ABANYA FĨLĨPĨ 3

1Ego, balĩkyetu, mutsemere Omukama! Sĩrĩkalĩre busana nage eribasakira emyatsi eyĩ, kandi ĩkabategaya. 2Mũyĩtegaye busana n'esyombwa, abandu abakakola nabi, abakayibandanga. 3Kusangwa ĩtwebene tuli b'eribana ly'ekwenene, tũkaramaya Nyamuhanga omo Mũlĩmũ wuwe, kandi tũkayĩsyandira omwisi wa Kristo Yesu. Situliyiketera emyatsi y'omubiri. 4Nĩkwa ĩngye nanganabana eky'eriyiketera omo myatsi y'omubiri. Kumbe hali mundu oyũkaganĩraya ati awite eky'eriyiketera omo myatsi y'omubiri, ĩngye ngwite ekĩlabĩre. 5Nabanĩbawa oko kiro ky'omunani enyũma w'eributwa lyage. Nabutawa oko kihanda kya Ĩsraelĩ omo kĩtũnga kya Benyamĩna. Nyiri Mũyũda kũndũ. Omo mwatsi w'erikwama Emigambo nabya Mũfarĩsayo. 6Nabya n'omũhwa munene busana n'erĩendererya ekanĩsa. Nabya nyĩkũmayĩre omw'itunganana eryo likabanika omo Migambo. 7Nĩkwa busana na Kristo, emyatsi yosĩ eyo yabya ndũndĩ busana nage, ngaganzayo ng'ĩtalya. 8Kandi busana n'obũgũlĩ bunene bw'eriminya Kristo Yesu Omukama wage, ngaganza emyatsi yosĩ ng'ĩtalya. Busana na Kristo nabĩrĩtalya emyatsi yosĩ n'eriganzayo ng'ebibaya, inatoka eribana Kristo mo ndũndĩ yage. 9Kandi nyibanike kwenene ko nyimatikene naye, isingwite ekitunganene ekikabanika omo Migambo, nĩkwa ekitunganene ekikabanika omw'ĩkĩrĩrya Kristo, kyo kitunganene ekĩkalũa ewa Nyamuhanga omo nzira y'erĩkĩrĩrya. 10Ekiguma nyanzĩre nyiti, nyiminye Kristo kwenene, n'obũtokĩ bw'erĩlũbũka liwe, kandi nyĩsangĩre omo magalĩ wuwe, n'eribya haguma naye omo luholo luwe. 11Inatoka erĩhĩka okw'ĩlũbũka oko baholĩ. 12Sĩndĩbũga nyiti nabĩrĩhĩka kulyo kutse nga nabĩrĩhĩkana, nĩkwa ngakwamirira inatoka erihambalyo ngoko Kristo Yesu naye abirimbamba. 13Balĩkyetu, sindiganza nga nabiriwata kulyo, nĩkwa ekiguma ngakola; nyanzĩre eribirirwa emyatsi eyabirilaba, erisimbirira emyatsi eyiri emuliro. 14Ngayitsinga eritibita erĩhĩka oko ndũlĩ, eribana oluhembo, lye ribirikirwa ly'endata na Nyamuhanga erimatikana na Kristo Yesu. 15Ĩtwe twabĩrĩhĩkana tubye n'obũlengekanĩa obũ. Kandi mwamabya n'obundi bũlengekanĩa, Nyamuhanga asyabamĩnyĩsyabo. 16Nĩkwa aho twabĩrĩhĩka, tũsĩke erikwamirirabo tutya. 17Balĩkyetu, mubye mũkanyĩgerererya. Mũlebaye ng'abandi abakalendera omw'itegeka lyetu. 18Kusangwa nabya ngababwira, kandi rino ngababwira omo mĩsonĩa nyiti, abangi bakalendera ng'esyonzĩgũ sy'omusalaba wa Kristo. 19Endũlĩ yabo basyaherĩbwa, kandi babiriyira esyongumbu syabo mo nyamuhanga wabo. Bakayihalamba omo myatsi y'esĩsonĩ, kandi bawite obũlengekanĩa bw'abandu b'ekihugo. 20Nĩkwa ewetu ye lubula, netu tukalindirira Omũlamya erĩlũa elubula, yo Mukama Yesu Kristo. 21Iye asyabindula omubiri wetu molo, n'eriyirago ng'omubiri wuwe w'olukengerwa, busana n'obũtokĩ buwe obukatoka erĩhĩra emyatsi yosĩ omo butabale buwe.

will be added

X\