MATAYO 7

1Simutswere abandi, mukasyatswerwa na Nyamuhanga. 2Kusangwa omũsĩndo mukatswera, gona Nyamuhanga asyabatsweramo; n'olulengo olo mukalengamo, asyabalenga mulo. 3Kandi busana nakĩ ukalangira akati akali omo lĩso lya mũlĩkenyũ, nĩkwa sulilangira ekĩtĩka ekiri omo lĩso lyawe kwehĩ? 4Kutse wasyabwira mũlĩkyenyũ uti kwehĩ, uti, Uleke nyilole akati akali omo lĩso lyawe, nĩkwa lebaya, ekĩtĩka kiri omo lĩso lyawe. 5Uwe mũtebya! Ũtsũke erilola ekĩtĩka ky'omo lĩso lyawe, neryo wasyalangira ndeke erilola akati akali omo lĩso lya mũlĩkyenyũ. 6Simuhe esyombwa sy'ekĩbũyĩrĩre, kandi simuguse esyolulu syenyũ embere w'esyongulube, sikasyalyatangirirasyo omo bisando byasyo, kandi isyabinduka n'eribatulanga. 7Mũbũlaye, mwasyahabwakyo; musonda-sondaye, neryo mwasyabanakyo; mukongote oko lũyĩ, neryo mwasyakingulirwalo. 8Kusangwa oyũkabũlaya, asyangirirakyo; n'oyukasonda-sonda, akabanakyo; n'olũyĩ lwasyakingukala oko yukakongota oko lũyĩ. 9Nindi ũkw'ĩnywe abotata oyo wangaha mugala wuwe erĩbwe omugulu akamũbũlaya obundu kwehĩ? 10Kutse mugala amamũbũlya erĩhere, anganamuha enzoka kwehĩ? 11Nomo mune babi, mũnasĩ eriha abana benyũ b'olũsũnzo lubuya. Tata wenyũ oyuli elubula sĩalabĩre aho eriha ebindu bibuya oko bakamũbũlaya kwehĩ? 12Ebyosĩ ebyo mwanzĩre abandu ibabakolera, nenyũ mukolerebo mutya; kusangwa Emigambo ya Musa n'erĩkangĩrĩrya ly'abamĩnyererĩ ko bakabũga batya. 13Mwingire omo lũkyo luke; kusangwa olũkyo ni lunene, n'enzira ni nene-nene eyĩkalolaya okw'ihera, kandi ni bangi abakingira omo lũkyo olo. 14Nĩkwa olũkyo ni luke, n'enzira ni nge eyĩkalolaya oko ngebe, n'abandu ni bake abakabanayo. 15Mũyĩtegaye busana n'abamĩnyererĩ b'amabehĩ, abakabahĩkako ĩbayĩsosekenĩe ng'esyombũlĩ, nĩkwa omwisi w'emitima yabo ni mbwa sy'omolĩ esĩkalĩre kutsibu. 16Mwasyaminyererabo busana n'emĩbĩrĩ yabo. Ebĩgũma by'ebĩnyũ bikohawa oko misakisaki, kutse emĩtĩnĩ yikohawa oko matolũ kwehĩ? 17Omuti mubuya akahetaya ebĩgũma byowene, nĩkwa omuti mubi akahetaya ebĩgũma bibi. 18Omuti owene sialitoka erĩhetya ebĩgũma bibi, kutse omuti mubi sialitoka erĩhetya ebĩgũma byowene. 19Obuli muti owatehetaya ebĩgũma byowene akakondawa n'eriguswa omo muliro. 20Neryo mwasyaminyerera abamĩnyererĩ b'amabehĩ busana n'emĩbĩrĩ yabo. 21Si yo mundu oyukanyahula ati, Mukama, Mukama, yo wasyingira omo Bwami bw'elubula; nĩkwa yo n'oyukakola erisonda lya Tata wage oyuli elubula. 22Omugulu ekiro ekyo kyasyasa, abandu bangi basyabũga nage bati, Mukama, Mukama! Omo lĩna lyawe motũtatũla omwatsi wa Nyamuhanga kwehĩ? N'omo lĩna lyawe motutahiga esyombĩnga kwehĩ? Kandi omo lĩna lyawe motutakola ebitiko-tiko bingi kwehĩ? 23Neryo nasyabwirabo nyiti, Mondabaminya na kera. Mũlũe aho nyiri, ĩnywe bakola-nabi. 24Neryo, obuli mundu oyũkowa ebĩnywa byage ebĩ n'erikolabyo, asyasosekanĩbwa ng'omundu w'amenge, oyo wahĩmba enyũmba yiwe y'okw'ĩbwe. 25Embũla moyawa, n'esyonyũsĩ mosyasenda, n'ekihunga mokyabuhirira, mobyayĩswĩrya oko nyũmba eyo. Nĩkwa moyitatera, kusangwa yahandawa okw'ĩbwe. 26Kandi obuli mundu oyũkowa ebĩnywa byage ebĩ atekolabyo, asyasosekanĩbwa ng'omundu mũkĩrũ, oyo wahĩmba enyũmba yiwe y'oko musege. 27Neryo embũla moyawa, n'esyonyũsĩ mosyasenda, n'ekihunga mokyabuhirira, mobyayĩswĩrya oko nyũmba eyo, nayo moyatera. N'eritera lyayo molyabya ĩnene. 28Yesu abere abibuga erĩkanĩa emyatsi eyĩ, esyondeko mobasweka busana n'erĩkangĩrĩrya liwe. 29Kusangwa abya akakangĩrĩrya ng'oyuwite hamũlĩ, butsira ng'abakangĩrĩrya babo b'emigambo.

will be added

X\