ERĨBĨSŨLĨRWA 21

1Neryo monalangira olubula luhya-luhya n'ekihugo kihya-kihya, kusangwa olubula lw'erĩmbere n'ekihugo ky'erĩmbere mobyalenga, n'engetsi isiyikiriyo. 2Nage monalangira omũyĩ abũyĩrĩre, eYerũsalema, omũyĩ muhya-muhya, akandagala akalũa elubula ewa Nyamuhanga, ĩnĩabĩrĩyĩtegekanĩa ng'omũherũkĩ oyũyĩsũgĩre busana n'ĩba wuwe. 3Kandi monowa omulenge akalũa oko kĩtũmbĩ ky'obwami ati, Lebaya! eHema ya Nyamuhanga iri omo katĩkatĩ k'abandu! Naye asyĩkala haguma nabo, basyabya bandu buwe. Kandi Nyamuhanga ĩyowene asyabya haguma nabo, n'eribya Nyamuhanga wabo. 4Nĩkwa asyasangula emĩsonĩa yosĩ oko meso wabo. Kandi oluholo silwendisyaswabyaho, erĩsũsũmana kutse eririra, kutse eriagalwa. Emyatsi y'erĩmbere yabirirenga. 5N'oyo wĩkere oko kĩtũmbĩ ky'obwami mwabũga ati, Lebaya! Lino ngayira emyatsi yosĩ mo mihya-mihya. Neryo mwabũga ati, Usake ebĩ kusangwa ebĩnywa ebĩ ni by'eriyiketera n'eby'ekwenene. 6Kandi mwabũga ati, Byamakoleka! Ĩngye indi Alfa na Omega, erĩtsũka n'endũlĩ. Oyũkwĩre enyota nasyamuha oko magetsi w'engũnũnũko y'amagetsi w'engebe butsira erigula. 7Oyũkakĩnda nasyamuha emyatsi eyĩ: Nasyabya Nyamuhanga wuwe, naye asyabya mugala wage. 8Nĩkwa abuba, n'abatĩkĩrĩrye, n'ab'esyonye, n'abĩtĩ, n'abasĩngĩrĩ, n'abakũmũ, n'abakasaba esyosanamu, n'ababehĩ, omwanya wabo asyabya omo ngetsi eyikaka n'omuliro n'ekirimi, olo lo luholo lw'akabiri. 9Neryo omuguma w'oko bamalaĩka balinda ababya bawite ebibindi birinda ebyoswĩre mw'amalĩge alinda w'enyũma-nyũma mwambĩkako, mwakanĩa nage ati, Wase hano, ngandĩkũkangya omũherũkĩ, omũkalĩ w'Ekyana ky'Embũlĩ. 10Neryo omũlaĩka mwanyitwala omo Mũlĩmũ oko kitwa kinene kiri-kiri, mwanyĩkangya omũyĩ abũyĩrĩre, ye Yerũsalema, owakandagala akalũa elubula ewa Nyamuhanga. 11Omũyĩ oyo mwakangabasanĩa omo lukengerwa lwa Nyamuhanga. Erĩkangabasanĩa lyago lyabya lĩsosĩre erĩbwe ly'obũgũlĩ bunene, ng'erĩbwe erĩhenĩrye, ly'eYaspĩ ng'ekĩraũlĩ. 12Omũyĩ oyo abya awite ekĩyĩte kinene kiri-kiri, n'esyonyũyĩ erĩkũmĩ n'esĩbĩrĩ, n'oko syonyũyĩ esyo habya abamalaĩka erĩkũmĩ n'ababiri. Kandi oko syonyũyĩ habya hasakĩre amena w'ebihanda erĩkũmĩ n'ebibiri bya Ĩsraelĩ. 13Kandi habya esyonyũyĩ ĩsatu oko luhande lw'eyo ryuba likasira, n'esyonyũyĩ ĩsatu elutambi lw'endata, n'esyonyũyĩ ĩsatu elutambi lw'eyĩkwa, n'esyonyũyĩ ĩsatu eluhande lw'eyĩkwa. 