MATAYO 26

1Neryo Yesu abere abĩbũga ebĩnywa byosĩ ebĩ, mwabwira abiga buwe ati. 2Mũnasĩ enyũma w'ebiro bibiri Erikiruka lĩkahĩka, n'Omugala w'Omundu asyahoterwa busana n'eribambwa oko musalaba. 3Neryo abahererĩ bakulu n'abakulu b'abandu b'Abayũda mobahĩndana haguma omo muhana g'omukulu w'abahererĩ bosĩ, ye Kayafa. 4Neryo mobaya embĩta y'erihamba Yesu n'amenge, n'erĩmwĩta. 5Nĩkwa mobabũga bati, situkolekyo omo kiro kikulu, hakasyabya eyĩsesĩ omo katĩkatĩ k'abandu. 6Omugulu Yesu abya eBetanĩa omo nyũmba ya Sĩmonĩ omuhaga, 7omũkalĩ mwahĩka ahali Yesu, iniawite okw'ĩtambya ly'amagũta awakakumba ndeke aw'enzwere nene, neryo mũtago oko mutwe wa Yesu omugulu abya akalya. 8Nĩkwa omugulu abiga balangira ekyo, mobahitana bati, Busana nakĩ amagũta aya akahera busa kwehĩ? 9Amagũta awakakumba ndeke aya kumbe angagũlĩbwe esyofranka nyingi isyahabwa abera. 10Nĩkwa Yesu, mwaminya ebyo, mwabwirabo ati, Busana nakĩ mũkendereraya omũkalĩ kwehĩ? Kusangwa abirinyikolera omũbĩrĩ mubuya. 11Kusangwa muli n'abera ebiro byosĩ, nĩkwa ĩngye sindi haguma nenyũ ebiro byosĩ. 12Kusangwa omugulu alyũta amagũta awakakumba ndeke aya oko mubiri wage, alyakola atya erinyĩsũga busana n'erinyita. 13Kwenene ngabũga nenyũ, Aho Engulu Yowene yasyatulaganĩbwa omo kihugo kyosĩ, ebyo mũkalĩ oyũ akabikola byasyatũlaganĩbwa busana n'erimwibuka. 14Neryo omuguma w'oko biga ĩkũmĩ n'ababiri, oyukahulawa mo Yũda Ĩskarĩota, mwaya oko bahererĩ bakulu, 15mwabũlyabo ati, Mwamalĩga erimbakĩ namahotera Yesu ũkw'ĩnywe kwehĩ? Nabo mobamulengera ebihande by'ebĩtsĩpa makũmĩ asatu. 16Erĩtsũka oko mugulu oyo, Yũda mwasonda-sondya omwanya w'erihotera Yesu. 17Neryo oko kiro ky'erĩmbere ky'erirya obundu Bute mo Kĩhamya, abiga mobahĩka uku Yesu, bati, Wanzĩre ĩtwakũkokoterya erirya ly'Erikiruka lyo hahi kwehĩ? 18Neryo Yesu mwabwirabo ati, Mugende omo mũyĩ, oko mundu mulebe, mumubwire muti, Omũkangĩrĩrya ati, Omugulu wage abĩrĩhĩka, neryo abiga bage haguma nage twasyalya Erikiruka omo nyũmba yawe. 19Neryo abiga mobakola ngoko Yesu ategekabo, neryo mobakokotya erirya ly'Erikiruka. 20Neryo erĩgolo-golo lyabere ryahĩka, Yesu n'abiga erĩkũmĩ n'ababiri mobĩkala okw'irya. 21Neryo babere bakalya, Yesu mwabũga ati, Kwenene ngabũga nenyũ, omuguma w'ũkw'ĩnywe akandinyihotera. 22Nabo mobakwa bũlĩge bunene, mobatsũka erĩbũlya Yesu muguma muguma, bati, Mukama ĩkwa nĩ ĩngye kwehĩ? 23Yesu mwasũbĩryabo ati, Oyũkakolaya ebyala biwe omo kibindi haguma nage yukandinyihotera. 24Omugala w'Omundu akagenda ngoko kĩsakĩre busana naye, nĩkwa obũlĩge oko mundu oyukahotera Omugala w'Omundu! Kumbe lyowene busana n'omundu oyo nga siabutawa! 25Neryo Yũda, oyo wamuhotera, mwasũbĩrya ati, Mũkangĩrĩrya, ĩkwa nĩ ngye kwehĩ? Yesu mwamũsũbĩrya ati, Wamabĩbugakyo. 26Neryo omugulu babya bakalya, Yesu mwĩmya obundu, neryo abere abitsumulabo, mwatsũtsangabo, mwahabo abiga ati, Mwĩmayebo, mulye; oyũ ni mubiri wage. 27Neryo mwĩmya olũtehĩ mwaha ewasĩngya, neryo mwahalobo ati, Mũpũlaye kulo, ĩnywe bosĩ. 28Kusangwa oyũ ni musasi wage, omusasi w'endagane, omusasi wage owakũtawa busana n'abangi, busana n'eribuyira ebibi. 