MATAYO 24

1Neryo Yesu mwalũa omo Hekalũ, nĩkwa abere anemugenda, abiga buwe mobahĩka erĩmũkangya emĩhĩmbĩre y'eHekalũ. 2Yesu mwasũbĩryabo mwabwirabo ati, Simwetalangira ebindu byosĩ ebĩ kwehĩ? Kwenene ngabũga nenyũ, hano sihendisyasĩgala erĩbwe n'eriguma endata oko lindi, eritendisyasambulirwa ahisi. 3Neryo Yesu abere anĩkere oko kitwa ky'eMĩzeĩtũnĩ, abiga mobamũhĩkako ahate bandu bati, Utubwire emyatsi eyĩ nga yasyabya oko mugulu wahi, kandi ekiminyikalo ky'erĩhĩka lyawe nga ni kyahi, n'erihwererera ly'emigulu eyĩ ni kiro kyahi kwehĩ? 4Neryo Yesu mwasũbĩryabo ati, Simuleke mundu akabatalya. 5Kusangwa abangi basyasa omo lĩna lyage bati, Ĩngye indi Kristo, kandi basyatalya bandu bangi. 6Mwasyowa engulu y'amalwa n'olombĩ lw'amalwa; mũlebaye, simubahe. Emyatsi eyĩ itolere ĩyahĩka, nĩkwa endũlĩ isiriyaberwa. 7Kusangwa ekihanda kyasyalwa n'ekindi kihanda, n'obwami bwasyalwa n'obundi bwami, kandi hasyabya esyonzala ehandi n'ehandi, n'emĩsĩkĩ ehandi n'ehandi. 8Nĩkwa emyatsi yosĩ eyĩ iri ng'erĩtsũka ly'erikunda ly'omukule. 9Neryo basyabahotera, n'erĩbahĩra omo malĩge, kandi basyabĩta. Ebihanda byosĩ byasyabakwa obusu busana n'erĩna lyage. 10Oko mugulu oyo, abandu bangi basyaleka erĩkĩrĩrya lyabo, kandi basyahoterana n'erĩkwana obusu. 11Kandi abamĩnyererĩ b'amabehĩ basyahangana n'erĩtalya abangi. 12Kandi kusangwa ebibi byasyakanya, olwanzo lw'abangi lwasyaholoka. 13Nĩkwa omundu oyo wasyayĩyĩnĩa erĩhĩka oko ndũlĩ yo wasyalamĩbwa. 14Kandi Engulu Yowene y'obwami eyĩ yasyatsũka erĩrũlaganĩbwa omo kihugo kyosĩ busana n'erĩmĩnyĩsya ebihanda byosĩ, neryo endũlĩ yasyahĩka. 15Neryo omugulu mwasyalangira ekĩkalĩre ky'erĩherya ekyahulawa n'omũmĩnyererĩ Danĩelĩ, ikihangene ahabũyĩrĩre; oyukasoma aminye ndeke! 16Neryo abali eYũdea basagire oko brtwa. 17Omundu oyuli endata oko nyũmba, syakĩme ati, akenda ebindu ebiri omo nyũmba yiwe. 18N'omundu oyuli omw'irima syasubire olukimba luwe. 19Nĩkwa obũlĩge oko bakule, n'oko bakalĩ abakaha abana babo b'amabere oko biro ebyo! 20Nĩkwa musabe Nyamuhanga muti erisaga lyenyũ siribye oko mugulu w'eritsuku, kutse oko kiro ky'eSabato. 21Kusangwa oko biro ebyo hasyabya obũlĩge bunene isibwebwatabya okw'ĩtsũka ly'ekihugo, erĩhĩka na lino, kutse sibwendisyaswabya butya na kera. 22Nĩkwa kumbe Nyamuhanga atalĩkũhĩhaya ebiro ebyo, sihali mundu wangalamĩbwe. Nĩkwa abĩrĩkũhĩhyabyo busana n'abayisogawa buwe. 23Neryo omundu amababwira ati, Lebaya, hano ho Kristo ali! Kutse ati, Yolya halya, sĩmũlĩge. 24Kusangwa abakristo b'amabehĩ n'abamĩnyererĩ b'amabehĩ basyahuluka basyakangya ebĩmĩnyĩsyo n'eby'eriswekera, busana n'erĩtalya abayisogawa ba Nyamuhanga, kyamatokekana. 25Mũlebaye, nabiribabwira emyatsi yosĩ erĩmbere. 26Neryo bamababwira bati, Lebaya, ali omo mbwarara, simuyeyo. Kutse bati, Lebaya, ali omo bisenge, sĩmũlĩge. 27Kusangwa Omugala w'Omundu asyasa ng'akarabyo akakakoleraya kakalũa eyo eryuba likahuluka n'erĩkangabasanĩa, n'erĩhĩka eyo eryuba likalengera. 