MATAYO 27

1Neryo bwabere bwabya tũtũtũ, abahererĩ bakulu bosĩ n'abakulu b'abandu mobaya embĩta y'erĩĩta Yesu. 2Neryo mobaboha Yesu omo mahulula, mobamutwala oko mũtabalĩ Pilato. 3Neryo Yũda, omũhoterĩ wa Yesu, abere abilangira ko Yesu amabitswerwa ambu akwe, mwabinduka, mwasũbya ebihande by'ebĩtsĩpa makũmĩ asatu oko bahererĩ bakulu n'abakulu b'Abayũda. 4Ati, Nabirikola nabi ngahotera omundu oyute n'olubanza nyiti akwe. Nabo mobabũga bati, Tutsomene ekyo kwehĩ? Olo ni lwawe! 5Neryo Yũda mwagusa ebihande by'ebĩtsĩpa ebyo by'ahisi omo Hekalũ, neryo mwalũaho, Neryo Yũda mwagenda mwayayihanika. 6Neryo abahererĩ bakulu mobĩmya ebihande by'ebĩtsĩpa bati, Siritolere omo Migambo yetu erĩhĩrabyo omo kĩbo ky'eHekalũ kusangwa ni nzwere y'omusasi. 7Neryo mobaya embĩta, mobagula kubyo kw'Ekitaka ky'Omũbũmbĩ, busana n'erita kukyo kw'abandu b'ehandi. 8Kĩkaleka ibahula ekitaka ekyo mo Kitaka ky'Omusasi erĩhĩka na mũnabwĩre. 9Neryo mobyabererera ebyabũgawa n'omũmĩnyererĩ Yeremĩa ati, Mobĩmya ebihande by'ebĩtsĩpa amakũmĩ asatu, enzwere yoyo abandu ba Ĩsraelĩ bahĩra busana naye. 10Kandi mobahabyo busana n'Ekitaka ky'Omũbũmbĩ, ngoko Mukama anyihana. 11Nĩkwa Yesu mwahangana embere w'omũtabalĩ. Naye mwamũbũlya ati, Uli mwami w'Abayũda kwehĩ? Yesu mwasũbĩrya ati, Wamabũgakyo. 12Nĩkwa mwatasũbyakĩ omugulu abahererĩ bakulu n'abakulu b'Abayũda bamuhandikirira. 13Neryo Pilato mwabũga naye ati, Sũlĩtowa emyatsi yingaha bakakuhandikirira kwehĩ? 14Nĩkwa Yesu mwatamũsũbĩrya omo mwatsi n'omuguma bamuhandikirira, kyaleka omũtabalĩ iniasweka kutsibu. 15Neryo oko buli kiro kikulu ky'Erikiruka, omũtabalĩ agenda akaboholera endeko y'omundu muguma w'omũlĩkĩ oyo banzĩre. 16Nĩkwa oko mugulu oyo babya babohĩre mundu w'omũlĩkĩ muguma oyũkũmayĩre, omundu oyukahulawa mo Baraba. 17Neryo omugulu endeko yahĩndana, Pilato mwabũga nabo ati, Mwanzĩre inababoholerandi kwehĩ? Ye Baraba, kutse Yesu oyukahulawa mo Kristo kwehĩ? 18Kusangwa Pilato abya asĩ ko bahotera Yesu busana n'erimutsura. 19Kandi omugulu Pilato abya ĩkere oko kĩtũmbĩ ky'eritswera bandu, omũkalĩ wuwe mwamutumako ati, Subye n'ahake oko mwatsi w'omundu oyutunganene, kusangwa omo kiro kya mũnabwĩre nabiriagalwa kutsibu omw'ilota busana naye. 20Nĩkwa abahererĩ bakulu n'abakulu mobatsotsererya esyondeko bati babũlaye Pilato aboholerebo Baraba, nĩkwa bati, Yesu ĩtawe. 21Nĩkwa omũtabalĩ mwabũlyabo ati, Oko babiri aba mwanzĩre inababoholera wahi kwehĩ? Nabo mobasũbĩrya bati, Ye Baraba. 22Neryo Pilato mwabũga ati, Nyĩkolekĩ na Yesu oyukahulawa mo Kristo kwehĩ? Abosĩ mobabũga bati, Abambawe oko musalaba! 