ERĨBĨSŨLĨRWA 15

1Kandi monalangira ekindi kitiko-tiko kinene n'eky'eriswekera elubula. Mohabya abamalaĩka balinda, ababya bawite amalĩge alinda. Aya nĩ malĩge w'enyũma-nyũma, kusangwa Nyamuhanga akabugira mugo erihitana liwe. 2Neryo monalangira ekĩsosĩre engetsi y'ekiyo eyĩtũlũngene n'omuliro. Kandi monalangira abandu abakĩnda enyama eyo n'esanamu yayo, n'eriganza ly'erĩna lyayo. Babya bimene oko ngetsi y'ekiyo, ĩbahambĩre esyonanga sya Nyamuhanga. 3Babya bakimba olwimbo lwa Musa, omugombe wa Nyamuhanga, n'olwimbo lw'Ekyana ky'Embũlĩ, bati, Uwe Mwami Mukulu Nyamuhanga, Omũtokĩ W'ebyosĩ, Emĩbĩrĩ yawe ni minene-minene, n'ey'eriswekera! Uwe Mwami w'ebihanda, Esyonzira syawe situnganene, kandi ni sy'ekwenene! 4Uwe Mwami Mukulu nindi utesyakubaha kwehĩ? Nindi oyutesyapipa eriasa lyawe kwehĩ? Kusangwa uwe wowene ũbũyĩrĩre. Ebihanda byosĩ basyasa, N'erĩramya embere syawe, Kusangwa emĩbĩrĩ yawe itunganene yabĩrĩbĩsũlwa. 5Enyũma w'emyatsi eyĩ, monalangira eHekalũ iyikingukere elubula, n'eHema y'ah'erĩĩkala ha Nyamuhanga yabya muyo. 6Neryo abamalaĩka balinda ababya n'amalĩge alinda, mobalũa omo Hekalũ, ibambite esyongimba sy'ekĩtanĩ esyerĩre, esĩkangabasenĩe. Kandi ibambite amupa w'esyamagetsi oko bĩkũba byabo. 7Neryo ekiguma oko bĩhangĩkĩrwe ebiriho bini mokyaha oko bamalaĩka balinda ebibindi birinda by'esyamagetsi ĩbyoswĩre mw'erihitana lya Nyamuhanga, oyuliho kera na kera. 8N'eHekalũ moyũsũla mw'omũkĩ akalũa omo lukengerwa n'obũtokĩ bya Nyamuhanga. Kandi sihabya mundu oyukatoka eriingira omo Hekalũ, amalĩge alinda ate ahwa, awaletawa n'abamalaĩka balinda.

will be added

X\