ABANYA FĨLĨPĨ 4

1Neryo, balĩkyetu banze, ngabakwa olukando eribalolako. Muli butseme bwage, kandi mukanyiretera erĩyĩsyandira. Abanze bage, mũsĩke erikwama Omukama. 2Ngahatikana Eodĩa na Sĩntĩke babye n'obũlengekanĩa buguma ng'abalĩkyetu b'Omukama. 3Ega, nawe mũlĩkyetu, ngakusaba nyiti, ũwatĩkaye abakalĩ aba. Kusangwa babiriyitsinga kutsibu omo mũbĩrĩ w'erĩgenda-gendya Engulu Yowene, haguma na Klementĩ, n'abandi balĩkyetu, abawite amena wabo omo kitabu ky'engebe kya Nyamuhanga. 4Mutseme omo migendere yenyũ busana n'Omukama emigulu yosĩ; kandi ngababwira nyiti, Mutseme! 5Mũmĩnyĩkalaye eriyibombeka lyenyũ oko bandu bosĩ, Omukama ali hakũhĩ! 6Sĩmũhanga-hangaye emitima yenyũ, nĩkwa omo buli mwatsi mubwire Nyamuhanga obwaga bwenyũ, imukamusaba n'erimuhatikana, imunemuha ewasĩngya. 7N'obuholo bwa Nyamuhanga, obũlabĩre amenge gosĩ, bwasyateya emitima yenyu n'amaganirya wenyũ omwisi wa Kristo Yesu. 8Ego, balĩkyetu, mũsũlaye amalengekanĩa wenyũ omo myatsi mibuya n'eyangapipwa. Emyatsi eyo yeyĩ: eby'ekwenene, eby'erĩsĩkĩbwa, ebitunganene, ebĩbũyĩrĩre, ebyanganzwa, eby'erĩsĩmwa. 9Mubye mukakola emyatsi eyo mwiga, n'eyo mwangirira ewage, kandi emyatsi eyo mowa, n'eyo mwalolako ngakola. Neryo Nyamuhanga omwenye obuholo asyabya nenyũ. 10Nĩkwa monatsema kutsibu busana n'Omukama, kusangwa enyũma w'omugulu muli mwamasyanyibuka. Kwenene mwabya mukanyibuka, nĩkwa omwanya mwabula. 11Sĩndĩbũga nyiti ngabula kindu; kusangwa nabiriminya eritsema omo bike kutse omo bingi. 12Nyĩnasĩ eribyaho omo bindu bike, kandi nyĩnasĩ eribyaho omw'ikanya ly'ebindu. Nabiriga erĩkũmbo liti, lye ritsema omo myatsi yosĩ n'oko migulu yosĩ, namabya nyĩgũtĩre, kutse nyĩkwĩre enzala; kandi namabya ngwite bingi kutse eribulabyo. 13Nyĩtokĩre erikola ebyosĩ busana n'amaka wa Kristo oyũkanyĩtokesaya. 14Nĩkwa mwamakola ndeke erĩnyĩwatĩkya omo malĩge wage. 15Nenyũ, Banya Fĩlĩpĩ, mũnasĩ ndeke, omugulu natsũka erĩtũla Engulu Yowene, nabĩlũa eMakedonĩa, sihali eyindi kanĩsa eyanyĩwatĩkaya, mywebene mo mwasangira nage omo kĩbo, haguma n'erĩhĩtya n'eribula ebindu. 16Omugulu nabya eTesalonĩka nabya n'obwaga, momwabya mukanyitumira olũsũnzo. 17Sĩndĩbũga nyiti ngasonda olũsũnzo, nĩkwa ngasonda endũndĩ eyikakanyirira busana nenyũ embere wa Nyamuhanga. 18Nĩkwa nabiribana ebyosĩ, ngwite bingi; sindibula n'ekindu busana n'olũsũnzo lwenyũ, olo Epafrodĩto aleta. Nĩ 'hĩtya erikakumba ndeke, embere wa Nyamuhanga obuhere obutolere, obũkatsemesaya Nyamuhanga yo ndeke. 19Nyamuhanga wage asyabaha ebyosĩ ebyo muli nabyo bwaga, kusangwa awite obuteke bunene buwe, obw'erĩkangabasanĩa, obukabanika busana na Kristo Yesu. 20Neryo olukengerwa lubye uku Nyamuhanga Tata wetu, kera na kera. Amina. 21Mũkeraye obuli mundu wa Nyamuhanga oyuli wa Kristo Yesu. Abalĩkyetu abali haguma nage bakabakeraya. 22Abandu bosĩ ba Nyamuhanga bakabakeraya. N'abali omo kikali kya Kaĩsarĩ. 23Olukogo lw'Omukama Yesu Kristo lubye n'emitima yenyũ.

will be added

X\