MATAYO 9

1Neryo Yesu mwingira omo bwato, mwasokera eyisirya w'engetsi oko mũyĩ w'eka wuwe. 2Neryo abandu mobamuletera omundu oyũbasĩre, iniagotsere oko ngingo. Nĩkwa Yesu mwalangira erĩkĩrĩrya lyabo, neryo mwabwira oyũbasĩre ati, Mwana wage, ũsĩkaye omutima! Ebibi byawe byamabibuyirwa. 3Neryo lebaya, abandi b'oko bakangĩrĩrya b'Emigambo mobayibwira bati, Omundu oyũ akatsuma. 4Neryo Yesu mwaminya amalengekanĩa wabo, mwabũga ati, Busana nakĩ mukaganĩraya ebibi by'omo mitima yenyũ kwehĩ? 5Ekyolo ni kyahi, erĩbũga nyiti, Ebibi byawe byamabibuyirwa, kutse erĩbũga nyiti, Hangana, ugende, kwehĩ? 6Nĩkwa mutoke eriminya k'Omugala w'Omundu awite hamũlĩ omo kihugo eribuyira ebibi, Yesu mwabwira oyũbasĩre ati, Hangana, wĩmaye engingo yawe, uye eka wenyũ! 7Neryo omundu oyo mwahangana, mwaya eka wabo. 8Nĩkwa omugulu abandu balangira ekyo mobubaha, mobapipa Nyamuhanga oyo waha ehamũlĩ iri ng'eyĩ y'oko bandu. 9Neryo Yesu abere alaba akalũaho, mwalangira omundu oyukahulawa mo Matayo, ĩnĩanĩkere aho bakasoleseraya. Nĩkwa Yesu mwamubwira ati, Unyikwame, neryo Matayo mwahangana, mwamukwama. 10Neryo omugulu Yesu abya akalira omo nyũmba, abasolesya bangi n'abakola-nabi mobasa, mobalya haguma na Yesu n'abiga buwe. 11Kandi omugulu Abafarĩsayo balangira batya, mobabwira abiga buwe bati, Busana nakĩ Omũkangĩrĩrya wenyũ akalya haguma n'abasolesya n'abakola-nabi kwehĩ? 12Nĩkwa omugulu Yesu owa ekĩ, mwabũga ati, Abakalĩre sibali n'obwaga bw'omunganga, nĩkwa abalwere. 13Nĩkwa mugende mwige ekĩsakĩre kiti, Ngasonda eriganyira, butsira obuhere bw'esyonyama; kusangwa sinasa eribirikira abatunganene, nĩkwa abakola-nabi. 14Neryo abiga ba Yoane Mũbatĩsya mobahĩka uku Yesu bati, Busana nakĩ ĩtwe n'Abafarĩsayo tukatsira akalyo, nĩkwa abiga bawe sibetsira akalyo kwehĩ? 15Yesu mwasũbĩryabo ati, Kw'abĩra b'ĩba w'omũherũkĩ banganakwa ngitsi omugulu akine haguma nabo kwehĩ? Nĩkwa ebiro byasyasa omugulu ĩba w'omũherũkĩ asyalũsĩbwa kubo, neryo oko mugulu oyo basyatsira akalyo. 16Sihali omundu oyukalandira ekitomeko kihya-kihya oko lukimba lwa kera, kusangwa ekitomeko kihya-kihya kikatula olukimba, ilwatulika kwilaba erĩmbere. 17Kutse sihali omundu oyũkũtũlĩra ebĩnyũ bihya-bihya omo bihu bikulu-kulu by'ebĩnyũ. Kite kitya ebihu by'ebinyũ bikatulika, n'ebĩnyũ bĩkũtĩka, n'ebihu by'ebĩnyũ bikatsanda; nĩkwa bakahĩra ebĩnyũ bihya-bihya omo bihu bihya-bihya by'ebĩnyũ, n'ebyosĩ bikabya ndeke. 