MATAYO 28

1Neryo enyũma w'ekiro ky'eSabato, ekiro ky'erĩtsũka eyenga kyabere kyasonda erikya, Marĩa Magdalene n'ogundi Marĩa mobayalebya eyisinda. 2Neryo lebaya, mohabya omũsĩkĩ munene. Kusangwa omũlaĩka w'Omukama mwandagala akalũa elubula, mwahĩkaho mwakũmbagalya erĩbwe eryo, mwĩkala kulyo. 3Erisosa liwe lyabya ng'erĩpalya ly'obũtũkũ, n'esyongimba siwe syabya nyeru-nyeru ng'enzururu. 4Abateya mobatitimana busana n'erimubaha, neryo mobabya ng'abandu baholĩre. 5Neryo omũlaĩka mwabũga n'abakalĩ ati, Simubahe, kusangwa nyĩnasĩ ko mukasonda-sonda Yesu oyo wabambawa oko musalaba. 6Siali hano, abĩrĩlũbũka ngoko abũga! Mwase, mũlebaye aho Mukama alũe agotsere. 7Mugende lũba mubwire abiga buwe kw'abĩrĩlũbũka oko baholĩ, kandi lebaya, akabatanga eGalĩlaya. Eyo yo mwasyamulolerako. Lebaya, nabiribabwira. 8Neryo mobalũa okw'isinda ko lũba n'eriubaha n'obutseme bunene, mobatibita eriyabwira abiga ba Yesu. 9Neryo lebaya, Yesu mwahĩndana nabo ati, Mwabũkĩre! Neryo mobamũhĩkako, mobahamba ebisando biwe, mobamũramya. 10Neryo Yesu mwabwirabo ati, Simubahe; mugende muyabwire abagala betu baye eGalĩlaya, eyo yo basyanyilolerako. 11Neryo abakalĩ babere bakagenda, lebaya, abandi b'oko bateya mobagenda oko mũyĩ, mobayabwira abahererĩ bakulu ebyosĩ ebyabere. 12Neryo babere babĩhĩndana n'abakulu b'Abayũda n'erihanana haguma, mobaha abasĩrĩkanĩ b'esyofranka nene, 13bati, Mũbũge muti, Abiga buwe mobakahĩka omo kiro n'erĩmwĩba omugulu tũlweto. 14Kandi omũtabalĩ amowa omwatsi oyũ, twasyamwowĩsya, ĩtwababalya omwaga. 15Neryo abateya abo mobĩmya esyofranka esyo, mobakola ngoko babwirawa. Engulu eyĩ moyatsungana omo katĩkati k'Abayũda erĩhĩka mũnabwĩre. 16Neryo abiga erĩkũmĩ n'omuguma mobaya oko kitwa ky'eGalĩlaya aho Yesu ahula. 17Neryo babere balola uku Yesu mobamũramya, nĩkwa abandi mobatika-tika. 18Neryo Yesu mwasa mwabũga nabo ati, Ehamũlĩ yosĩ nabirihabwayo omo lubula n'omo kihugo. 19Neryo mugende, muyire abiga oko bihanda byosĩ; mũbatĩsayebo omo lĩna ly'Ĩse, n'ery'Omugala, n'ery'Omũlĩmũ Abũyĩrĩre. 20Mũkangĩrĩrayebo bakole ebyosĩ ebyo nabiribahana. Kandi mwibuke! Ĩngye ko ndi haguma nenyũ ebiro byosĩ erĩhĩka okw'ihwererera ly'emigulu.

will be added

X\