MATAYO 3

1Oko biro ebyo Yoane Mũbatĩsya mwahĩka, iniakatũlaganaya omwatsi omo mbwarara y'eYũdea, ati, 2Mubindule emitima yenyũ erireka ebibi, kusangwa obwami bw'elubula buli hakũhĩ! 3Yoane yo mundu oyo mũmĩnyererĩ Ĩsaya ahula ati, Omulenge w'oyukabirikirira omo mbwarara ati, Mowanaye enzira y'Omukama, Mũtũngananaye esyombalu siwe! 4Esyongimba sya Yoane syabya sy'obweya bw'engamia, kandi mwambala omukoba w'ekihu omo mbindi yiwe, kandi iniakalya esyongĩke n'obuki bw'omolĩ. 5Abandu mobahĩka uku Yoane ĩbakalũa eYerũsalema, n'eYũdea hosĩ, n'ebihugo bĩhererenĩe n'eYorodanĩ. 6Mobakangya ebibi byabo, neryo Yoane mwabatĩsyabo omo lũsĩ lw'eYorodanĩ. 7Neryo Yoane abere alangira Abafarĩsayo n'Abasadũkayo bangi bakahĩka busana n'erĩbatĩsĩbwa, mwabwirabo ati, Ĩnywe bana b'esyonzoka, nindi wabahana erisaga erikarama erĩkandĩsyahĩka kwehĩ? 8Mukole emĩbĩrĩ eyikaleka abandu ibaminya ko mwabiribindula emitima erireka ebibi byenyũ. 9Sĩmũganĩraye mukayibwira muti, Abrahamũ ni tata wetu. Ngababwira nyiti, Nyamuhanga angatoka erĩhanganĩa amabwe aya mo bana busana na Abrahamũ. 10Kandi embasa ĩnĩkĩrye oko mĩrĩhĩ y'omuti. Obuli muti owatehetaya ebĩgũma byowene akakondawa n'eriguswa omo muliro. 11Nĩkwa ingye ngababatĩsaya omo magetsi erĩkangya ngoko mwabiribindula emitima yenyũ erireka ebibi; nĩkwa oyukandisyasa enyũma kwĩngye asyababatĩsya omo Mũlĩmũ Abũyĩrĩre n'omo muliro. Kandi anyĩrengĩrye maka, nage sĩnyitolere erimuhekera esyongendero siwe. 12Omũhũmbo wuwe ali omo byala biwe erĩhũmbĩra engano omo kibuga kiwe n'erĩhĩra engano yiwe omo kigona, nĩkwa asyahĩsya omusunga omo muliro owatehumbera. 13Neryo Yesu mwalũa eGalĩlaya mwahika oko Yorodani, mwasa uku Yoane erĩbatĩsĩbwa. 14Nĩkwa Yoane mwalenga erĩmũganĩa, ati, Ĩngye nyitolere erĩbatĩsĩbwa nawe, kandi ũkanyĩhĩkako kwehĩ? 15Nĩkwa Yesu mwamũsũbĩrya ati, Ũnyĩrĩgĩre lino. Kusangwa omo nzira eyĩ litolere ĩtwaberererya ebitunganene byosĩ bya Nyamuhanga. Neryo Yoane mwalĩga. 16Neryo Yesu abere abĩbatĩsĩbwa, mwalũa omo magetsi. Neryo olubula molwakingukala busana naye, neryo mwalangira Omũlĩmũ wa Nyamuhanga akandagala ng'akalĩkũkũ, n'erĩmwĩkĩrako. 17Neryo omulenge mwalũa elubula ati, Oyũ ni Mugala wage mwanze, namamutsemera ndeke.

will be added

X\