ABANYA FĨLĨPĨ 1

1Ĩtwe Paũlo na Tĩmoteo, abagombe ba Kristo Yesu, tukabasakira, ĩnywe bandu bosĩ ba Nyamuhanga abĩkere eFĩlĩpĩ, abĩkĩrĩrye Kristo Yesu, haguma n'abateya n'abawatĩkya. 2Nyamuhanga Tata wetu n'Omukama Yesu Kristo, abahe olukogo n'obuholo. 3Ngaha Nyamuhanga wage ewasĩngya busana n'ĩnywe bosĩ, emigulu yosĩ ngabibuka. 4N'emigulu yosĩ ngabasabira ĩnywe bosĩ, ngasaba n'obutseme. 5Kusangwa mwabirisangira nage omo mũbĩrĩ w'Engulu Yowene, erĩtsũka ekiro ky'erĩmbere n'erĩhĩka na lino. 6Neryo nyĩnasĩ mwatsi muguma oyũ, nyiti, oyo watsũka omũbĩrĩ owene omwisi wenyũ, ye Nyamuhanga, asyaberereryago erĩhĩka oko kiro kya Kristo Yesu. 7Litolere ĩnaganĩrya nyitya busana n'ĩnywe bosĩ, kusangwa muli oko mutima wage. Kusangwa ĩnywe bosĩ mwabirisangira nage omo mũbĩrĩ ogo Nyamuhanga abirimba omo lukogo luwe, omugulu indi omo mũlĩkĩ, kandi omugulu nabya ngalwira n'erĩhanganĩa Engulu Yowene. 8Kusangwa Nyamuhanga anasĩ ngoko ĩnywe bosĩ ngabakwa olukando lunene omo lwanzo lwa Kristo Yesu. 9Ngabasabira nyiti, olwanzo lwenyũ lukanyirire kutsibu haguma n'amenge n'eriminya enzumwa y'omwatsi. 10Imwatoka erĩsĩma ebibuya. Litya mukandisyatoka eribya babuya, butsira ekyangakungwa, erĩhĩka oko kiro kya Kristo. 11Kandi emitima yenyũ yasyũsũla omo myatsi itunganene eyĩkalũa uku Yesu Kristo. Emyatsi eyĩ yasyaleta olukengerwa n'eripipa uku Nyamuhanga. 12Nyanzĩre muminye, balĩkyetu, nyiti emyatsi eyo yambĩkako ĩkawatĩkaya erĩtũla Engulu Yowene. 13Yabirireka abateya bosĩ b'ekikali, haguma n'abandi bosĩ, ibaminya ko ndi omo mũlĩkĩ busana na Kristo. 14Kandi abalĩkyetu bangi babiriyiketera erikwama Omukama busana n'omũlĩkĩ wage. Kandi babirihanda omutima erĩbũga ekĩnywa kya Yesu butsira eriubaha. 15Abandi bakatũla omwatsi wa Kristo busana n'eritsura n'omwaga. Nĩkwa abandi bakakangĩrĩraya n'omutima owene, 16kusangwa bawite olwanzo, kandi banasĩ ko nahĩrawa erilwira Engulu Yowene. 17Abandi sĩbekanganaya Kristo omo kwenene, nĩkwa omo mutima w'erĩyĩhamya, ĩbakaganĩraya erĩnyagalya omo mĩrĩkĩ yage. 18Si mwatsi! Ngatsema, kusangwa omo syonzira syosĩ Kristo anemũkanganĩbwa, nomo lyangabya omo mutima owene kutse omo mutima w'omwaga. Kandi ngandisyaswatsema, 19kusangwa nyĩnasĩ nasyaboholwa busana n'erisaba lyenyũ na busana n'erĩwatĩkya erĩkalũa oko Mũlĩmũ wa Yesu Kristo. 20Kusangwa erisonda ly'omutima wage, n'amaha wage biti, sinyihemulawe omo mwatsi n'omuguma embere sya Nyamuhanga. Nĩkwa nyikole emigulu yosĩ, na lino, omo butubaha, Kristo ahamĩbawe omo mubiri wage, kutse omw'ibyaho lyage, kutse omo luholo lwage. 21Kusangwa ũkw'ĩngye, engebe ni Kristo, n'omw'ihola muli ndũndĩ! 22Nĩkwa lyamabya ngabyaho omo mubiri, nanganakola omũbĩrĩ mubuya. Sinyasĩ ekyo nangayisoga. 23Ngahatatanĩbawa omo katĩkatĩ k'ebibiri. Nyanzĩre erigenda n'eribya na Kristo, kusangwa ekyo kyowene kwilaba. 24Nĩkwa eribyaho eno omo mubiri, lyo litolere kutsibu busana nenyũ. 25Kusangwa nabiriminya ekĩ, ngandĩsĩgala, n'eribya haguma n'ĩnywe bosĩ busana n'erĩbalolya emuliro omw'ĩkĩrĩrya lyenyũ, n'obutseme bwenyũ. 26Mwasyatoka erĩyĩsyandira ndeke omwisi wa Kristo busana nage namaswabahĩkako . 27Omwatsi munene goyũ, emikolere yenyũ ibye itolere Engulu Yowene ya Kristo. Neryo, namaya eyo eribalolako, kutse ndeho, nasyowa engulu yenyũ, ngoko mũsĩkĩre omo bũlengekanĩa buguma, imunemulwa n'omutima muguma busana n'Engulu Yowene y'erĩkĩrĩrya Kristo. 28Simubahe n'ahake esyonzĩgũ syenyũ, ekĩ kĩkamĩnyĩsayabo ngoko bakandisyahera. Nĩkwa ĩnywe mukandisyalama, kusangwa ebyosĩ bĩkalũa ewa Nyamuhanga. 29Busana na Kristo mwabirihabwa obubuya obũ obw'erĩmwĩkĩrĩrya, nĩkwa butsira erĩ risa, nĩkwa obubuya bw'erĩagalwa busana naye. 30imunemulwa amalwa ago mwalangira ngalwa, na lino mũkowa ngalwa.

will be added

X\