28Ahali ekĩnda, ho amahungu asyahĩndana. 29Nĩkwa neryo-neryo enyũma w'obũlĩge bw'ebiro ebyo, eryuba lyasyabya mwĩrĩmya, n'omukera siendisyaswakola, n'esyongũnũnũ syasyatogonga erĩlũa omo kyanya, n'eby'amaka by'omo kyanya byasyatenga-tenganĩbwa. 30Neryo ekiminyikalo ky'Omugala w'Omundu kyasyahuluka omo kyanya; neryo ebihanda byosĩ by'omo kihugo byasyasũsũmana, kandi byasyalangira Omugala w'Omundu akasa oko bĩtũ by'ekyanya n'obũtokĩ bunene n'olukengerwa ĩunene. 31Neryo Yesu asyatuma abamalaĩka buwe n'omulenge munene w'engubi, nabo basyahĩndanĩa abayisogawa ba Nyamuhanga erĩlũa oko bihande bini by'ekihugo, erĩtsũka oko ndũlĩ nguma y'ekyanya erĩhĩka oko yindi ndũlĩ y'ekyanya. 32Lino mwige omũsyo w'omuti w'omũtĩnĩ. Omugulu akatohaya emitahi yago, ikabya myolo-myolo, neryo akalasaya ebikoma byago, ukaminya ngoko mugulu w'omwisi ali hakũhĩ. 33Litya nenyũ nibya, omugulu mukalangira emyatsi eyĩ ĩkahĩka, muminye omugulu kw'ali hakũhĩ, oko lũkyo. 34Kwenene ngabũga nenyũ, olulengo olũ sĩlwendĩsyalũaho emyatsi eyĩ ite yabererera. 35Ekyanya n'ekihugo byasyahwaho, nĩkwa ebĩnywa byage sibyendisyahwaho. 36Nĩkwa sihali mundu oyo wasĩ erĩhĩka ly'ekiro ekyo, kutse esaa eyo, nomo bangabya bamalaĩka b'elubula, kutse Omugala, nĩkwa Tata yũnasĩ, ĩyowene. 37Kusangwa erĩhĩka ly'Omugala w'Omundu lyasyabya ng'omwatsi w'ebiro bya Noa. 38Kusangwa ng'omo biro ebyo embere w'erigunga ly'amagetsi, mobabya bakalya n'erĩpũlya, mobabya bakahĩkya n'erĩherũkanĩa, erĩhĩka oko kiro ekyo Noa ingira omo bwato. 39Mobataminya ekyabya erĩhĩka aho erigunga ly'amagetsi lyasira n'eritwala bosĩ. Erĩhĩka ly'Omugala w'Omundu ko likandisyabya litya. 40Oko mugulu oyo, abalume babiri basyabya omw'irima; omuguma asyatwalwa, n'omuguma asyasĩganĩbwa. 41Abakalĩ babiri basyabya bakaswa oko luso, omuguma asyatwalwa, n'omuguma asyasĩganĩbwa. 42Neryo mũtegaye! Kusangwa sĩmwasĩ ekiro kyahi Omukama wenyũ asyasa. 43Nĩkwa muminye ekĩ kyo ndeke, omwenye nyũmba alibya asĩ esaa omũrahĩ asonda erĩhĩka, nga mwateya ĩsĩangalekĩre enyũmba yiwe ikatulwa. 44Busana n'omwatsi oyũ mubye ĩmũnasĩkĩre, kusangwa Omugala w'Omundu asyasa oko ndambĩ mũtalengekenĩe . 45Omugombe oyuteregula n'ow'amenge nindi kwehĩ? Yo n'oyo mukama wuwe asĩgĩra bagombe b'enyũmba yiwe erĩteya n'erihabo akalyo kabo oko mugulu atolere. 46Obutseme buli oko mugombe oyo mukama wuwe akamwegaya akakola atya omugulu omukama oyo akahĩka eka. 47Kwenene ngababwira nyiti omukama oyo asyamuyira mo mũteya w'ebindu biwe byosĩ. 48Nĩkwa omugombe mubi oyo amayibwira omo mutima wuwe ati, Mukama wage siendisyasa lũba, 49ĩnĩatsũka erĩswĩrya abagombe balĩkyabo, n'erirya, n'erĩpũlya haguma n'abakũndĩrya. 50Neryo omukama w'omugombe oyo asyasa ekiro atemulindirira, n'oko ndambĩ arasĩ. 51Omukama oyo asyamũtsũtsanga mo bitswe-bitswe, n'erimuha omwanya haguma n'abatebya. Hasyabya eririra eyo n'erikeregeta ameno.

will be added

X\