ERĨBĨSŨLĨRWA 20

1Neryo monalangira omũlaĩka akandagala akalũa elubula, iniawite ekifungulo ky'obuhya, n'obuhulula bunene omo byala biwe. 2Neryo mwatsimba ekiyoka ekyo, enzoka eyo ya kera, oyuli Dĩabolo n'eSatanĩ, neryo mwabohayo oko myaka elfu nguma (1000). 3Kandi mwagusayo omo buhya obutawite kabuno, neryo mwalĩba obuhya obo n'erĩhĩra kubo kw'omuwato, siyitebe ebihanda kandi erĩhĩka aho emyaka elfu nguma (1000) ikahwera. Enyũma w'emyatsi eyĩ yasyaboholwa katambĩ kake. 4Neryo monalangira ebĩtũmbĩ by'obwami, n'ababya bĩkere kubyo, kandi, mobahabwa ehamũlĩ y'eritswera. Monalangira nibya ebĩrĩmũ by'abandu abatwĩbawa kw'emitwe busana n'erĩtũla omwatsi wa Yesu, kandi busana n'ekĩnywa kya Nyamuhanga. Mobataramya enyama eyo kutse esanamu eyo, kandi mobatahĩrwa kw'olusako lw'enyama eyo oko mbũmo syabo kutse oko byala byabo. Mobasuba n'eribyaho n'eritabala haguma na Kristo emyaka elfu nguma (1000). 5Abandi baholĩ mobatasuba erĩhĩka aho emyaka elfu nguma (1000) iteyahwa. Erĩ nĩ 'lũbũka ly'erĩmbere. 6Omundu oyukasangira omw'ĩlũbũka ly'erĩmbere ni w'obutseme kandi abiritsumulwa kutsibu. Oluholo lw'akabiri silukiri n'obũtokĩ kubo, nĩkwa basyabya bahererĩ ba Nyamuhanga na Kristo, kandi basyatabala haguma naye emyaka elfu nguma (1000). 7Neryo emyaka elfu nguma yamabihwa, Satanĩ yasyaboholwa omo mũlĩkĩ wayo. 8Neryo yasyahuluka eriteba ebihanda ebiri omo kihugo kyosĩ, byo Gogĩ na Magogĩ. Satanĩ yasyahĩndanĩabyo omo malwa; emiganzo yabo iri ng'omusege w'omo ngetsi. 9Mobayisanza omo kihugo, n'erĩtĩmba oko kilaliriro ky'abandu ba Nyamuhanga, n'omũyĩ owanzĩrwe. Nĩkwa omuliro mwandagala akalũa elubula n'erĩtogotyabo. 10Neryo Dĩabolo oyo watebabo mwaguswa omo ngetsi y'omuliro n'obũsĩngo, aho enyama eyo n'omũmĩnyererĩ w'amabehĩ bagusawa; basyagalwa omo musibo n'omo kiro kera na kera. 11Neryo monalangira ekĩtũmbĩ ky'obwami kinene kyeru-kyeru, n'oyo wĩkere kukyo. Neryo ekihugo n'olubula mobyasaga obũsũ buwe, kandi omwanya mwataswabanika busana nabyo. 12Kandi monalangira abaholĩ, abakulu-bakulu n'abake-bake, ibahangene embere w'ekĩtũmbĩ ky'obwami; n'ebitabu mobyasanzulwa. N'ekindi kitabu mokyasanzulwa, kye kitabu ky'engebe. Neryo abaholĩ mobatswerwa omo myatsi eyĩsakĩre omo bitabu ngoko emĩbĩrĩ yabo yabya. 13Neryo engetsi moyahũlũkya abaholĩ ababya muyo. N'oluholo n'Ekũlĩmũ mobyahũlũkya abaholĩ ababya mubyo. Kandi abosĩ mobatswerwa g'emĩbĩrĩ yabo ko yabya. 14Neryo oluholo n'Ekũlĩmũ mobyaguswa omo ngetsi y'omuliro. Oluholo lw'akabiri olũ, ye ngetsi y'omuliro. 15Kandi omundu oyutawite erĩna lĩsakĩre omo kitabu ky'engebe, mwaguswa omo ngetsi y'omuliro.

will be added

X\