ERĨBĨSŨLĨRWA 14

1Kandi monalangira, neryo talebaya, Ekyana ky'Embũlĩ kyabya kyimene oko kitwa ky'eSĩonĩ, kandi haguma naye habya bandu elfu erĩgana n'amakũmĩ ani n'ĩnĩ (144,000), abawite erĩna ly'Ekyana ky'Embũlĩ, n'erĩna lya Tata wuwe, awasakĩre oko mbũmo syabo. 2Kandi monowa omulenge akalũa elubula owasosĩre ng'omulenge w'amagetsi mangi w'ekisalala, kandi asosĩre ng'omulenge w'omũlũmo munene. Omulenge ogo nowa abya ng'omulenge w'abawatĩ b'esyonanga abakawata esyonanga syabo. 3Nabo mobahangana embere w'ekĩtũmbĩ ky'obwami, n'embere w'ebĩ-hangĩkĩrwe ebiriho bini, n'embere w'abakulu, neryo mobimba olwimbo luhya-luhya, isihali mundu wangiga olwimbo, iba n'abandu abo amaelfu erĩgana n'amakũmĩ ani n'ĩnĩ (144,000) abatongolĩbawa omo kihugo. 4Aba ni bandu abatayĩtsandaya haguma n'abakalĩ, kusangwa sĩbetahĩkya. Bakakwama Ekyana ky'Embũlĩ ehosĩ kikaya. Aba babirigulwa omo katĩkatĩ k'abandu ng'abandu b'erĩmbere busana na Nyamuhanga n'Ekyana ky'Embũlĩ. 5Aba sibebiha, sibali mo kahinira. 6Kandi monalangira ogundi mũlaĩka akaguluka endata omo kyanya, iniawite Engulu Yowene y'erikota erĩkangĩrĩryayo oko bandu abĩkere omo kihugo, oko buli kĩtũnga ky'abandu, n'obuli kihanda, n'obuli mũbũge, n'oko bandu. 7Neryo mwabũga n'omulenge munene ati, Mubahe Nyamuhanga, kandi mumupipe! Kusangwa endambĩ y'eritswera liwe yamahĩka. Kandi mũramaye Nyamuhanga oyo wahangika olubula, n'ekihugo, n'engetsi n'esĩsoko sy'amagetsi! 8Neryo omũlaĩka w'akabiri mwakwama omũlaĩka w'erĩmbere ati, Abiriwa! Babelĩ munene abiriwa! Mwaha abandu bosĩ ebinyũ biwe erĩpũlĩsyabyo omo ngumbu y'erĩsĩngĩra liwe. 9Neryo omũlaĩka w'akasatu mwakwama abandi bamalaĩka babiri, mwabũga n'omulenge munene ati, Omundu amaramya enyama eyo n'esanamu eyo, n'erĩhĩrwa k'olusako oko mbũmo yiwe, kutse oko byala biwe, 10asyapũlya oko bĩnyũ bya Nyamuhanga, ebĩnyũ by'erihitana liwe ebyo abĩrĩũta butsira erĩhĩrwa kw'amagetsi omo lũtehĩ lw'obukali buwe! Kandi asyagalĩbwa omo muliro n'omo kirimi embere w'abamalaĩka babũyĩrĩre, n'embere w'Ekyana ky'Embũlĩ. 11N'omũkĩ w'omuliro owakagalayabo akahetuka kera na kera. Kandi abakaramaya enyama eyo n'esanamu yayo, n'omundu oyũkahĩrawa kw'olusako lw'erĩna lyayo, sibeluhuka omo musibo kutse omo kiro. 12Hano ho hali erĩyĩyĩnĩa ly'abandu ba Nyamuhanga, abakategaya ebihano bya Nyamuhanga, kandi siberegula busana na Yesu. 13Neryo monowa omulenge akalũa elubula ati, Usake uti, Erĩtsũka lino, obutseme buli n'abaholĩre, abakahola omo mũbĩrĩ w'Omukama! Omũlĩmũ ati, Ega, basyahumula oko mĩbĩrĩ yabo, kandi emiganzo y'emĩbĩrĩ yabo ikagenda haguma nabo. 14Kandi monalangira, neryo lebaya, habya ekĩtũ kyeru-kyeru, neryo oyo wĩkere oko kĩtũ ekyo, abya asosĩre omugala w'omundu, iniawite embĩta y'esyamagetsi oko mutwe wuwe, n'omũtemĩ owatwĩre omo byala biwe. 15Kandi ogundi mũlaĩka mwalũa omo Hekalũ, iniakabirikira oyo wĩkere oko kĩtũ, n'omulenge munene ati, Ũhĩre omũtemĩ wawe omo kihugo, ugese, kusangwa endambĩ y'erigesa yabĩrĩhĩka, kusangwa erigesa ly'ekihugo lyamahĩka! 16Neryo oyo wabya ĩkere oko kĩtũ mwalabya omũtemĩ wuwe oko kihugo, neryo ekihugo mokyageswa. 17Neryo ogundi mũlaĩka mwalũa omo Hekalũ eyiri omo lubula, naye nibya iniawite omũtemĩ owatwĩre. 18Neryo ogundi mũlaĩka, oyuwite ehamũlĩ oko muliro, mwalũa omo kiherero. Naye mwabirikira omũlaĩka oyuwite omũtemĩ owatwĩre, n'omulenge munene ati, Uteme omo mũtemĩ wawe owatwĩre, ugese ebĩgũma by'ebĩnyũ by'ekihugo, kusangwa ebĩgũma by'ebĩnyũ byerĩre. 19Neryo omũlaĩka mwalabya omũtemĩ wuwe omo kihugo, mwakuma-kuma ebĩgũma by'ebĩnyũ by'ekihugo, neryo mwagusabyo omo muhe munene w'erihitana lya Nyamuhanga. 20Neryo ebĩgũma mobyakamirwa omo muhe eyĩhya oko mũyĩ, neryo musasi mwalũa omo muhe w'ebĩnyũ, erĩhĩka oko mikoba y'esyosabayĩrĩ oko bilometere magana asatu n'ebindi.

will be added

X\