18Nĩkwa omugulu Yesu abya akabũga nabo emyatsi eyĩ, omukulu w'enyũmba y'erĩhĩndanamo mwasa, mũnama embere sya Yesu erĩmũramya ati, Mwali wage amahola; nĩkwa wase ũmũhĩre kw'ebyala byawe, akandibyaho. 19Neryo Yesu mwahangana mwamukwama, n'abiga ba Yesu mobagenda haguma naye. 20Neryo omũkalĩ muguma, oyo wabya akwĩre obũkonĩ bw'erĩlũsya omusasi, oko myaka erĩkũmĩ n'eyĩbĩrĩ, mwasa enyũma uku Yesu, mwatũla oko mũsĩke w'olukimba luwe. 21Kusangwa ayibwira ati, Namatatũla oko lukimba luwe lusa, ngandilama. 22Nĩkwa Yesu mwabinduka mwamulangira, mwamubwira ati, Ubondere, mwali wage! Erĩkĩrĩrya lyawe lyamabĩkũlamya. Neryo-neryo omũkalĩ oyo mwalamĩbwa. 23Neryo Yesu mwaya omo nyũmba y'omukulu oyo, mwalangira ababũhĩ b'amalenga n'endeko ikabũya olukanda. 24Neryo Yesu mwabũga ati, Mũlũeho! Kusangwa omwana-muto siaholĩre, nĩkwa alito! Nabo mobamuseka. 25Nĩkwa endeko yabere yabihigirwa eyĩhya, Yesu mwingira aho mwana-muto abya, mwamuhamba oko byala, n'omwana-muto oyo mwahangana. 26N'engulu y'omwatsi oyo moyatsungana omo kihugo kyosĩ ekyo. 27Neryo Yesu abere abĩlũaho, esyondĩmatĩme ĩbĩrĩ mosyamukwama, ibakabirikira kutsibu bati, Utuganyire, uwe Mugala wa Dawĩdĩ! 28Neryo Yesu abere abingira omo nyũmba, esyondĩmatĩme esyo mosyamũhĩkako, neryo Yesu mwabũlyabo ati, Mwĩkĩrĩrye muti, nangatoka erikola ekĩ kwehĩ? Nabo mobamubwira bati, Ega Mukama. 29Neryo Yesu mwatũla oko meso wabo, ati, Likoleke ũkw'ĩnywe ng'erĩkĩrĩrya lyenyũ! 30Neryo ameso wabo mwalĩbũkala. Kandi Yesu mwahanabo kutsibu ati, Simubwire mundu omwatsi oyũ. 31Nĩkwa mobahuluka, mobatsũnganĩa engulu ya Yesu omo kihugo kyosĩ ekyo. 32Neryo omugulu bahuluka, lebaya mobaletera Yesu y'emũmũ oyuli kw'embĩnga. 33Neryo embĩnga eyo yabere yabihigirwa eyĩhya, emũmũ eyo moyabũga, n'endeko mobasweka bati, Erĩtsũka na kera ekĩsosĩre ekĩ sikyekyatalolwako omo Ĩsraelĩ! 34Nĩkwa Abafarĩsayo mobabũga bati, Omũtabalĩ w'esyombĩnga yukaleka iniahigira esyombĩnga sy'eyĩhya. 35Kandi Yesu mwalendera omo mĩyĩ yosĩ n'oko hĩyĩ hyosĩ, iniakakangĩrĩraya omo manyũmba wabo w'erĩhĩndanamo, n'erĩtũlaganĩa Engulu Yowene y'Obwami, n'erĩlamya obuli mũsĩndo w'endwala n'obuli mũsĩndo w'obũkoni. 36Neryo Yesu abere alangira esyondeko, mwakwĩrasyo bũlĩge, kusangwa mobagalwa n'eriluha ng'esyombũlĩ sitawite mũlĩsya. 37Neryo Yesu mwabwira abiga buwe ati, Eby'erigesa ni bingi, nĩkwa abangagesa ni bake. 38Neryo musabe Omukama w'erigesa yo kutsibu atume abahĩngĩ omw'igesa liwe.

will be added

X\