ERĨBĨSŨLĨRWA 18

1Enyũma w'emyatsi eyĩ, monalangira ogundi mũlaĩka akandagala akalũa elubula. Abya awite ehamũlĩ nene, kandi obubuya buwe mobwakangabasanĩrya ekihugo kyosĩ. 2Neryo mwabirikira n'omulenge munene ati, Babelĩ Mukulu abiritera! Amatera! Kandi abiribya obwĩkalo bw'esyombĩnga, n'ah'eritamba ly'obuli kĩrĩmũ kĩtũnda-tũndĩre, n'ah'erisiba ly'obuli nyonyũ yĩtũndatũndĩre n'eyikaponawa. 3Kusangwa ebihanda byosĩ byabĩrĩpũlya ebĩnyũ by'engumbu y'erĩsĩngĩra lyago. Abami b'ekihugo babĩrĩsĩngĩrago, n'abatũndĩ b'ekihugo babiribya bateke busana n'esyongumbu syago. 4Neryo monowa ogundi mulenge akalũa elubula ati, Abandu bage, mũlũe mugo! Simusangane omo bibi byago. Mukasyabana erisuyira lyago! 5Kusangwa ebibi byago byabiritomengekana erĩhĩka elubula, Kandi Nyamuhanga abiryibuka amalolo wago. 6Mulihego ngoko abiririha abandi, Kandi mulihego ngendo ĩbĩrĩ busana n'emĩbĩrĩ yago. Mũsũlaye olũtehĩ lwago mw'eby'erĩpũlya ebĩkalĩre kabiri, Omo lũtehĩ olo abĩrĩtũlũnganĩa busana nenyũ. 7Uhego eriagalwa, n'eririra, Omo lulengo olo ayipipamo n'eriyisanza. Kusangwa akabũga omo mutima wago, ati, Nyĩkere ng'omugole w'omwami, Sindi mũkwakalĩ, Sindiendisyalira na kera! 8Kikaleka amalĩge wago asyahĩka omo kiro kiguma: Akasũsũ, n'obũlĩge, n'enzala; Asyatogotĩbwa omo muliro. Kusangwa Omukama Nyamuhanga, oyukamutswera akalĩre. 9Kandi abami b'ekihugo abasangĩre erĩsĩngĩra lyago n'esyongumbu syago, basyalirirago, n'erĩsũsũmanirago, omugulu bakalangira omũkĩ w'erihya lyago. 10Bakahangana hali, busana n'erĩubaha eriagalwa lyago, bati, Obũlĩge! obũlĩge! Babelĩ, omũyĩ mukulu, omũyĩ w'amaka! Omo saa nguma eritswera lyawe lyamahĩka! 11N'abatũndĩ b'ekihugo bakalirirago n'erĩsũsũmanirago, kusangwa sihali mundu oyukaswagula ebindu byabo. 12Sihali mundu oyukagula esyamagetsi syabo, n'ebĩtsĩpa byabo, n'amabwe w'obũgũlĩ bunene wabo, n'esyolulu syabo, n'ekĩtanĩ ekĩbũyahĩre, n'esyongimba syabo sy'omunyama, n'esyongimba sy'eharĩrĩ, n'esyongimba sy'olukula-kula; n'emĩsĩndo yosĩ y'emiti, ebikakumba ndeke, n'emĩsĩndo yosĩ y'ebindu by'ameno w'esyonzogũ, n'ebindu byosĩ by'emiti y'obũgũlĩ bunene, n'eby'omulinga, n'eby'ebyuma, n'eby'amabwe ahenĩrye ndeke; 13na dalasĩnĩ, na karafũ, n'obukwa, n'amanũkato, na ũbanĩ; n'ebĩnyũ, n'amagũta w'emĩzeĩtũnĩ, n'eyĩsyano y'enzelele, n'engano n'esyonde, n'esyombũlĩ, n'esyosabayĩrĩ, n'esyogalĩ, n'abakobe, n'emitima y'abandu. 14N'ebibuya ebyo wayĩtsũtsa byabĩrĩkũlũako, n'obuteke bosĩ bwawe n'ebibuya byawe byabĩrĩkũlũako, n'abandu sibendisyaswabanabyo kandi! 15Nĩkwa abatũndĩ b'ebindu ebĩ, ababya bateke busana nago, basyahangana hali kusangwa bakubaha eriagalwa lyago. Basyalira n'erĩsũsũmana, 16bati, Obũlĩge, obũlĩge! Omũyĩ mukulu! Owabya akambala ekĩtanĩ kĩbũyĩrĩre, n'olukimba lw'omunyama, n'ol'olukula-kula, n'erĩyĩsũga omo syamagetsi, n'amabwe w'obũgũlĩ bunene, n'esyolulu! 17Kusangwa omo saa nguma abĩrĩtalya obuteke bosĩ obũ! N'obuli mukulu w'obwato, n'obuli mundu oyukalendera omo bwato, n'oyukakola omũbĩrĩ omo bwato, n'abosĩ abakatunda omo ngetsi, mobahangana ehali, 18mobalaka omugulu balangira omũkĩ w'erihya lyago bati, Omũyĩ wahi ali ng'omũyĩ mukulu oyũ kwehĩ? 19Neryo mobagusa olũtũtũ oko mitwe yabo, ibakalira, n'erĩsũsũmana bati, Obũlĩge! obũlĩge! Omũyĩ mukulu! Oyũ nĩ mũyĩ aho abosĩ abawite amato omo ngetsi mobabya bateke busana n'ebindu byago! Nĩkwa omo saa nguma abĩrĩtalya ebyosĩ! 20Uwe lubula, utsemerego! N'inywe bandu ba Nyamuhanga, n'abakwenda, n'abamĩnyererĩ, mutsemerego! Kusangwa Nyamuhanga abiritswerago busana nenyũ. 21Neryo omũlaĩka embangĩ mwatola erĩbwe ng'oluso lunene mwagusalyo omo ngetsi ati, Litya omũyĩ munene go Babelĩ, asyaguswa ahisi omo mwaga, isiendisyaswabanika kandi. 22Neryo omulenge w'abawatĩ b'esyonanga, n'abĩmbĩ b'esyonyimbo, n'ababũhĩ b'amalenga, n'ababũhĩ b'esyongubi, sĩbendĩsyaswogũbwa ewawe! Kandi sihali omunyima-nyima w'omũbĩrĩ w'amenge oyo wasyaswabanika ewawe kandi. N'omulenge w'oluso sĩendĩsyaswogũbwa ewawe kandĩ! 23Kandi ekyakakala ky'etala sikyendisyaswakolerya ewawe kandi; kandi omulenge w'ĩba w'omũherũkĩ n'omũherũkĩ sĩyendĩsyaswogũbwa kandi ewawe; kusangwa abarũndĩ bawe babya bandu bakulu b'ekihugo, kusangwa ebihanda byosĩ byatebĩbawa omo busaki buwe! 24Kusangwa omusasi w'abamĩnyererĩ, n'omusasi w'abandu ba Nyamuhanga, n'omusasi w'abosĩ abĩtawa omo kihugo, mwabanika omo mũyĩ oyo.

will be added

X\