kusangwa uli kange-kange, ĩsĩgũhũhene, kutse ĩsĩgũhũhĩrĩre, nasyakũgũmũla omo buno bwage! 17Kusangwa ũkabũga uti, Nyiwite ebindu, nabiribya muteke, sihali ekyo ngabula. Sĩwasĩ k'uli muhanya, n'ow'obũlĩge, n'omwera, n'endĩmatĩme n'endũmbũ. 18Neryo ngakuhana unguleko esyamagetsi, esyabĩrĩlabĩbwa omo muliro, iwatoka eribya muteke. Ugule nibya esyongimba nyeru-nyeru, iwatoka eriambalasyo, n'esĩsonĩ sy'endũmbũ yawe isitaminyikala. Kandi ugule amagũta w'ameso aw'erĩsĩgĩsa omo meso wawe, iwatoka erilangira. 19Ngakunga n'erisuyira abosĩ abo nyanzĩre. Neryo ubye n'omũhwa, ubindule omutima wawe erireka ebibi. 20Lebaya! Nyinimene oko lũyĩ n'erikongota; omundu amowa omulenge wage, akakingula olũyĩ, nasyingira omo nyũmba yiwe, nasyalya haguma naye, naye asyalya haguma nage. 21Oyũkakĩnda, nasyamuha ehamũlĩ erĩĩkala haguma nage oko kĩtũmbĩ kyage ky'obwami, ngoko nĩkala haguma na Tata wage oko kĩtũmbĩ kiwe ky'obwami. 22Oyuwite amatwĩ w'erĩowa, owe ebyo Mũlĩmũ akabũga n'esyokanĩsa.

will be added

X\