MATAYO 5

1Neryo omugulu Yesu alangira esyondeko mwahetukira oko kitwa; neryo abere abĩkala, abiga buwe mobahĩka aho ali. 2Neryo mwatsũka erĩkangĩrĩryabo ati, 3Obutseme buli oko basĩ ko bali n'obwaga bwa Nyamuhanga, Kusangwa Obwami bw'elubula ni bwabo! 4Obutseme buli oko bali n'obũlĩge, Nyamuhanga asyakĩranĩabo! 5Obutseme buli oko b'omutima molo, Nyamuhanga asyahabo ebyo alaga! 6Obutseme buli n'abanzĩre kutsibu erikola ekitunganene ekyo Nyamuhanga anzĩre. Kusangwa Nyamuhanga asyaha kyobo ndeke! 7Obutseme buli oko bakaganyira abandi, Kusangwa Nyamuhanga asyaganyirabo! 8Obutseme buli n'ab'omutima mubuya, Kusangwa basyalola uku Nyamuhanga! 9Obutseme buli oko bakahĩra obuholo: Kusangwa Nyamuhanga asyahulabo mo bana buwe! 10Obutseme buli oko babĩrĩendererĩbwa busana n'eritunganene, Kusangwa Obwami bw'elubula ni bwabo! 11Obutseme buli nenyũ omugulu abandu bakabatsuma n'erĩbendererya, n'eribalega omo mĩsĩndo yosĩ y'ebibi n'amabehĩ busana n'omwatsi wage. 12Mutseme, mutsange kutsibu, kusangwa oluhembo lwenyũ ni lungi elubula. Ko banendereraya batya abamĩnyererĩ ababya embere syenyũ. 13Ĩnywe muli mũnyũ w'ekihugo Nĩkwa omũnyũ amatalya obusi bwago, asyaswabana obusi bwago bw'ati kwehĩ? Ĩsyowene busana na kindu; lye n'eriguswa eyĩhya inialyatangirirwa n'abandu. 14Ĩnywe muli kyakakala ky'ekihugo. Omũyĩ owahĩmbĩre oko kitwa sialitoka erĩbĩsama. 15Sihali mundu oyũkakaya etala n'erĩhĩrayo omwisi w'ekitiri; nĩkwa akahĩrayo oko mbaniko, neryo ĩyakolerya abosĩ abali omo nyũmba. 16Muleke ekyakakala kyenyũ kĩkoleraye kitya embere sy'abandu, balangire emĩbĩrĩ yenyũ mibuya, bapipe Tata wenyũ oyuli elubula. 17Sĩmũganĩraye muti nasa erisangula Emigambo ya Musa n'erĩkangĩrĩrya ly'Abamĩnyererĩ. Mondasa erisangulayo, nĩkwa monasa erĩberereryayo. 18Kusangwa ngabũga nenyũ kwenene, nyiti, Erĩhĩka aho lubula n'ekihugo byasyahweraho, sihali akakwararĩ kutse katondĩ k'oko Migambo akakandĩsyalũa oko Migambo erĩhĩka aho ebyosĩ byasyabererera. 19Neryo omundundi oyo wasyaketa ekiguma kike ky'oko mahano aya, n'erĩkangĩrĩrya abandu atya, asyahulwa mo muke kutsibu omo Bwami bw'elubula; nĩkwa omundundi oyũkaberereraya n'erĩkangĩrĩryabyo, asyahulwa mo mukulu omo Bwami bw'elubula. 20Kusangwa ngababwira nyiti, Eritunganene lyenyũ lyamatendilaba eritunganene ly'abakangĩrĩrya n'ery'Abafarĩsayo, simwendisyingira omo Bwami bw'elubula. 21Mwabĩrĩowa ngoko abakera babwirawa ambu, Sũsyĩta; n'oyũkĩta ali k'omusango w'eritswera. 22Nĩkwa ngababwira nyiti oyukahitana uku mugala wabo asyaletwa embere w'omũtswerĩ, kandi oyũkabũga na mugala wabo ati, uwe mbulamugaso; asyabya n'omusango embere w'erĩbũgĩro ly'abatswerĩ; n'oyũkabũga ati, Uwe mũkĩrũ! Asyabya n'omusango w'eriya omo muliro w'eKũlĩmũ. 23Neryo wamabya ukaleta olũsũnzo lwawe oko kiherero kya Nyamuhanga, ukibuka ngoko mũlĩkyenyũ ali n'olubanza uk'uwe, 24ũsĩganaye olũsũnzo lwawe embere sy'ekiherero, ugende lũba uku mũlĩkyenyũ, musangane naye, neryo iwasa n'erireta olũsũnzo lwawe uku Nyamuhanga. 