29Nĩkwa ngababwira, sindiendisyaswapũlya oko bĩgũma ebĩ by'ebinyũ erĩtsũka lino erĩhĩka oko kiro nasyapũlya ebihya-bihya haguma nenyũ omo bwami bwa Tata wage. 30Neryo babere babiimba olwimbo, mobaya oko kitwa ky'eMĩzeĩrũnĩ. 31Neryo Yesu mwabwirabo ati, Ĩnywe bosĩ mukandinyitswako oko kiro ekĩ, kusangwa amasako ati, Nyamuhanga asyaswĩrya omũlĩsya, n'esyombũlĩ sy'omo kĩhyo syasyapanzikana. 32Nĩkwa nasyabya nabĩlũbũkĩbwa, nasyabatanga eGalĩlaya. 33Nĩkwa Petero mwabũga naye ati, Nomo abosĩ bangatswa busana nawe, ĩngye sindiendisyakutswako na kera. 34Yesu mwabũga naye ati, Kwenene ngabũga nawe, omo kiro ekĩ kya mũnabwĩre, engoko-lume ite yabika, ukandinyigana. ngendo ĩsatu. 35Petero mwamubwira ati, Sindiendikugana, nomo nangahola haguma nawe. N'abiga bosĩ mobabũga batya. 36Neryo Yesu haguma n'abiga buwe mobaya ahakahulawa mo Getesemane, neryo mwabwira abiga buwe ati, Mwĩkale hano omugulu ngaya halya eriyasaba. 37Neryo mwatwala Petero n'abagala babiri ba Zebedayo, neryo mwatsũka eribya n'obũlĩge n'erĩhahũkya omutima. 38Neryo mwabwirabo ati, Omutima wage ali n'obũlĩge bunene bukasonda erĩnyĩta. Mũsĩgale hano, mũtegaye haguma nage. 39Neryo mwaya embere yo hake, mwawa ahisi, mwasaba ati, Tata wage, kyamatokekana, ũnyĩlũsaye kw'olũtehĩ olũ! Nĩkwa butsira ngoko nyazĩre, nĩkwa ngoko wanzĩre. 40Neryo mwasuba ahali abiga basatu mweyabo ibanagotsere, neryo mwabũga na Petero ati, Mwatalũkĩre erĩteya haguma nage esaa nguma kwehĩ? 41Mubye mukasaba n'erĩteya, isimwingira omw'irengwako; omutima akalĩga, nĩkwa omubiri ni molo. 42Kandi engendo y'akabiri Yesu mwayasaba ati, Tata wage, olũtehĩ olũ lwamatenditokekana erĩnyĩlũako namatindapũlyalo, erisonda lyawe likolawe. 43Kandi mwasa mweyabo ibaneto, kusangwa ameso wabo ĩnĩalĩtohĩre. 44Kandi Yesu mwasĩgabo, mwayasaba engendo y'akasatu, iniakasuba omo bĩnywa ebyo kandi. 45Neryo mwasuba oko biga, mwabwirabo ati, Mukineto, mukinaluhuka kwehĩ? Lebaya! Endambĩ yamahĩka, n'Omugala w'Oinundu akahĩrawa omo byala by'abandu babi. 46Mu-hangane, tugende! Mũlebaye, oyukanyihotera yoyũ hano! 47Neryo Yesu abere akĩnabũga, lebaya, Yũda, omuguma w'oko biga ĩkũmĩ n'ababiri, mwasa. Haguma naye habya endeko nene eyĩhekĩre emĩyalĩ n'esyongonĩ, ibakatumawa n'abahererĩ bakulu n'abakulu b'Abayũda. 48Neryo oyo wamuhotera mwahabo ekĩmĩnyĩsyo ati, Oyo ngandilyatsirira, ini iye; mumuhambe! 49Neryo Yũda abere ahĩka, mwaya uku Yesu ati, Wasĩbĩre, Mũkangĩrĩrya! neryo mwamulyatsirira. 50Neryo Yesu mwamubwira ati, Mwĩra, ukole ekyo uliasira! Neryo mobahĩka mobahamba Yesu mobamuwatako kutsibu. 51Neryo lebaya, omuguma w'oko bandu ababya na Yesu mwasumba ebyala biwe mwakula omũyali, mwabanda omukobe w'omukulu w'abahererĩ bosĩ, mwatwa okũtũ kuwe. 52Neryo Yesu mwabũga naye ati, Sũbaya omũyalĩ g'omo lubo lwago; kusangwa abosĩ abakawata oko mũyalĩ, basyahera omo mũyalĩ. 