MATAYO 6

1Mũyĩtegaye simukole ebibuya byenyũ embere sy'abandu erilolwako nabo. Mwamakola ebibuya byenyũ embere sy'ahandu, simwendisyabana oluhembo lwa Tata wenyũ oyuli elubula. 2Neryo omugulu ũkahĩtaya, sigubuhe ngubi emuliro wawe, ng'abakayĩtendereraya ko bakakola omo manyũmba w'erĩhĩndanamo n'omo syombalu, bati bapipawe n'abandu. Kwenene ngababwira nyiti, bawite oluhembo lwabo losĩ. 3Nĩkwa omugulu ũkahĩtaya, suleke ebyala byawe by'amalembe bikaminya ebyo byala by'amali bikakola. 4Neryo erĩhĩtya lyawe libye omo bũbĩso-bĩso. Na Tata wawe oyukalangira bũbĩso-bĩso asyakuhemba. 5Omugulu mukasaba, isimwabya ng' abatebya! Kusangwa banzĩre erihangana n'erisaba omo manyũmba w'erĩhĩndanamo n'omo syongonde sy'esyombalu, balolaweko n'abandu. Kwenene ngababwira nyiti, Bawite oluhembo lwabo losĩ. 6Nĩkwa uwe, omugulu ukasaba, wingire omo kisenge kyawe, neryo wabikinga olũyĩ, iwasaba Tata wawe oyuli mo bũbĩso-bĩso. Na Tata wawe oyukalangĩra mo bũbĩso-bĩso, asyakuhemba. 7Kandi omugulu mukasaba, simubye mukasubirira omo bĩnywa bitya-bitya, ngoko Ebihanda bikakola, kusangwa bakaganiraya bati basyogũbwa busana n'ebĩnywa byabo bingi. 8Neryo simubye ngabo; kusangwa Tata wenyũ anasĩ ebibali bwaga, isimwemwamusaba. 9Neryo ko musabe mutya, muti, Tata wetu oyuli elubula, Erĩna lyawe ribye rĩbũyĩrĩre. 10Obwamr bwawe bwase. Erisonda lyawe liyirawe, Omo kihugo ngoko liri omo lubula. 11Utuhe mũnabwĩre akalyo ketu akatutolere. 12Utubuyire amalolo ago twabirikola; ngoko tukabuyira abandi b'amalolo ago bakatukolera. 13Sĩgũtwĩngĩraye omw'irengwako, nĩkwa ũtũlamaye oko mubi. Kusangwa obwami ni bwawe, n'obũtokĩ, n'olukengerwa, kera na kera. Amina. 14Kusangwa mwamabuyira abandu kw'amalolo ago babiribakola, Tata wenyũ w'elubula, asyababuyira nibya. 15Nĩkwa mwamatindabuyira abandi b'amalolo bakabakolera, Tata wenyũ siendisyababuyira amalolo ago mwabirikola. 16Omugulu mukatsira akalyo, simubye n'obũsũ bũtsandĩre ng'abatebya ko bakakola. Kusangwa bakatsandaya amũsũ wabo bati balolaweko n'abandu ng'abandu bakatsira akalyo. Kwenene ngabũga nenyũ nyiti, Banawite oluhembo lwabo losĩ. 17Nĩkwa uwe omugulu ukatsira akalyo, ũhakabaye omutwe wawe w'amagũta, kandi ũnabaye obũsũ bwawe. 18Eritsira lyawe ly'akalyo sirilolaweko n'abandu, nĩkwa Tata wawe oyuli bũbĩso-bĩso asyaminya. Kandi Tata wawe oyũkalebaya bũbĩso-bĩso, asyakuhemba. 19Simuyibikire bindu muna-kihugo, aho ehinyurugunzu n'amakenge bĩkaheraya, kandi aho abarahĩ bakatula n'erĩĩba. 20Nĩkwa muyibikire ebindu elubula, aho ehinyurugunzu n'amakenge bĩteheraya, kandi aho abarahĩ sibetula n'erĩĩba. 21Kusangwa ahali ebindu byawe, ho mutima wawe asyabya nibya. 22Etala y'omubiri lye rĩso; omugulu erĩso lyawe lĩkakoleraya, omubiri wawe gosĩ asyũsũla n'ekyakakala. 23Nĩkwa erĩso lyawe lyamabya libi, omubiri wawe gosĩ asyũsũla m'omwĩrĩmya. Neryo ekyakakala ekiri omwisi wawe kyamabya mwĩrĩmya, omwĩrĩmya oyo ni munene kutsibu! 24Sihali mundu oyo wangatoka erikolera abakama babiri; kusangwa asyakwa omuguma y'obusu, n'erianza ogundi. Kutse asyabegera oko muguma, iniapona ogundi. Simwangatoka erikolera Nyamuhanga n'ebindu. 25Busana n'omwatsi oyũ, ngababwira nyiti, Sĩmũyĩlũhaye n'amaganĩryo busana n'engebe yenyũ, muti, mwasyalyakĩ, kutse busana n'omubiri, nga mwasyambalakĩ. Kusangwa engebe sĩyĩrengĩre byalya, n'omubiri sĩalengĩre esyongimba kwehĩ? 26Musamalire esyonyonyũ sy'omo kyanya; kusangwa sisyebiba, kutse sisyegesa, kutse erĩhĩrabyo omo bigona; nĩkwa Tata wenyũ w'elubula akalĩsayasyo. Nenyũ simuli b'obũgũlĩ bunene kwilabasyo kwehĩ? 27Kandi nindi kwĩnywe amayĩlũhya busana n'amaganĩryo angatoka eriyitomekera oko myaka yiwe kwehĩ? 28Kandi busana nakĩ mũkayĩlũhaya omo maganĩryo busana n'esyongimba kwehĩ? Mũlebaye ebiranga-ranga by'omolĩ ngoko bikalasa. Sibyenuba, kutse eriluka esyongimba. 29Nĩkwa ngababwira nyiti, Solomono omo lukengerwa luwe losĩ mwatambala ndeke ng'omusanga muguma oyũ. 30Nĩkwa Nyamuhanga oyũkambalaya ebiti by'omolĩ, ebikabyaho mũnabwĩre n'omo ngyakya bikagusawa omo lĩko, siendĩsyabambalya kwilaba aho ĩnywe bandu b'erĩkĩrĩrya ĩke kwehĩ? 31Neryo sĩmũyĩlũhaye n'amaganĩryo muti, Twasyalyakĩ, kutse twasyapũlyakĩ, kutse twasyambalakĩ kwehĩ? 32Kusangwa ebihanda bikasonda-sondaya ebindu byosĩ ebĩ byo kutsibu. Tata wenyũ w'elubula anasĩ ebyosĩ ebibali bwaga. 33Nĩkwa mũtsũke erisonda Obwami bwa Nyamuhanga n'eritunganene riwe, naye asyabaha ebindu byosĩ ebĩ. 34Neryo sĩmũyĩlũhaye n'amaganĩryo busana n'omo ngyakya; kusangwa engyakya yasyabya n'amaganĩryo wayo. Obuli kiro kiwite obũlĩge bungaho.

will be added

X\