25Usangane lũba n'omũtsongerĩ wawe imukinagenda okw'ĩbũgĩro; omũtsongerĩ wawe siakutwale oko mũtswerĩ, n'omũtswerĩ iniakuha oko mũpolĩsĩ, iwaguswa omo mũlĩkĩ. 26Kwenene ngakubwira, sĩwendĩsyalũa eyo ute waliha esengĩ eyikabugirira olubanza olo. 27Mwabĩrĩowa ngoko kyabũgawa kiti, Susyesĩngĩra. 28Nĩkwa ĩngye ngababwira nyiti, Obuli mundu oyukasamalira omũkalĩ n'engumbu nyibi iniamabimũsĩngĩra omo mutima wuwe. 29N'erĩso lyawe ly'amali lyamaleka iwakola ebibi, ukuleryo, uguseryo! Kusangwa lyowene uk'uwe ekĩtsũko kiguma ky'omubiri wawe ikyahera. kwilaba omubiri wawe gosĩ eriguswa eKũlĩmũ. 30N'ebyala byawe by'amali byamaleka iwakola ebibi, ũtwebyo, ugusebyo! Lyowene uk'uwe ekĩtsũko kyawe kiguma ikyahera kwilaba omubiri wawe gosĩ eriya omo Kũlĩmũ. 31Kandi kyabũgawa kiti, Oyukakomola mũkalĩwe, amuhe engomolo y'erimuhiga. 32Nĩkwa ĩngye ngababwira nyiti, Obuli mundu oyukakomola omũkalĩ wuwe, butsira busana n'omwatsi w'erĩsĩngĩra, akaleka ĩnĩasĩngĩra, n'omundu oyũkahĩkaya omũkalĩ oyuliakomolawa iniamasĩngĩra. 33Kandi mwabĩrĩowa ngoko abandu ba kera babwirawa ambu, Susyelahĩraya n'amabehĩ, nĩkwa wasyakola oko Mukama ebyo walahĩraya. 34Nĩkwa ngakubwira nyiti, Sũlahĩraye n'ahake; kutse n'elũbula, kusangwa nĩ kĩtũmbĩ ky'obwamĩ kya Nyamuhanga. 35Kutse sũlahĩraye n'ekihũgo, kusangwa nĩ kĩtũmbĩ ky'ebisando biwe; kutse busana n'eYerũsalema, kusangwa nĩ mũyĩ w'Omwami Mukulu. 36Sũsyelahĩraya n'omũtwe wawe, kusangwa siwangatoka eriyira oluywiri luguma mo lweru kutse mo lwĩragũlũ. 37Nĩkwa erĩbũga lyenyũ libye, ega, ega, kutse iyihi, iyihi! Ebĩrengĩre ebĩ ni by'omubi. 38Mwabĩrĩowa ngoko byabũgawa biti, Erĩso busana n'erĩso, n'erĩno busana n'erĩno. 39Nĩkwa ĩngye ngakubwira nyiti, Sũkĩsaye oyukakukolera nabi; nĩkwa oyũkakũswĩraya oko lĩtema lyawe ly'amali, ũmũbĩndũkĩraye n'erindi. 40N'omũndu oyukasonda erikutsongera, iniakaheka ekanzu yawe, uleke abye n'erĩkotĩ ryawe nibya. 41Kandi omundu oyukakuhatikana eriya oko kilometre kiguma, ugende naye ebilometre bibiri. 42Kandi omundu amakũbũlya kindu, umuhekyo, kandi siguyĩloleraye oko yukasonda eriyibweka uk'uwe. 43Mwabĩrĩowa ngoko kyabũgawa kiti, Wanze mũlĩkyenyũ, ũkwe enzĩgũ yawe y'obusũ. 44Nĩkwa ĩngye ngababwira nyiti, Mwanze esyonzĩgũ syenyũ, musabire abakabendereraya, 45imwatoka eribya bagala ba Tata wenyu oyuli elubula. Kusangwa, akahũlũkaya eryuba liwe oko babi n'oko babuya, kandi akatuma embũla oko batunganene n'oko batatunganene. 46Kusangwa mwamanza ababanzĩre, mwasyahemberwakĩ kwehĩ? Abasolesya sibekola batya kwehĩ? 47Kandi mwamabũkya abalĩkyenyũ basa, imwamakola ebĩrengĩre eby'abandi byo muti kwehĩ? Ab'ebihanda sibekola batya kwehĩ? 48Neryo mubye abahĩkene, ngoko Tata wenyũ w'elubula ahĩkene.

will be added

X\