ERĨBĨSŨLĨRWA 16

1Kandi monowa omulenge munene owakalũa omo Hekalũ, owakabwira abamalaĩka balinda ati, Mugende, mũtũlĩre ebibindi birinda by'erihitana lya Nyamuhanga by'omo kihugo. 2Neryo omũlaĩka w'erĩmbere mwayũtũlĩra ekibindi kiwe omo kihugo. Neryo ebironda bibi, ebĩkalĩre, mobyahulukira oko bandu ababya k'olusako lw'enyama eyo, kandi ukw'abo abaramaya esanamu eyo. 3Neryo omũlaĩka w'akabiri mũtũlĩra ekibindi kiwe ky'omo ngetsi. Amagetsi wayo mwayahinduka ng'omusasi w'omundu ũholĩre, n'obuli nyama eyabyaho omo ngetsi moyahola. 4Neryo omũlaĩka w'akasatu mũtũlĩra ekibindi kiwe omo syonyũsĩ n'omo sĩsoko sy'amagetsi, nasyo mosyahinduka mo musasi. 5Neryo monowa omũlaĩka oyũkategaya amagetsi akabũga ati, Uwe Oyũbũyĩrĩre, uwe Utunganene, oyuliho n'oyutula, kusangwa wabiritswera emyatsi eyĩ! 6Kusangwa mobũta omusasi w'abandu ba Nyamuhanga n'ow'abamĩnyererĩ, nawe wabirihabo erĩpũlya omusasi. Nabo batolereryo. 7Neryo monowa ekiherero kĩkabũga kiti, Ega, Uwe Mukama Nyamuhanga, Omũtokĩ W'ebyosĩ! Eritswera lyawe ni ry'ekwenene, kandi litunganene! 8N'omũlaĩka w'akani mũtũlĩra ekibindi kiwe oko lyuba, nalyo molyahabwa ehamũlĩ y'erĩhĩsya abandu omo muliro. 9Neryo abandu mobahĩsĩbwa omo bukangira bũkalĩre, neryo mobatsuma erĩna lya Nyamuhanga oyuwite ehamũlĩ oko malĩge aya. Nĩkwa abandu mobatabindula emitima yabo erireka ebibi, n'eriha Nyamuhanga olukengerwa. 10N'omũlaĩka w'akatanu mũtũlĩra ekibindi kiwe oko kĩtũmbĩ ky'obwami ky'enyama eyo. Nĩkwa omwĩrĩmya mwabya omo bwami bw'enyama eyo, n'abandu mobatakũnya esyondimi syabo busana n'amagalĩ. 11Kandi mobatsuma Nyamuhanga w'elubula busana n'amagalĩ wabo n'ebironda byabo. Nĩkwa mobatabindula emitima yabo erireka emĩbĩrĩ mibi yabo. 12N'omũlaĩka w'endatu mũtũlĩra ekibindi kiwe oko lũsĩ lunene, lw'eEfũratĩ. Kandi amagetsi walo muma, enzira ĩkokotĩbawe busana n'abami bakalũa eyo eryuba likahuluka. 13Neryo monalangira emĩrĩmũ ĩsatu ng'ebikere bisatu ebĩtũndatũndĩre bĩkalũa omo buno bw'ekiyoka, n'omo buno bw'enyama eyo, n'omo buno bw'omũmĩnyererĩ w'amabehĩ. 14Ebikere ebĩ, nĩ bĩrĩmũ by'esyombĩnga. Ebikakola ebitiko-tiko. Ebĩrĩmũ bisatu ebĩ bikaya oko bami b'ekihugo kyosĩ, erĩhĩndanĩabo omo malwa w'ekiro kinene kya Nyamuhanga Omũtokĩ W'ebyosĩ. 15Mũlebaye! Ngasa ng'omũrahĩ. Obutseme buli oko mundu oyuteyato, n'oyũkategaya esyongimba siwe, akasyalendera ndũmbũ n'erihemuka embere sy'abandu. 16Neryo mobahĩndanĩa abami haguma ahakahulawa omo Kiebrania mo Harmagedonĩ. 17N'omũlaĩka w'akalinda mũtũlĩra ekibindi kiwe ky'omo kyanya, neryo omulenge munene mwalũa oko kĩtũmbĩ ky'obwami omo Hekalũ ati, Kyamakoleka! 18Neryo mohabya erĩpalya ly'akarabyo, n'emirenge, n'ermlũmo, kandi mohabya omũsĩkĩ owakalĩre kutsibu. Nĩkwa okw'ĩtsũka erihangikwa ly'abandu, sihehatabya omũsĩkĩ munene n'ow'amaka ng'oyũ. 19Kandi omũyĩ mukulu mwatulwa mo bihande bisatu, n'emĩyĩ y'ebihanda moyatera. Kandi Nyamuhanga mwibuka Babelĩ mukulu, neryo mwamũpũlĩsya ebinyũ omo lũtehĩ luwe, ebĩnyũ by'erihitana liwe erĩkalĩre. 20N'obuli kitsira mokyatibita erya, n'ebitwa mobitaswabanika. 21Kandi amatwa manene-manene, obuli ritsuku liguma lyabya ly'ekĩlo makũmĩ ani n'ebitanu, nago mwatogongera abandu akalũa omo kyanya. Kandi abandu mobatsuma Nyamuhanga busana n'obũlĩge bw'amatsuku ayo, kusangwa obũlĩge obo bwabya bũkalĩre kutsibu.

will be added

X\