23Nĩkwa Pilato mwabũlyabo ati, Amakola kibi kyahi kwehĩ? Nĩkwa mobalabya kw'aho emirenge yabo, bati, Abambawe oko musalaba! 24Neryo Pilato abere alangira kw'amalemerwa n'omwatsi, nĩkwa omwaga kw'amatsũka, mwĩmya amagetsi mwanaba oko byala embere sy'endeko ati, Sindi k'omusango w'omusasi w'omundu oyũ! Olũ nĩ lwenyũ! 25Neryo endeko yosĩ moyasũbĩrya iti, Omusasi wuwe atubyeko n'oko bana betu! 26Neryo Pilato mwaboholerabo Baraba, nĩkwa mwaswĩrya Yesu omo mikoba, neryo Pilato mwahereryabo Kristo ati abambawe oko musalaba. 27Neryo abasĩrĩkanĩ b'omũtabalĩ mobatwala Yesu oko Kikali, neryo mobahĩndanĩa omulondo gosĩ hakũhĩ naye. 28Neryo mobambula Yesu y'esyongimba siwe, mobamwambalya ekanzu y'omunyama. 29Neryo mobaluka embĩta y'amahwa, mobahĩrayo oko mutwe wuwe, kandi mobahĩra oluseke l'omo byala biwe by'amali, kandi mobamũkũkamira n'erĩmũsekererya, bati, Ukote, uwe Mwami w'Abayũda! 30Neryo mobamũtwĩra kw'amatande, kandi mobahamba oluseke olo mobatsũka erĩswĩrya Yesu oko mutwe. 31Neryo babere babĩmũsekererya, mobamwambula ekanzu eyo, mobasyamwambalya esyongimba siwe, mobamutwala eriyamubamba oko musalaba. 32Kandi babere bakalũaho mobahĩndana n'omundu akalũa eKũrene oyukahulawa mo Sĩmonĩ. Mobahatikana omundu oyo erihekera Yesu y'omusalaba wuwe. 33Neryo babere bahĩka ahakahulawa mo Gologota, eribindula liti, Ah'amahanga; 34eyo mobamuha ebĩnyũ ebĩtũlũngene n'endulu, apũlaye, neryo abere abĩgeryabyo, mwaganabyo. 35Neryo mobabamba Yesu oko musalaba, neryo mobagabana esyongimba siwe, mobakanga obukanga busana nasyo. 36Neryo mobĩkala ahisi, mobamũteya aho. 37Mobahĩra endata oko mutwe wuwe erihandikirira eryo bamuhandikirira, bati, OYŨ NI YESU OMWAMI W'ABAYŨDA. 38Kandi mobabamba abanyeyĩ babiri oko misalaba haguma na Yesu, omuguma oko luhande lw'amali, n'ogundi oko luhande lw'amalembe. 39Neryo abandu abalabaho mobatsuma Yesu, ĩbakatsĩngaya emitwe yabo, 40bati, Uwe ukasambula eHekalũ n'erĩswahĩmbayo omo biro bisatu, ũyĩlamaye! Wamabya uli Mugala wa Nyamuhanga, ũkĩme oko musalaba! 41Abahererĩ bakulu n'abakangĩrĩrya b'Emigambo n'abakulu, nabo mobasekererya Yesu bati, 42Mwalamya abandi, nĩkwa sialitoka erĩyĩlamya! Iye ni Mwami w'Abaĩsraelĩ, akĩme oko musalaba, netu twasyamwĩkĩrĩrya! 43Akayiketera Nyamuhanga, amũlamaye lino, amabya amũsĩmĩre. Kusangwa mwabũga ati, Ĩngye indi Mugala wa Nyamuhanga. 44Kandi abanyeyĩ ababambawa oko misalaba kuguma na Yesu, nabo mobamutsuma batya. 