ERĨBĨSŨLĨRWA 19

1Enyũma w'emyatsi eyĩ, monowa ng'omulenge munene w'endeko nene omo lubula ati, Mupipe Nyamuhanga! Erilama, n'olukengerwa, n'obũtokĩ, ni bya Nyamuhanga wetu! 2Eritswera liwe ni ry'ekwenene, kandi ritunganene! Kusangwa abiritswera omũmalaya mukulu oyo watsandaya ekihugo omw'ĩsĩngĩra liwe. Kandi Nyamuhanga abĩrĩkĩsya omusasi w'abagombe buwe ukw'iye. 3Neryo engendo y'akabiri mobabũga, bati, Mupipe Nyamuhanga! Omũkĩ w'omũyĩ oyo akahetuka endata kera na kera! 4Kandi abakulu makũmĩ abiri n'abani, n'ebĩhangĩkĩrwe ebiriho bini mobatũlama ahisi mobaramya Nyamuhanga oyo wĩkere omo kĩtũmbĩ ky'obwami bati, Amina! Mupipe Nyamuhanga! 5Neryo omulenge mwalũa oko kĩtũmbĩ ky'obwami ati, Mupipe Nyamuhanga wetu, ĩnywe bagombe buwe bosĩ, n'abandu bosĩ abakulu n'abake-bake, abakamupipa! 6Neryo monowa omulenge ng'ow'endeko nene, kandi ng'omulenge w'erihuha ly'ekisalala, kandi ng'emĩlũmo minene-minene, iti, Mupipe Nyamuhanga! Kusangwa Omukama Nyamuhanga wetu Omũtokĩ W'ebyosĩ, akatabala. 7Tutseme, tutsange, tumuhe olukengerwa! Kusangwa erĩherũkya ly'Ekyana ky'Embũlĩ lyabĩrĩhĩka, n'omũherũkĩ wuwe abĩrĩyĩtegekanĩa. 8Kandi abirihabwa erĩambalĩbwa ekĩtanĩ kĩbũyahĩre, ekĩkangabasenĩe, n'ekibuya. Kusangwa ekĩtanĩ kĩbũyahĩre ekyo nĩ mĩbĩrĩ itunganene y'abandu ba Nyamuhanga. 9N'omũlaĩka mwambwira ati, Usake uti, Obutseme buli n'abo abakabirikirawa okw'irya ly'erĩherũkya ly'Ekyana ky'Embũlĩ. Kandi mwabũga nage ati, Ebĩ nĩ bĩnywa by'ekwenene bya Nyamuhanga. 10Neryo monatũlama ahisi embere sy'ebisando biwe erĩmũramya. Naye mwabũga nage ati, Sukole utya! Ĩngye indi mugombe mũlĩkyenyũ haguma nawe, n'abalĩkyenyũ abakatũla omwatsi wa Yesu. Ũramaye Nyamuhanga! Kusangwa erĩtũla omwatsi wa Yesu nĩ kĩrĩmũ ky'eriminyerera. 11Neryo monalangira olubula ilukingukere, neryo lebaya, habya esabayĩrĩ nyeru-nyeru. Oyukagenda kuyo akahulawa mo Oyuteregula n'ow'ekwenene. Kandi omo litunganene akatswera n'erilwa amalwa. 12Ameso wuwe ni kirimi ky'omuliro, n'esyombĩta nyingi siri oko mutwe wuwe. Kandi awite erĩna lĩmũsakĩreko, nĩkwa sihali mundu wasĩryo, nina ye ĩyowene. 13Neryo ekanzu abya ambite ĩnĩtoberĩbwe omo musasi, n'erĩna liwe nĩ Kĩnywa kya Nyamuhanga. 14Neryo emilondo y'elubula moyamukwama, ibambite ekĩtanĩ kĩbũyahĩre, kandi ibakagenda oko syosabayĩrĩ nyeru-nyeru. 15Kandi omũyalĩ owatwĩre mwalũa omo buno buwe. Neryo asyakĩnda ebihanda omo mũyalĩ oyo. Nĩkwa asyatabala oko bihanda ebyo, omo mũtso w'ekyuma, neryo asyakamira omo muhe ebĩnyũ by'erihitana lĩkalĩre lya Nyamuhanga, Omũtokĩ W'ebyosĩ. 16Oko kanzu yiwe n'oko kihinga kiwe habya hasakĩre erĩna liti, Omwami w'abami, n'Omukama w'Abakama. 17Neryo monalangira omũlaĩka ĩnĩanimene omo lyuba. Naye mwabirikira omo mulenge munene iniakabwira esyonyonyũ syosĩ esikaguluka omo kyanya ati, Mwase, mũhĩndane busana n'erirya ĩnene lya Nyamuhanga! 18Mwase, mulye esĩswĩ sy'abami, n'esy'abakulu b'abasĩrĩkam, n'esĩswĩ sy'esyombangĩ, n'esĩswĩ sy'esyosabayĩrĩ, n'esy'abandu abali oko syosabayĩrĩ, n'esĩswĩ sy'abandu bosĩ, abandu abali n'obwĩranda, n'abakobe, abandu bake-bake, n'abakulu-bakulu! 19Neryo monalangira enyama eyo, n'abami b'ekihugo, n'emilondo yabo, ĩbahĩndene erilwa n'oyo wĩkere oko sabayĩrĩ, n'erilwa n'omulondo wuwe. 20Nĩkwa enyama eyo moyahambwa, n'omũmĩnyererĩ w'amabehĩ haguma nayo, oyo wabya akakola ebitiko-tiko embere sy'enyama eyo. Omũmĩnyererĩ w'amabehĩ oyo mwatebabo omo bitiko-tiko ebyo bahĩrawako omo lusako lw'enyama eyo, n'erĩramya esanamu yayo. Ababiri aba, n'enyama eyo, n'omũmĩnyererĩ w'amabehĩ, mobaguswa ibaneho, omo ngetsi y'omuliro eyikagulumira n'ekirimi. 21N'abandi mobĩtwa omo mũyalĩ owakalũa omo buno bw'oyo wĩkere oko sabayĩrĩ, n'esyonyonyũ syosĩ mosyũgũta omo sĩswĩ sy'emibiri yabo.

will be added

X\