14Ekĩyĩte ekyo ky'omũyĩ kyabya kĩhĩmbĩre omo mabwe ĩkũmĩ n'awabiri, awasakĩre kw'amena ĩkũmĩ n'abiri w'abakwenda erĩkũmĩ n'ababiri b'Ekyana ky'Embũlĩ. 15N'omũlaĩka oyo wabya akabũga nage abya n'olulengo lw'esyamagetsi busana n'erirenga omũyĩ oyo, n'erirenga esyonyũyĩ syago, n'ekĩyĩte kyago. 16Nĩkwa omũyĩ oyo inialingirirene oko syombande syosĩ, obuli bwago inialingirirene n'obugali bwago. Neryo omũlaĩka mwalenga omũyĩ omo lulengo luwe. Obuli bwago bwabya ebilometere elfu ĩbĩrĩ n'amagana ani (2400). Obuli bwago n'obugali bwago, n'obuli bwago bw'endata ibiringirirene. 17Kandi omũlaĩka oyo mwalenga ekĩyĩte kyago ini metere makũmĩ alinda omo buli bw'endata, ng'olulengo abandu bakalengamo, kandi ini lulengo lw'abamalaĩka nibya. 18Ekĩyĩte ekyo kyabya ky'amabwe w'eYaspĩ, n'omũyĩ abya w'esyamagetsi nyibuya, esĩhenĩrye ng'ekĩraũlĩ. 19Amabwe w'ekibanza ky'ekĩyĩte ky'omũyĩ abya abambĩre kw'amabwe w'emĩsĩndo yosĩ y'obũgũlĩ bunene. Erĩbwe ly'erĩtsũka ly'ekibanza lyabya Yaspĩ. Ery'akabiri lyabya Safĩro, n'ery'akasatu lyabya Kaledonĩ, n'ery'akani lyabya ly'eZũmarĩdĩ. 20Ery'akatanu ly'eSadonĩkĩ, ery'endatu ly'eSardĩo, n'ery'akalinda ly'eKrĩsolĩto, n'ery'omunani ly'eBerĩlo, n'ery'omwenda ly'eTopazĩo, n'ery'erĩkũmĩ ly'eKrĩsopũraso, n'ery'erĩkũmĩ n'eriguma ly'eHaĩkĩnto, n'ery'erĩkũmĩ n'awabiri ly'eAmazĩsĩto. 21Kandi esyonyũyĩ erĩkũmĩ n'esĩbĩrĩ syabya lulu ĩkũmĩ n'ĩbĩrĩ, obuli lũyĩ lwabya lũkalũa mo lulu nguma. Neryo embalu y'omũyĩ yabya y'esyamagetsi nyibuyabuya, ng'ekiyo ekikalabangana mw'ameso. 22Nĩkwa mondalangira eHekalũ omo mũyĩ oyo, kusangwa Omukama Nyamuhanga, Omũtokĩ W'ebyosĩ, n'Ekyana ky'Embũlĩ bo Hekalũ y'omũyĩ oyo. 23Kandi omũyĩ oyo siali n'obwaga bw'eryuba kutse omukera by'erĩkolerya mugo, kusangwa olukengerwa lwa Nyamuhanga lũkakolerayago n'etala yago ni Kyana ky'Embũlĩ. 24Nĩkwa ebihanda, byasyalendera omo kyakakala kyago, n'abami b'ekihugo basyaleta olukengerwa lwabo mugo. 25Neryo esyongyo sy'omũyĩ sĩsyendisyakingwa na kera omugulu bũnalolĩre, kandi eyo sĩbwendĩsĩra. 26Nĩkwa erĩkangabasania n'erĩsĩkya ly'ebihanda byasyaletwa omo mũyĩ oyo. 27Kandi sihali ekĩtĩsĩrĩre, kutse omundu oyukakola esyonye, kutse oyukabiha. Nĩkwa ba n'abandu amena wabo awasakĩre omo kitabu ky'engebe ky'Ekyana ky'Embũlĩ, basyingira omo mũyĩ oyo.

will be added

X\