ERĨBĨSŨLĨRWA 1

1Omo kitabu ekĩ mũsakĩre emyatsi eyo Yesu Kristo abĩsũla. Erĩbĩsũla erĩ Nyamuhanga amuhalyo erĩkũmbũlĩra abagombe buwe emyatsi eyikandisyabya lũba. Kristo mwamĩnyĩsya emyatsi eyĩ uku Yoane omugombe wuwe iniakamutumira omũlaĩka wuwe. 2Yoane mwabũga ebyosĩ ebyo alangira, ĩnĩakatũla omwatsi w'ekĩnywa kya Nyamuhanga n'omwatsi w'ekwenene ogo Yesu Kristo abĩsũla. 3Obutseme buli n'omundu oyukasoma ekitabu ekĩ, kandi obutseme buli n'abandu abakowa ebinywa by'eriminyerera erĩ, n'abakakwama emyatsi eyĩsakĩre omo kitabu ekĩ! Kusangwa emyatsi eyĩ ikandisyabererera lũba. 4Ĩngye Yoane oko makanĩsa alinda awali eAsĩa: Olukogo n'obuholo bibye kwĩnywe ebĩkalũa ewa Nyamuhanga, oyuliho, n'oyutula, n'oyukandisyasa. Kandi bĩkalũa oko Mĩrĩmũ irinda eyiri embere sy'ekĩtũmbĩ kiwe ky'obwami; 5kandi bĩkalũa uku Yesu Kristo, omũtũlĩ w'omwatsi oyuteregula, Omugala, akambere oyo walũbũkĩbawa oko luholo, omũtabalĩ, w'abami b'ekihugo. Ukw'oyukatwanza, kandi yo watubohola oko bibi byetu omo musasi wuwe, 6kandi oyo watuyira eribya bwami bw'abahererĩ erikolera Nyamuhanga wuwe na Tata. Uku Yesu Kristo kubye olukengerwa, n'obũtokĩ, kera na kera! Amina. 7Mũlebaye! Akasa omo bĩtũ! N'obuli rĩso lyasyamulangira, n'abamutsimita nibya. N'ebihanda byosĩ bya muna-kihugo byasyamulirira. Inga, bibye bitya! Amina. 8Omukama Nyamuhanga, Omũtokĩ W'ebyosĩ, akabũga ati, Ĩngye indi Alfa na Omega; oyuliho, oyutula, n'oyukandisyasa. 9Ĩngye indi Yoane, omũlĩkyenyũ, kandi indi mũsangĩrĩ wenyũ omo malĩge, n'omo bwami, n'erĩyĩyĩnĩa, ebikawatana na Yesu, nabya omo kitsira ekikahulawa mo Patemo. Nabyaho kusangwa nakangaya ekĩnywa kya Nyamuhanga, ĩnĩngatũla omwatsi wa Yesu. 10Oko kiro ky'Omukama, Omũlĩmũ mwambĩkako, neryo monowa omulenge munene ng'omulenge w'engubi akabũgĩra enyũma kwĩngye. 11Ati, Usake omo kitabu ebyo ukalangira, utumebyo oko makanĩsa alinda: Ey'eEfeso, n'ey'eSmũrna, n'ey'ePergamo, n'ey'eTũatera, n'ey'eSardĩ, n'ey'eFĩladelfĩa, n'ey'eLaodĩkĩa. 12Neryo monakeba erĩrebya oyo wabũga nage. Nage nabere nakeba monalangira emitagala irinda y'esyamagetsi. 13Kandi omo katĩkatĩ k'emitagala eyo, monalangira oyũsosĩre Omugala w'Omundu, iniambite olukimba olũhĩkĩre oko bisando biwe, n'obupa bw'esyamagetsi oko kĩkũba kiwe. 14Omutwe wuwe n'esyonzwiri siwe byabya byeru-byeru ng'obweya bw'embũlĩ, ng'enzururu, n'ameso wuwe abya ng'ebirimi by'omuliro. 15N'ebisando biwe byabya bĩkangabasenĩe ng'omulinga ow'enduku, owabĩrĩerĩbwa omo muliro w'omo lũhĩtsa, n'omulenge wuwe abya ng'omulenge w'ekisalala. 16Kandi abya ahambĩre esyongũnũnũ sirinda omo byala biwe by'amali, n'omũyalĩ ow'amoya abiri mwalũa omo buno buwe. N'obũsũ buwe bwabya ng'erikola ly'eryuba erikakanyayira omo maka walyo gosĩ. 17Neryo omugulu namulolako, monawa ahisi oko bisando biwe ng'omundu oyũholĩre. Naye mwambĩra kw'ebyala biwe by'amali, ati, Sigubahe, ĩngye indi w'erĩmbere n'ow'enyũma. 18Kandi indi oyuliho! Nabya nyĩholĩre, neryo lebaya, nyiriho kera na kera. Kandi nyiwite ebĩboholĩ by'oluholo n'eby'Ekũlĩmũ. 19Neryo usake emyatsi eyo wabirilangira, n'emyatsi eyiri lino, n'emyatsi eyĩkandĩsyahĩka enyũma w'emyatsi eyĩ. 20Nĩkwa omwatsi w'erĩkũmbo ly'esyongũnũnũ sirinda esyo wamalangira omo byala byage by'amali, n'emitagala irinda y'esyamagetsi: esyongũnũnũ sirinda ni bamalaĩka b'esyokanĩsa sirinda, n'emitagala irinda nĩ kanĩsa sirinda.

will be added

X\