MATAYO 8

1Neryo Yesu mwandagala akalũa oko kitwa, n'esyondeko nene mosyamukwama. 2Neryo lebaya, omuhaga mwamũhĩkako, neryo mũnama embere siwe erĩmũramya ati, Mukama, wamabya ũnanzĩre, wangatoka erĩnyĩlamya. 3Yesu mwakakya ebyala biwe mwamũtũlako ati, Nyĩnanzĩre, ũlamĩbawe! Neryo-neryo ebihaga biwe mobyalamĩbwa. 4Neryo Yesu mwamubwira ati, Subwire mundu, nĩkwa ugende ũyĩkanganaye oko mũhererĩ, kandi uhere obuhere obo Musa ahamula, busana n'erĩmĩnyĩsyabo ko wabirilama. 5Neryo omugulu ingira eKapernaũmũ, omukulu w'abasĩrĩkanĩ w'Abaroma mwahĩndana naye, mwamulemba-lemba ati, 6Mukama, omugombe wage ali eka alwere obũkonĩ bw'eribasa, kandi akagalawa kutsibu. 7Yesu mwamubwira ati, Ngandiyayo n'erĩyamũlamya. 8Nĩkwa omukulu w'abasĩrĩkanĩ mwamũsũbĩrya ati, Mukama, sinyitolere ũkahĩka omwage, nĩkwa ũbũge ekĩnywa kisa, n'omugombe wage akandĩlamĩbwa. 9Nage nibya indi mundu oyuwite abakanyihamula, kandi ngwite abasĩrĩkanĩ bage; ngabwira oyũ nyiti, Ugende, iniagenda; kandi ngabwira ogundi nyiti, Wase, iniasa; kandi ngabwira omugombe wage nyiti, Ukole ekĩ, iniakolakyo! 10Neryo omugulu Yesu owa ekĩ, mwasweka, neryo mwabwira abandu abamukwama ati, Kwenene ngabũga nenyũ nyiti, Sinditabana erĩkĩrĩrya ĩnene ng'erĩ omo Baĩsraelĩ. 11Kandi ngababwira nyiti, abangi basyalũa eyo eryuba likahulukira n'eyo eryuba likalengera, basyĩkala oko mesa haguma na Abrahamũ, na Ĩsaka, na Yakobo, omo Bwami bw'elubula. 12Nĩkwa abana b'Obwami basyaguswa omo mwĩrĩmya w'eyĩhya; eyo hasyabya eririra n'erikeregeta ameno. 13Neryo Yesu mwabwira omukulu w'abasĩrĩkanĩ oyo ati, Ugende, ukolerawe ngoko wabĩrĩkĩrĩrya. N'omugombe wuwe mwalamĩbwa oko ndambĩ eyo. 14Yesu abere ahĩka ewa Petero, neryo mwalangira nyĩnyĩ-byala wa Petero iniali omo ngingo inialwere erĩhũhana ly'omubiri. 15Neryo Yesu mwatũla oko byala biwe, n'erĩhũhana eryo molyamũlũako, neryo mwahangana mwatsũka erimukolera. 16Neryo bwabere bwabya ĩgolo-golo, abandu mobaletera Yesu y'abandi abali kw'esyombĩnga Nĩkwa Yesu mwahiga ebĩrĩmũ bibi ebyo omo kĩnywa kisa, mwalamya abosĩ ababya balwere. 17Mwakola ebĩ erĩberererya ebyabũgawa n'omũmĩnyererĩ Ĩsaya, ati, Iye ĩyowene mwĩmya amagalĩ wetu, kandi mwaheka esyondwala syetu. 18Neryo omugulu Yesu alangira endeko iyabirimũtĩmbako, mwahamula erisokera eyisirya w'engetsi. 19Neryo omũkangĩrĩrya muguma w'Emigambo mwamũhĩkako, mwamubwira ati, Mũkangĩrĩrya, nasyakukwama ehosĩ eyo ukandisyagenda. 20Nĩkwa Yesu mwamubwira ati, Esyoboha siwite ebyũna, n'esyonyonyũ sy'omo kyanya siwite esyonyutu, nĩkwa Omugala w'Omundu siawite aho angagotserya omutwe wuwe. 21N'ogundi mwiga mwamubwira ati, Mukama, uleke ngatsũka eriyata tata wage. 22Nĩkwa Yesu mwamubwira ati, Unyikwame. Uleke abaholĩ bate abaholĩ babo. 23Neryo Yesu abere ingira omo bwato, abiga buwe mobamukwama. 24Neryo ekihunga kinene mokyahuluka omo ngetsi, kyaleka ebisunda ĩbyakũnĩnga obwato. Nĩkwa Yesu abya agotsere. 25Neryo abiga mobahĩka uku Yesu, mobamũbũkya bati, Mukama, ũtũlamaye! Tukahwa! 26Neryo Yesu mwabwirabo ati, Busana nakĩ mukubaha kwehĩ? Ĩnywe bandu b'erĩkĩrya ĩke! Neryo Yesu mwahangana, mwakunga ekihunga n'engetsi, neryo mohahita esĩsyerere. 27Neryo abandu mobasweka bati; Omundu oyũ ni wa mũsĩndokĩ kwehĩ? Ekihunga n'engetsi bikamukenga! 28Neryo Yesu mwahĩka eyisirya w'engetsi omo kihugo ky'Abagerase. Nĩkwa abandu babiri abali kw'esyombĩnga mobahĩndana na Yesu ĩbakalũa eyiri amasinda. Babya kakalĩre kutsibu isihali mundu oyukatoka erilaba omo nzira eyo. 29Neryo lebaya, abandu abo mobalaka bati, Tuli na mwatsi wahi nawe, uwe Mugala wa Nyamuhanga, kwehĩ? Ũkahĩka hano erĩtwagalya embere w'omugulu kwehĩ? 30Neryo hakũhĩ n'aho habya ekihangulo ky'esyongulube nyingi isikalya ebiti. 31Esyombĩnga esyo mosyalemba-lemba Yesu siti, Wamabya ukandituhigira eyĩhya, ututume omo kihangulo ky'esyongulube. 32Neryo Yesu mwabũga nasyo ati, Mugende! Nasyo mosyalũa kubo, mosyaya omo syongulube, neryo ekihangulo kyosĩ mokyatibita ahasenzere omo ngetsi mosyaholera omo magetsi. 33Neryo abalĩsya mobatibita, mobaya oko mũyĩ, mobatũla omwatsi gosĩ, n'omwatsi w'abandu ababya kw'esyombĩnga. 34Neryo abandu bosĩ b'oko mũyĩ oyo mobayahĩndana na Yesu; n'omugulu bamulolako mobamulemba-lemba bati, alũe omo kihugo kyabo.

will be added

X\