53Kutse ũkaganĩraya uti sinangatoka erilakira Tata wage, naye iniamba abamalaĩka elfu makũmĩ alinda n'ĩbĩrĩ kwehĩ? 54Nĩkwa Amasako asyabererera ati awakabuga ati, Litolere ibyabya bitya? 55Oko ndambĩ eyo Yesu mwabũga n'endeko ati, Mwabiriasa n'emĩyalĩ n'esyongoni erinyihamba ng'abakahamba omũnyeyĩ kwehĩ? Obuli kiro nabya nyĩkere omo Hekalũ ngakangĩrĩrya, momutanyihamba. 56Nĩkwa ebyosĩ ebĩ byabiribya bitya erĩberererya ebyo bamĩnyererĩ basaka. Neryo abiga bosĩ mobamutswako, mobatibita. 57Neryo abahamba Yesu mobamutwala ew'omukulu w'abahererĩ bosĩ ye Kayafa, aho abasakĩ b'Emigambo n'abakulu babya bahĩndene. 58Nĩkwa Petero mwamukwama enyũma inianayĩsũnĩre, mwahĩka oko muhana g'omukulu w'abahererĩ bosĩ. Neryo Petero mwingira omo muhana, mwĩkala n'abateya erilangira endũlĩ y'omwatsi. 59Nĩkwa abahererĩ bakulu n'ab'omw'ĩbũgĩro mobasonda-sonda emyatsi y'amabehĩ busana na Yesu, ibatoka erĩmwĩta. 60Nĩkwa mobatabana eby'amabehĩ, nomo abatũlĩ b'amabehĩ bangi banahĩkaho. Nĩkwa enyũma w'aho ababiri b'amabehĩ mobahĩka, 61bati, Omundu oyũ mwabũga ati, Ĩngye nangatoka erĩhĩmbũla eHekalũ ya Nyamuhanga, n'erĩswahĩmbayo omo biro bisatu. 62Neryo omukulu w'abahererĩ bosĩ mwahangana, mwabũlya Yesu ati, Sũlĩsũbĩraya kwehĩ? Ni byahi ebyo bandu aba bakakũhandĩkĩrĩraya kwehĩ? 63Nĩkwa Yesu mwabya bũkũtũ. Neryo omukulu w'abahererĩ bosĩ mwabwira Yesu ati, Ngakusema busana na Nyamuhanga oyuliho, utubwire wamabya uli Kristo, Mugala wa Nyamuhanga. 64Yesu mwabũga naye ati, Uwe wamabũgakyo, nĩkwa ngababwira nyiti, Enyũma w'aho mwasyalangira Omugala w'Omundu ĩnĩanĩkere oko byala by'amali by'Omũtokĩ W'ebyosĩ, iniakasa oko bĩtũ by'ekyanya. 65Neryo omukulu w'abahererĩ bosĩ mwatulanga ekanzu yiwe, ati, Abiritsuma! Tukine n'obwaga bw'abalangĩrĩ kwehĩ? Lebaya, mwamabyowa eritsuma liwe! 66Mũkaganĩrayakĩ kwehĩ? Nabo mobasũbĩrya bati, Atolere oluholo! 67Neryo mobatwĩra matande omo bũsũ bwa Yesu n'erĩmũswĩrya ebĩkũndĩ, n'abandi mobamũswĩrya esyongũmbe. 68Mobabũga bati, Uwe Kristo, ũtuminyerereko! Nindi wamakũswĩrya kwehĩ? 69Nĩkwa Petero abya ĩnĩanĩkere eyĩhya omo muhana. Neryo omugombe mwana-muto muguma mwamũhĩkako ati, Nawe wabya na Yesu Omũgalĩlaya. 70Nĩkwa Petero mwayigana embere w'abosĩ ati, Sĩnyasĩ ebyo ũkabũga nga ni byahi. 71Neryo Petero mwaya eyĩhya oko lũkyo lw'omuhana, n'ogundi mugombe mwana-muto mwamulolako, mwabwira bandu ababyaho ati, Omundu oyũ abya na Yesu Omũnazaretĩ. 72Neryo Petero mwaswagana n'erĩlahĩrya ati, Sĩnyasĩ omundu oyo. 73Kandi enyũma hake ababya bimeneho mobahĩka mobabwira Petero bati, Kwenene nawe uli mnguma wa kubo, kusangwa emĩbũgĩre yawe ĩkakũmĩnyĩkalaya. 74Neryo Petero mwatsũka eritakira n'erĩlahĩrya ati, Sĩnyasĩ omundu oyo! Neryo-neryo engoko-lume moyabika. 75Neryo Petero mwibuka ekĩnywa ekyo Yesu abũga ati, Engoko-lume ite yabika, ukandinyigana ngendo ĩsatu. Neryo mwahulukira eyĩhya, mwalira n'obũlĩge.

will be added

X\