ERĨBĨSŨLĨRWA 22

1Kandi omũlaĩka mwanyĩkangya olũsĩ lw'amagetsi w'engebe, olũkangabasenĩe ng'ekiyo, olukahuluka omo kĩtũmbĩ ky'obwami kya Nyamuhanga, n'eky'Ekyana ky'Embũlĩ, 2kandi olũsĩ lukasenda omo katĩkatĩ k'enzira y'omũyĩ. N'oko mĩsĩke ĩbĩrĩ y'olũsĩ olo habya omuti w'engebe, owakahetaya ebĩgũma mĩsĩndo ĩkũmĩ n'ĩbĩrĩ. Omuti oyo akahetaya ebĩgũma byago obuli mukera, n'ebikoma by'omuti oyo nĩ by'erĩlamya ebihanda. 3Kandi sihendisyaswabya eritakira omo mũyĩ oyo. Ekĩtũmbĩ ky'obwami kya Nyamuhanga n'eky'Ekyana ky'Embũlĩ kyasyabya omo mũyĩ oyo, n'abagombe buwe basyamũramya. 4Basyalola oko bũsũ buwe, n'erĩna liwe lyasyabya oko mbũmo syabo. 5Neryo sĩbwendĩsyĩra kandi eyo, kandi sibendisyabya n'obwaga bw'ekyakakala ky'etala, kutse ekyakakala ky'eryuba, kusangwa Omukama Nyamuhanga asyakoleryabo, basyatabala kera na kera. 6Neryo omũlaĩka mwambwira ati, Ebĩnywa ebĩ ni by'eriyiketerwa, kandi ni by'ekwenene. Omukama Nyamuhanga, oyukaha Omũlĩmũ wuwe oko bamĩnyererĩ, mwatuma omũlaĩka wuwe erĩkangya abagombe buwe emyatsi eyĩkandĩsyahĩka lũba. 7Neryo Yesu ati, Lebaya! Ngasa lũba! Obutseme buli oko bakategaya ebĩnywa by'eriminyerera by'ekitabu ekĩ! 8Neryo nĩ ngye Yoane, oyo wowa n'erilangira emyatsi eyĩ. Kandi omugulu nowa n'erilangira emyatsi eyĩ, monatũlama ahisi hakũhĩ n'ebisando by'omũlaĩka oyo wanyĩkangaya emyatsi eyĩ, erĩmũramya. 9Nĩkwa mwambwira ati, Sukole utya! Ĩngye indi mugombe mũlĩkyenyũ n'oko bagala benyũ abamĩnyererĩ, n'oko bosĩ abo bakakwama ebĩnywa by'ekitabu ekĩ. Ũramaye Nyamuhanga! 10Neryo mwambwira ati, Subohe ebĩnywa by'eriminyerera by'ekitabu ekĩ, kusangwa endambĩ iri hakũhĩ y'eribererera ly'emyatsi eyĩ. 11Oyukakola nabi, akole nabi; n'oyũtĩsĩrĩre, ayĩtsandaye; n'oyutunganene, akole ebitunganene, n'oyuli mũbũyĩrĩre, ayĩtegaye abye mũbũyĩrĩre. 12Kandi Yesu ati, Lebaya! Ngasa lũba! Nasyaleta ebihembo byage haguma nage, eririha obuli mundu ngoko abirikola. 13Ĩngye indi Alfa na Omega, ow'erĩmbere, n'ow'enyũma, enzũko n'endũlĩ. 14Obutseme buli ukw'abo abakeraya esyokanzu syabo ibatoka eribya n'ehamũlĩ oko muti w'engebe, n'ehamũlĩ y'erilaba omo syongyo sy'omũyĩ oyo. 15Nĩkwa eyĩhya oko mũyĩ hali esyombwa, n'abakũmũ, n'abasĩngĩrĩ, n'abĩtĩ, n'abakasaba esyosanamu, n'abosĩ abakabiha, n'abakakola eby'amabehĩ. 16Ĩngye Yesu nabirituma omũlaĩka wage n'erĩbatũlĩra emyatsi eyĩ busana n'esyokanĩsa. Ĩngye indi Mũlĩhĩ n'Omwana w'ekĩtũnga kya Dawĩdĩ. Ĩngye indi ngũnũnũ eyikaka omo ngyakya-ngyakya. 17Omũlĩmũ, n'omũherũkĩ, bakabũga bati, Mwase! N'oyũkowa akabũga ati, Mwase! N'oyũkwĩre enyota ase, n'oyo wanzĩre, ĩmaye amagetsi w'engebe butsira erigula. 18Ĩngye Yoane, ngabwira abosĩ abakowa ebĩnywa by'eriminyerera ly'ekitabu ekĩ nyiti, Omundu amatomeka kubyo kw'ebindi, Nyamuhanga asyamutomeka kw'amalĩge awasakĩre omo kitabu ekĩ. 19Kandi omundu amalũsya oko bĩnywa by'ekitabu ky'eriminyerera erĩ, Nyamuhanga asyalũsya ekihande kiwe oko muti w'engebe, n'ekihande kiwe oko mũyĩ abũyĩrĩre, ebĩsakĩre omo kitabu ekĩ. 20Oyũkatũla emyatsi eyĩ ati, Ega! Ngasa lũba! Amina! Omukama Yesu, wase! 21Olukogo lw'Omukama Yesu lubye nenyũ ĩnywe bosĩ. Amina.

will be added

X\