45Neryo bwabere bwahĩka saa ndatu omwĩrĩmya mwaswika ekihugo kyosĩ, erĩhĩka oko saa tĩsa. 46Neryo oko saa tĩsa Yesu mwayilakira n'omulenge munene ati, Eloĩ, Eloĩ, lama sabaktanĩ? Eribindula liti, Nyamuhanga wage, Nyamuhanga wage, busana nakĩ ũkanyĩsĩganaya kwehĩ? 47Neryo abandi ababya bahangeneho bakahulikirira, mobabũga bati, Omundu oyũ akabirikira Elĩa. 48Neryo lũba omuguma wa kubo mwatibita mwĩmya embũhũma, mũsũlya muyo mw'epada, mwahĩrayo oko luseke, mwahayo Yesu erĩpũlyayo. 49Nĩkwa abandi bati, Tulinde, tũlebaye Elĩa ng'anasa n'erĩmũlamya. 50Neryo Yesu mwaswalaka n'omulenge munene, neryo mwataswahumula. 51Neryo lebaya, olukimba olũkasũkũlĩraya ol'omo Hekalũ molwasatika mo bihande bibiri, erĩtsũka endata n'erĩhĩka ahisi. N'ekitaka mokyatitimana, n'amabwe mwasatangika. 52N'esisinda mosyalĩbũkala, neryo abandu bangi ba Nyamuhanga ababya ibabirihola, mobalũbũkĩbwa. 53Mobalũa omo sisinda enyũma w'erĩlũbũka lya Yesu, mobaya omo mũyĩ abũyĩrĩre, mobabutukira abandu bangi. 54Nĩkwa omugulu omukulu w'abasĩrĩkanĩ n'abasĩrĩkanĩ ababya haguma naye bakateya Yesu, babere balangira omũsĩkĩ, n'emyatsi eyo yabya, mobubaha kutsibu bati, Kwenene oyũ alũe Mugala wa Nyamuhanga! 55Kandi habya bakalĩ bangi ibakasamalira ibimene hali. Nabo ba babya bakakwama Yesu ĩbakalũa eGalĩlaya, ĩbakamũwatĩkaya. 56Kandi Marĩa Magdalene, na Marĩa nyĩnya wa Yakobo na Yese, na nyĩnya w'abagala ba Zebedayo babya haguma nabo. 57Neryo bwabere bwabya ĩgolo-golo, omundu w'ebindu mwasa Omunya Arĩmatea, erĩna liwe iyo Yosefũ, naye abya mwiga wa Yesu nibya. 58Omundu oyo mwasa uku Pilato, mwasaba omubiri wa Yesu. Neryo Pilato mwahamula Yosefũ ahabawego. 59Neryo Yosefũ mwĩmya omubiri wa Yesu, mwalĩngĩra kugo k'olukimba lowene lw'ekĩtanĩ. 60Neryo mwahĩrago omw'isinda yiwe nyihya-nyihya eyo abatsa omw'ĩbwe. Kandi Yosefũ mwakũmbagalĩrya erĩbwe rĩnene oko lũkyo lw'eyisinda, neryo mwalũaho. 61Marĩa Magdalene, n'ogundi Marĩa ababiri bosĩ babya bĩkere eyisirya okw'isinda. 62Neryo engyakya, ekiro ekikakwama ekiro kikulu ky'Erĩkokotya, abahererĩ bakulu n'Abafarĩsayo mobahĩndana embere sya Pilato, 63bati, Mukama twamibuka ngoko mũtebya oyo abũga omugulu abya akiriho ati, Enyũma w'ebiro bisatu nasyalũbũka. 64Neryo, uhamule uti eyisinda ĩteyĩbawe erĩhĩka oko kiro ky'akasatu ekyo, abiga buwe bakasyahĩka, bakamwĩba, ibabwira bandu bati, Abĩrĩlũbũka oko baholĩ, neryo, erĩtebya ly'enyũma iryabya libi kwilaba ery'erĩmbere. 65Nĩkwa Pilato mwabwirabo ati, Mwĩmaye abateya, mugende, mũtegaye eyisinda yo ndeke ngoko mwangakola. 66Neryo mobagenda, mobateya eyisinda yo ndeke, mobahĩraho abateya, kandi mobahĩra ekĩmĩnyĩsyo okw'ĩbwe.

will be added

X\