ERĨBĨSŨLĨRWA 13

1Neryo monalangira enyama ĩkalũa omo ngetsi. Enyama eyo yabya yiwite amahembe ĩkũmĩ n'emitwe irinda, n'esyombĩta ĩkũmĩ oko mahembe wayo, n'oko mitwe yayo habya amena w'ebĩtsũmĩ. 2Enyama eyo nalangira yabya yĩsosĩre esoro, n'ebisando byayo ĩbĩsosĩre ebisando by'edubu, n'obuno bwayo ĩbũsosĩre obuno bw'endale. Kandi ekiyoka ekyo mokyaha enyama eyo amaka wakyo, n'ekĩtũmbĩ kyakyo ky'obwami, n'ehamũlĩ nene. 3Nĩkwa omutwe muguma w'enyama eyo, abya ahutere ekironda ky'erĩholya, nĩkwa ekironda kyayo ky'erĩholya mokyalamĩbwa. N'ekihugo kyosĩ mokyasweka, mokyakwama enyama eyo. 4Neryo abandu mobaramya ekiyoka ekyo kusangwa mokyaha enyama eyo ehamũlĩ yakyo. Kandi mobaramya enyama eyo bati, Nindi ali ng'enyama eyo kwehĩ? Kandi nindi wangatoka erilwa nayo kwehĩ? 5Enyama eyo moyahabwa obuno bw'erĩbũgamo ebĩnywa by'eriyiheka n'ebĩtsũmĩ, kandi moyahabwa ehamũlĩ y'erikola emikera makũmĩ ani n'eyĩbĩrĩ. 6Neryo moyatsũka eritsuma Nyamuhanga, n'eritsuma erĩna lya Nyamuhanga. n'aho Nyamuhanga ĩkere, n'abosĩ abĩkere elubula. 7Neryo moyahabwa ehamũlĩ y'erilwa n'abandu ba Nyamuhanga n'erĩkĩndabo; kandi ehamũlĩ oko buli kihanda, n'abandu, n'emĩbũge, n'obuli kĩtũnga ky'abandu. 8N'abandu bosĩ abĩkere omo kihugo basyaramyayo, obuli mundu oyuwite erĩna lĩtasakĩre embere w'erĩtsũka ly'ekihugo, omo kitabu ky'engebe ky'Ekyana ky'Embũlĩ ekyakerawa. 9Oyuwite amatwĩ, owe! 10Omundu oyo wangahambwa mo mukobe, asyahambwa mo mukobe kwenene. Kandi oyo wangakwa omo mũyalĩ, naye ĩnĩakwa omo mũyalĩ. Erĩ ni'yitsingirira n'erĩkĩrĩrya ly'abandu ba Nyamuhanga. 11Neryo monalangira eyindi nyama ĩkalũa omo kihugo. Yabya yiwite amahembe abiri ng'ekyana ky'embũlĩ, kandi moyabũga ng'ekiyoka. 12Nayo ikakola omo hamũlĩ yosĩ y'enyama y'erĩmbere embere wayo. Ikaleka ekihugo n'abosĩ abĩkere mukyo ĩbaramya enyama eyo y'erĩmbere eyo yabya n'ekironda ky'erĩholyayo, ekyalamĩbawa. 13N'enyama eyĩ y'akabiri ikakola ebitiko-tiko binene. Kandi ikaleka omuliro ĩnĩalũa elubula n'erĩhĩka oko kihugo embere w'abandu bosĩ. 14Nĩkwa ikateba abandu bosĩ abĩkere omo kihugo busana n'ebitiko-tiko ebyo yahabawa erikola embere w'enyama y'erĩmbere. Enyama eyĩ moyabwira abandu bosĩ abĩkere muna-kihugo iti, bakokotaye esanamu busana n'enyama eyahutala ekironda ky'omo mũyalĩ, n'eriswabyaho. 15Enyama eyĩ y'akabiri moyahabwa ehamũlĩ y'eriha omuka oko sanamu y'enyama eyo, n'esanamu y'enyama iyatoka erĩbũga, n'erĩĩta abosĩ abagana erĩramya esanamu y'enyama eyo. 16Enyama eyo ikaleka abandu bosĩ, abake-bake n'abakulu-bakulu, abateke n'abera, abagombe n'abandu b'obwĩranda, bahĩrawe k'olusako oko byala byabo by'amali, n'oko mbũmo syabo. 17Omundu syasyegula kutse erĩgũlya, yo n'oyũsakĩre olusako olo, lye rĩna ly'enyama eyo, kutse eriganza ly'erĩna lyayo. 18Amenge waya. Oyuwite eriminya aganze erĩna ly'enyama eyo, kusangwa ni'ganza ly'omundu, n'eriganza liwe ni magana ndatu n'amakũmĩ ndatu n'endatu (666).

will be added

X\