ERĨBĨSŨLĨRWA 11

1Neryo monahabwa oluseke olw'erirengamo, lwabya ng'omũtso, neryo monabwirwa ambu, Hangana, ulenge eHekalũ ya Nyamuhanga n'ekiherero, kandi uganze abakaramaya omo Hekalũ omo. 2Nĩkwa ũsĩge ekibuga ekiri eyĩhya oko Hekalũ. Sulengekyo, kusangwa kyabirihabwa oko bihanda, nabo basyalyatangirira Omũyĩ Abũyĩrĩre emikera makũmĩ ani n'eyĩbĩrĩ. 3Nage nasyaha abalangĩrĩ bage babiri ehamũlĩ, nabo basyatũla omwatsi wa Nyamuhanga ebiro elfu nguma n'amagana abiri n'amakũmĩ ndatu (1260), ibambite emisarandwe. 4Abalangĩrĩ babiri aba ni miti ĩbĩrĩ y'eMĩzeĩtũnĩ, kandi ni tala ĩbĩrĩ abimene embere sy'Omukama w'ekihugo. 5Kandi omundu amalenga erikolabo nabi, omuliro akalũa omo muno wabo n'erĩhĩsya esyonzĩgũ syabo. Neryo omundu amasonda erikolabo nabi, asyĩtwa atya. 6Aba bawite obũtokĩ bw'erĩrĩba ekyanya, embũla initasyawa oko mugulu ogo bakatũla omwatsi wa Nyamuhanga. Kandi bawite ehamũlĩ oko magetsi erihindulago mo musasi, kandi bawite ehamũlĩ y'erĩĩta ekihugo omo mĩsĩndo yosĩ y'esyondwala oko migulu yosĩ banzĩre. 7Neryo omugulu abalangĩrĩ babiri abo bamabibuga erĩtũlago lyabo, enyama eyĩkalũa omo buhya obutawite kabuno yasyalwa nabo, n'erĩkĩndabo, n'erĩĩtabo. 8Nĩkwa ebĩnda byabo byasyabya omo nzira y'omũyĩ mukulu aho Mukama abambirawa oko musalaba. Omũyĩ oyo akahulawa omw'ĩkũmbo mo Sodomo n'eMĩsĩrĩ. 9Neryo abandu, n'Ebihanda, n'emĩbũge, n'ebĩtũnga by'abandu, basyasamalira ebĩnda byabo ebiro bisatu n'embindi y'ekiro, isibendĩsyalĩga ebĩnda byabo bĩkahĩrwa omw'isinda. 10Kandi esyondũlanĩ sy'ekihugo basyatsemera oluholo lw'abalangĩrĩ babiri aba. Basyatsanga n'erĩhererania olũsũnzo, kusangwa abamĩnyererĩ babiri aba mobagalya abandu abĩkere omo kihugo. 11N'enyũma w'ebiro bisatu n'embindi, omuka w'engebe akalũa uku Nyamuhanga mwahĩka mubo, nabo mobahangana, neryo eriubaha ĩnene molyahĩka oko bandu abalangirabo. 12Neryo abamĩnyererĩ abo mobowa omulenge munene owakalũa elubula, akabwirabo ati, Mwase endata eno! Neryo esyonzĩgũ syabo mosyalangirabo bakahetukira omo lubula omo kĩtũ. 13N'oko ndambĩ eyo nyisa-nyisa mohabya omũsĩkĩ munene, akahindi kaguma k'omw'ĩkũmĩ k'omũyĩ mokatera, n'abandu maelfu alinda (7000), mobakwa omo mũsĩkĩ oyo. Neryo abandi bandu mobakwa obuba, mobapipa obukulu bwa Nyamuhanga w'elubula. 14Obũlĩge bw'akabiri bwabirilaba, nĩkwa lebaya, obũlĩge bw'akasatu bukasa lũba. 15Neryo omũlaĩka w'akalinda mwabuha engubi yiwe, neryo emirenge minene-minene omo lubula moyabũga iti, Obwami bw'ekihugo bwabiribya bwami bw'Omukama wetu, n'obwa Kristo wuwe, naye asyatabala kera na kera! 16Neryo abakulu makũmĩ abiri n'abani abakĩkala oko bĩtumbĩ byabo by'obwami embere sya Nyamuhanga, mobatũlama ahisi oko mũsũ wabo, mobaramya Nyamuhanga 17bati, Omukama Nyamuhanga, Omũtokĩ W'ebyosĩ, oyuli, n'oyutula! Tukakuha ewasĩngya kusangwa wabĩrĩmya obũtokĩ bwawe bunene, Kandi wabĩrĩtsũka erĩsĩnga! 18N'ebihanda mobyahitana, N'erihitana lyawe molyahĩka, N'omugulu mwahĩka ow'eritswera abaholĩ, Kandi omugulu mwahĩka ow'erihemba abagombe bawe abamĩnyererĩ, N'abandu bawe bosĩ, abakulu, n'abake-bake, N'abakubaha erĩna lyawe, Kandi omugulu mwahĩka busana n'erĩtogotya Abandu abakatsandaya ekihugo! 19Kandi eHekalũ ya Nyamuhanga omo lubula moyakingulwa, n'erĩsandũko ly'endagano yiwe molyabutuka omo Hekalũ yiwe. Neryo mohabya erĩpalya, n'emirenge, n'emĩlũmo, n'omũsĩkĩ, n'amatwa manene-manene.

will be added

X\