ERĨBĨSŨLĨRWA 2

1Usake oko mũlaĩka w'ekanĩsa y'eEfeso uti, Oyũhambĩre esyongũnũnũ sirinda omo byala biwe by'amali, n'oyukalendera omo katĩkatĩ k'emitagala irinda y'esyamagetsi, akabũga ebĩnywa ebĩ ati, 2Nyĩnasĩ emĩbĩrĩ yawe, n'erinuba lyawe, n'eriyibombeka lyawe. Nyĩnasĩ ko gũterĩga abandu babi, kandi wabirirenga oko bandu abakayahula mo bakwenda, nĩkwa isi bakwenda, iwabiribanabo mo babehĩ. 3Kandi ukayitsingirira ĩgũkayĩyĩnaya busana n'erĩna lyage, isulitaluha. 4Nĩkwa ngakukunga oko mwatsi muguma nyiti, Sũkĩnyanzĩre lino ng'erĩmbere. 5Wibuke aho watogera! Ubindule omutima, uleke ebibi byawe, ukole ngoko wabya ukakola erĩmbere. Bite bitya, nasyakũhĩkako, ĩnalũsya omutagala wawe w'aho wago, wamatindabindula omutima wawe n'erireka ebibi byawe. 6Nĩkwa ekiguma uli nakyo uti, ũkakwa obusu oko mĩbĩrĩ mibi y'Abanĩkolayĩ, nage ngakwayo obusu nibya. 7Oyuwite amatwĩ owe ebyo Mũlĩmũ akabwira esyokanĩsa! Oyũkakĩnda, nasyamuha ehamũlĩ y'erirya oko bĩgũma by'omuti w'engebe, owakalasa omo Paradĩso, y'eririma lya Nyamuhanga. 8Kandi usake oko mũlaĩka w'ekanĩsa y'eSmũrna uti, Ow'erĩtsũka n'ow'enyũma, oyo wahola, kandi abiriswabyaho, akabũga ebĩnywa ebĩ ati, 9Nyĩnasĩ amalĩge wawe n'obwera bwawe, nĩkwa uli w'ebindu. Nyĩnasĩ ebĩtsũmĩ by'abakayahula mo Bayũda, nĩkwa isibo, nĩkwa ni b'enyũmba y'erĩhĩndana ly'eSatanĩ. 10Sigubahe ebĩkandĩsyakwagalya. Lebaya! Satanĩ ikasonda erigusa abandi b'ũkw'ĩnywe b'omo mũlĩkĩ, mulengaweko, kandi mwasyagalwa ebiro ĩkũmĩ. Ubye n'obutalegula erĩhĩka oko luholo, nage nasyakuha embĩta y'engebe. 11Oyuwite amatwĩ owe ebyo Mũlĩmũ akabwira esyokanĩsa! Oyũkakĩnda siendĩsyahũtalĩbwa n'oluholo lw'akabiri. 12Kandi usake oko mũlaĩka w'ekanĩsa y'ePergamo uti, Oyuwite omũyalĩ owatwĩre, ow'amoya abiri, akabũga ebĩnywa ebĩ ati, 13Nyĩnasĩ aho wĩkere aho Satanĩ awite ekĩtũmbĩ kiwe ky'obwami. Nyĩnasĩ ko gũkasĩma erĩna lyage, kandi sulitaleka erĩnyĩkĩrĩrya omo biro bya Antĩpa omũtũlĩ w'omwatsi wage, omundu wage oyuteregula, oyo wĩtĩrawa omo katĩkatĩ kenyũ aho Satanĩ ĩkere. 14Nĩkwa ngakukunga oko yindi myatsi mike, nyiti, uwite haguma nawe abakakwama erĩkangĩrĩrya lya Balama, oyo wakangĩrĩraya Balaka ngoko angaleka abandu ba Israelĩ erikola ebibi, balye akalyo akaherawa oko syosanamu, n'erĩsĩngĩra. 15Kandi, unawite n'abandi nibya abakakwama erĩkangĩrĩrya ly'Abanĩkolayĩ. 16Neryo ubindule omutima wawe uleke erikola ebibi! Bite bitya ngasyakũhĩkako lũba n'erilwa nabo omo mũyalĩ w'obuno bwage. 17Oyuwite amatwĩ, owe ebyo Mũlĩmũ akabwira esyokanĩsa! Oyũkakĩnda, nasyamuha oko mana awabĩsĩre. Kandi nasyamuha erĩbwe lyeru-lyeru, erĩsakĩreko erĩna lihya-lihya, erĩtasĩbwe n'omundu yo n'oyukangiriralyo. 18Kandi usake oko mũlaĩka w'ekanĩsa y'eTũatera uti, Omugala wa Nyamuhanga, oyuwite ameso awasosĩre ebirimi by'omuliro, n'ebisando biwe biringene n'omulinga w'enduku, akabũga ebĩnywa ebĩ ati, 19Nyĩnasĩ emĩbĩrĩ yawe, n'olwanzo lwawe, n'erĩkĩrĩrya lyawe, n'erikola lyawe, n'eriyitsingirira lyawe. Kandi nyĩnasĩ ukakola lino kwilaba erĩmbere. 20Nĩkwa ngakukunga oko mwatsi oyũ nyiti, Ũkalĩga omũkalĩ oyo ye Yezebele oyukayahula mo mũmĩnyererĩ w'obũkalĩ, kandi akakangĩrĩraya n'erĩtalya abagombe bage erikola erĩsĩngĩra n'erirya akalyo akakahererawa esyosanamu. 21Nabirimuha omugulu w'eribinduka n'erireka ebibi biwe, nĩkwa sĩanzĩre eribinduka erireka erĩsĩngĩra liwe. 22Lebaya! Nasyamugusa oko ngyingo aho, iye n'abakasĩngĩra haguma naye basyagalwa omo malĩge manene, bamatindabinduka erireka ebibi bakola naye. 23Kandi nasyĩta abana buwe omo kasũsũ. Neryo esyokanĩsa syosĩ syasyaminya ko ndi oyukasonda-sonda amalengekanĩa n'emitima. Nasyaha obuli mundu ũkw'ĩnywe ng'emĩbĩrĩ yiwe ko yiri. 24Nĩkwa ngababwira, ĩnywe bandi, abali eTũatera, abatakwamĩrĩre erĩkangĩrĩrya erĩ, abatasĩ ebyo abandi bakahula erĩkũmbo lya Satanĩ erĩkalĩre, nyiti sindiendĩsyahĩra eyindi miheke ũkw'ĩnywe. 25Nĩkwa muhambe ndeke ebyo muwite erĩhĩka aho nasyasira. 26N'oyũkakĩnda n'oyukakola emĩbĩrĩ yage erĩhĩka oko ndũlĩ, nasyamuha ehamũlĩ eritabala oko Bihanda. 27Kandi asyatabala kubo omo mũtso w'ekyuma, n'eritulangabo mo bitswe-bitswe ng'esyonyungu sy'omũbũmbĩ, ngoko nage nabirihamulwa na Tata wage. 28Kandi nasyamuha engũnũnũ y'omo ngyakya-ngyakya. 29Oyuwite amatwĩ, owe ebyo Mũlĩmũ akabwira esyokanĩsa!

will be added

X\