MATAYO 4

1Neryo Omũlĩmũ mwasondola Yesu omo mbwarara, eSatanĩ imulengeko. 2Neryo abere atsira akalyo emisibo makũmĩ ani n'ebiro makũmĩ ani, mwakwa enzala. 3Neryo Satanĩ oyukalenga abandu, mwasa mwamubwira ati, Wamabya uli Mugala wa Nyamuhanga, ubwire amabwe aya abye mandu. 4Nĩkwa Yesu mwamũsũbĩrya ati, Amasako akabũga ati, Omundu siendisyabyaho busana n'obundu ĩbobwene, nĩkwa busana n'obuli kĩnywa ekĩkalũa omo buno bwa Nyamuhanga. 5Kandi Satanĩ mwatwala Yesu y'oko Mũyĩ Abũyĩrĩre; neryo mwamũhĩra oko litungulu ly'eHekalũ, 6ati, Wamabya uli Mugala wa Nyamuhanga, uyiguse ahisi; kusangwa Amasako ati, Nyamuhanga ayahamula abamalaĩka buwe busana nawe, Basyakubagalira omo byala byabo, Isiwahuma ekisando kyawe ky'okw'ĩbwe. 7Yesu mwabwirayo ati, Kandi Amasako ati, Susyerenga oko Mukama Nyamuhanga wawe. 8Kandi Satanĩ mwatwala Yesu y'oko kitwa kiri-kiri, mwamũkangya amami gosĩ w'ekihugo n'olukengerwa lwago. 9Neryo Satanĩ mwabwira Yesu ati, Ebyosĩ ebĩ nasyakuhabyo wamanyĩkũkamira n'erĩnyĩramya. 10Yesu mwabwirayo ati, Lũaho, uwe Satanĩ! Kusangwa Amasako ati, Wasyaramya Omukama Nyamuhanga wawe, kandi wasyamukolera ĩyowene. 11Neryo Satanĩ mwamũsĩganĩa; nĩkwa abamalaĩka mobasa n'erikolera Yesu. 12Neryo omugulu Yesu owa ko Yoane abĩrĩhĩrwa omo mũlĩkĩ, Yesu mwaya eGalĩlaya. 13Neryo Yesu mwalũa eNazaretĩ, mwayĩkala eKapernaũmũ, omũyĩ owali hakũhĩ n'engetsi y'eGalĩlaya, omo kihugo kya Zebũlũnĩ na Nafũtalĩ. 14Ekĩ kyakolawa erĩberererya ebyo mũmĩnyererĩ Isaya abũga ati, 15Ekihugo kya Zebũlũnĩ, n'ekihugo kya Nafũtalĩ, Ebwanga bw'engetsi, eyisirya w'eYorodanĩ, eGalĩlaya y'Ebihanda! 16Abandu abĩkere omo mwĩrĩmya, Mobalangira ekyakakala kinene! Kandi busana n'abĩkere omo kihugo n'omo kyũtsũtsũ ky'oluholo, Ekyakakala kyamakoleryabo! 17Erĩtsũka oko mugulu oyo Yesu mwatsũka erĩtũlaganĩa ati, Mubindule emitima yenyũ erireka ebibi, kusangwa obwami bw'elubula buli hakũhĩ! 18Neryo Yesu abere akalendera hakũhĩ n'engetsi y'eGalĩlaya, mwalangira ababiri abasubeneko, Sĩmonĩ oyukahulawa mo Petero, na Anderea, mugala wabo, ibakagusa ekĩsohĩ ky'omo ngetsi; kusangwa babya basohĩ. 19Neryo Yesu mwabwirabo ati, Munyikwame, nage nasyabayira mo basohĩ b'abandu. 20Neryo-neryo mobasĩganĩa ebĩsohĩ byabo, mobakwama Yesu. 21Neryo mwagenda embere yo hake, mwalangira abandi babiri, Yakobo mugala wa Zebedayo, na Yoane mugala wabo. Babya omo bwato haguma na tata wabo ye Zebedayo, ibakalanda ebĩsohĩ byabo. Neryo Yesu mwabirikirabo. 22Neryo-neryo mobasĩganĩa ĩse wabo, n'obwato, mobakwama Yesu. 23Kandi Yesu mwatĩmba eGalĩlaya hosĩ, erĩkangĩrĩrya omo manyũmba wabo w'erĩhĩndanamo, n'erĩtũlaganĩa Engulu Yowene. y'Obwami, n'erĩlamya abandu b'obuli mũsĩndo w'endwala, n'obuli mũsĩndo w'obũkonĩ omo katĩkatĩ k'abandu. 24Neryo engulu yiwe moyatsungana omo kihugo kyosĩ ky'eSũrĩa. Kandi mobamuletera abakonĩ bosĩ, abagalawa omo mĩsĩndo-mĩsĩndo y'esyondwala n'amagalĩ, n'abali kw'esyombĩnga, n'abatũtsa, n'ababasĩre, nĩkwa Yesu mwalamya abosĩ. 25N'esyondeko nene mosyamukwama ĩbakalũa eGalĩlaya, n'omo kihugo ky'eMĩyĩ Ĩkũmĩ, n'eYerũsalema, n'e Yũdea, n'eyisirya w'eYorodanĩ.

will be added

X\