FĨLEMONO 1

1Ĩngye Paũlo, omundu w'omũlĩkĩ busana na Kristo Yesu, haguma na Tĩmoteo mũlĩkyetu. Oko mwanze wetu Fĩlemono, oyukakola omũbĩrĩ haguma netu, 2N'oko mũlĩkyetu w'obũkalĩ, ye Afĩa, n'oko mũsĩrĩkanĩ mũlĩkyetu ye Arkipo, n'oko kanĩsa eyĩkahĩndana omo nyũmba yawe. 3Olukogo, n'obuholo bibye nawe, bĩkalũa uku Nyamuhanga, Tata wetu, n'Omukama Yesu Kristo. 4Emigulu yosĩ ngakwibuka n'erikwahula omw'isaba lyage, kandi ngaha Nyamuhanga wage ewasĩngya emigulu yosĩ. 5Kusangwa ngowa engulu y'olwanzo lwawe, n'erĩkĩrĩrya lyawe, ebyo uwite busana n'Omukama Yesu, n'akandi busana n'abandu bosĩ ba Nyamuhanga. 6Kandi ngasaba nyiti, erisangira ly'erĩkĩrĩrya lyawe lĩkandĩsyawatĩkya eriminya ebyosĩ ebyo muwite busana na Kristo. 7Nabiritsema kutsibu busana n'olwanzo lwawe, kandi lwabĩrĩnyĩkĩranĩa. Kandi mũlĩkyetu, wabĩrĩsũnga-sũnga emitima y'abandu ba Nyamuhanga. 8Neryo nomo nangabya n'ehamũlĩ omwisi wa Kristo erikuhamula erikola ekitolere, 9nĩkwa busana n'olwanzo, ngakũbũlaya, ĩngye Paũlo mũsyakulu, kandi lino indi mundu w'omũlĩkĩ busana na Kristo Yesu. 10Ngabũlaya busana n'omwana wage omo kisomo, ye Onesĩmo, oyo nabuta omwisi wa Kristo, inyine omo mũlĩkĩ. 11Erĩmbere abya mundu buyira busana nawe, nĩkwa lino ni mundu w'endũndĩ busana n'ĩtwe bosĩ. 12Ngamũsũbaya uk'uwe, oyo nyĩhĩrĩre oko mutima wage. 13Kandi nabya nyanzĩre iniabya haguma nage erinyikolera omo mwanya wawe omugulu indi omo mũlĩkĩ busana n'Engulu Yowene. 14Nĩkwa sinabya nyanzĩre erikola omwatsi oyũ ute walĩga, neryo obubuya bwawe sibubye bũkakũnwa, nĩkwa busana n'erianza lyawe. 15Mbino erĩkũlũako lya Onesĩmo oko katambĩ kake likandisyaleka iniabya nawe ebiro byosĩ. 16Iniabya kuwe butsira ng'omukobe. Nĩkwa abye ĩnĩalabĩre omukobe, abye nga mũlĩkyetu mwanze. Ali atya busana nage kutsibu, nĩkwa kwilaba abya atya uk'uwe, oko mubiri, n'oko Mukama. 17Wamanyiganza ngoko tũsangĩre omo mũbĩrĩ, ũmũkokaye ngoko wanganyĩkokya. 18Nĩkwa amabya abirikukola nabi, kutse ali m'omwĩnda wawe, unganzire by'oko ng'ebyage. 19Ĩngye Paũlo ngasaka ebĩ omo byala byage nyiti, Ĩngye nasyatũhabyo nĩkwa ngakwĩbũkaya ngoko uli n'omwĩnda wage busana n'engebe yawe. 20Ega, mũlĩkyetu, ngakũbũlaya omwisi w'Omukama, ũsũngasũnge omutima wage omwisi wa Kristo. 21Ngasaka ebarua eyĩ inabiriminya ngoko ũkandĩowa, kusangwa nyĩnasĩ ngoko ukandisyakola ndeke kwilaba ebyo ngakubwira. 22Kandi ũkokotaye aho nangagotsera; kusangwa indi n'amaha nyiti, Nyamuhanga asyanyĩsũbya eyo muli busana n'erisaba lyenyũ. 23Epafra, oyũbohĩre haguma nage, busana na Kristo Yesu, akakũkeraya. 24Kandi Marĩko, na Arĩstarĩko, na Dema, na Lũka, abo tukakola nabo omũbĩrĩ, bakabakeraya. 25Olukogo lw'Omukama Yesu Kristo, lubye haguma n'ĩnywe bosĩ.

will be added

X\