ERĨBĨSŨLĨRWA 12

1Neryo ekitiko-tiko kinene mokyabutuka elubula. Habya omũkalĩ iniambite eryuba, n'omukera abya eyĩkwa oko bisando biwe, n'oko mutwe wuwe kwabya embĩta y'esyongũnũnũ erĩkũmĩ n'esĩbĩrĩ. 2Omũkalĩ oyo abya mukule, neryo mwalaka n'erikunda iniakagalawa akabuta. 3Neryo ekindi kitiko-tiko mokyabutuka elubula. Neryo lebaya! Habya ekiyoka kinene ekĩhenĩrye ng'engula, ikiwite emitwe irinda, n'amahembe ĩkũmĩ, n'esyombĩta sirinda syabya oko mitwe yakyo. 4Neryo omukira wakyo mwakumula ekiguma ky'omo bisatu ky'esyongũnũnũ sy'ekyanya, neryo mokyagusasyo oko kihugo. Nĩkwa ekiyoka ekyo mokyahangana embere sy'omũkalĩ oyo wasonda eributa, kiti akandibya abibuta, ikyalya omwana. 5Neryo omũkalĩ oyo mwabuta omwana w'obulume oyo wasyatabala oko Bihanda byosĩ omo mũtso w'ekyuma. Neryo omwana wuwe mwabatulirwa endata, uku Nyamuhanga, n'oko kĩtũmbĩ kiwe ky'obwami. 6Nĩkwa omũkalĩ mwasagira omo mbwarara, aho Nyamuhanga akokotaya omwanya busana naye, aho asyalemberwa ebiro elfu nguma n'amagana abiri n'amakũmĩ ndatu (1260). 7Neryo mohahuluka amalwa elubula. Mĩkaelĩ n'abamalaĩka buwe mobalwa n'ekiyoka ekyo. N'ekiyoka ekyo n'abamalaĩka bakyo mobalwa. 8Neryo ekiyoka ekyo n'abamalaĩka bakyo mobakĩndwa. Kandi mohataswabanika omwanya busana nabo elubula. 9Kandi ekiyoka kinene ekyo mokyaguswa ahisi! Ekyo ni kiyoka kya kera ekikahulawa mo Dĩabolo n'eSatanĩ, oyukateba ekihugo kyosĩ. Mokyaguswa ahisi oko kihugo, n'abamalaĩka bakyo mobaguswa ahisi haguma nakyo. 10Neryo monowa omulenge munene omo lubula ati, Lino erilama lya Nyamuhanga wetu lyabĩrĩhĩka! Lino obũtokĩ, n'obwami bwa Nyamuhanga wetu, n'ehamũlĩ ya Kristo wuwe byabĩrĩhĩka! Kusangwa omũtsongerĩ w'abalĩkyetu abiriguswa ahisi, oyukahandikirira abalĩkyetu embere sya Nyamuhanga omo musibo n'omo kiro. 11Kandi abalĩkyetu mobakĩnda Satanĩ omo musasi w'Ekyana ky'embũlĩ kandi, kusangwa batũla omwatsi wa Nyamuhanga. Kandi mobatalanda oko ngebe yabo, mobalĩga erihola. 12Neryo busana n'omwatsi oyũ, ĩnywe lubula, mutseme, nenyũ abĩkere omo lubula! Obũlĩge oko kihugo n'oko ngetsi! Kusangwa Satanĩ yabiribandagalirako iniahitene kutsibu, kusangwa yasĩ ko yiwite katambĩ kake buyira. 13Neryo ekiyoka kyabere kyalangira ko kyamaguswa ahisi oko kihugo, mokyendererya omũkalĩ oyo wabuta omwana w'obulume. 14Omũkalĩ oyo mwahabwa ebĩpũpa bibiri by'erĩsamba ĩnene, atoke erigulukira omo mbwarara oko mwanya wuwe, aho asyalembererwa ndeke omo myaka ĩsatu n'embindi, ahate erĩendererya ly'ekiyoka ekyo. 15Neryo ekiyoka mokyũtĩra omũkalĩ oyo amagetsi ng'olũsĩ olũkalũa omo buno bwakyo, kiti kĩkamusendaya omw'igunga ly'amagetsi. 16Nĩkwa ekitaka mokyawatĩkya omũkalĩ oyo, mokyatanda obuno bwakyo, neryo ekitaka mokyanywa olũsĩ olo ekiyoka kyũtũla omo buno bwakyo. 17Neryo ekiyoka ekyo mokyahitana oko mũkalĩ. Mokyayalwa n'abandi bandu b'olubuto lw'omũkalĩ, ababya bakateya ebihano bya Nyamuhanga n'abakwama erĩtũlago lya Yesu. 18Neryo ekiyoka mokyahangana oko mũsĩke w'engetsi.

will be added

X\