MATAYO 23

1Neryo Yesu mwabũga n'esyondeko n'abiga buwe, 2ati, Abakangĩrĩrya b'Emigambo n'Abafarĩsayo babiriyiyira mo bandu b'erĩkũmbũla Emigambo ya Musa. 3Neryo ebyosĩ bakababwĩra, mukolebyo, kandi mukwamebyo, nĩkwa simukole ngoko bakakola; kusangwa bakabũga emyatsi, nĩkwa sibekolayo. 4Kandi bakasenga emiheke eyĩrĩtohĩre, neryo ĩbahĩrayo oko bitigo by'abandu; nĩkwa ibo sĩbanzĩre erĩwatĩkya abakahekayo kutse n'omo munwe muguma. 5Nĩkwa bakakola emĩbĩrĩ yabo yosĩ erilolwako n'abandu; kusangwa bakayira otũsandũkũ otukaheka emilondo y'ekitabu mo tunene-tunene oko mibiri yabo, kandi emĩsĩke y'esyongimba syabo bakayirayo mo miri-miri. 6Kandi banzĩre ah'erĩsĩkĩbwa omw'irya, n'ebĩtũmbĩ by'embere omo manyũmba w'erĩhmdanamo. 7Kandi bakanza erĩkerĩbwa n'erikengwa omo hitale, n'eribirikirwa n'abandu mo Mũkangĩrĩrya. 8Nĩkwa ĩnywe simwahulawe mo Mũkangĩrĩrya, kusangwa Omũkangĩrĩrya ni muguma, n'ĩnywe bosĩ muli balĩkyetu. 9Kandi simwahule mundu mo tata wenyũ muna-kihugo, kusangwa Tata wenyũ ni muguma, oyuli elubula. 10Kandi simwahulawe mo basondolĩ, kusangwa omũsondolĩ wenyũ ni muguma, ye Kristo. 11Nĩkwa omukulu omo katĩkatĩ kenyũ asyabya mugombe wenyũ. 12N'oyo wasyayĩhamya asyakehĩbwa, n'oyo wasyayĩkehya asyahamĩbwa. 13Nĩkwa obũlĩge kwĩnywe, abakangĩrĩrya b'Emigambo n'Abafarĩsayo, abatebya! Kusangwa mukakingira Obwami bw'elubula bw'abandu, kusangwa nenyũ simuliingiramo, kandi sĩmwerĩga bandu abakasonda eriingira, eriyamo. 14Obũlĩge kwĩnywe bakangĩrĩrya b'Emigambo, n'Abafarĩsayo, abatebya! Kusangwa mukanyega manyũmba w'abakwakalĩ, imukateba omw'isaba liri-liri. Neryo mwasyasuyirwa kutsibu kw'aho. 15Obũlĩge kwĩnywe, abakangĩrĩrya b'Emigambo n'Abafarĩsayo, abatebya! Kusangwa mũkatĩmba oko ngetsi n'ekihugo eriyira omũsomĩ muguma; neryo mwamamuyira mutya, imukamuyira mo mwana w'eKũlĩmũ ngendo kabiri kwilaba nywe 16Obũlĩge kwĩnywe, abasondolĩ ndĩmatĩme, abakabũga bati, Omundu amalahĩrya oko Hekalũ, si mwatsi, nĩkwa omundu amalahĩrya oko syamagetsi sy'eHekalũ akayiboha omw'ĩlahĩrya liwe. 17Ĩnywe bakĩrũ n'esyondĩmatĩme, ekĩlabĩre mo kikulu ni kyahi, esyamagetsi, kutse eHekalũ eyikayira esyamagetsi mo sĩbũyĩrĩre kwehĩ? 18Kandi, muti, Oyũkalahĩraya oko kiherero, si mwatsi, nĩkwa oyũkalahĩrĩraya omo lũsũnzo oluli kukyo, akayiboha omw'ĩlahĩrya liwe. 19Ĩnywe bandu ndĩmatĩme! Ekikulu ni kyahi, olũsũnzo kutse ekiherero ekikayira olũsũnzo mo lũbũyĩrĩre kwehĩ? 20Neryo omundu amalahĩrya omo kiherero, akalahĩraya mukyo n'omo lũsũnzo losĩ oluliko. 21N'oyũkalahĩraya omo Hekalũ, akalahĩraya omo Hekalũ n'uku Nyamuhanga oyo wĩkeremo. 22N'oyũkalahĩraya oko lubula, akalahĩraya oko kĩtũmbĩ ky'obwami kya Nyamuhanga, n'oko yo wĩkere kukyo. 23Obũlĩge kwinywe bakangĩrĩrya b'Emigambo, n'Abafarĩsayo, abatebya! Kusangwa mukaha Nyamuhanga ekiguma ky'omw'ĩkũmĩ ky'esyonyenyĩ sy'emunanaa, na bĩzarĩ, na jĩra, kandi mwabirireka emyatsi mikulu kw'aho y'Emigambo ng'erĩbanza, n'eriganyira, n'eritendiregula. Kumbe mwabirikola emyatsi eyĩ n'erĩtendĩsĩgama ebindi ebyo. 24Ĩnywe basondolĩ ndĩmatĩme, mukagegena akahuka kake, imwamera engamia! 25Obũlĩge kwĩnywe bakangĩrĩrya b'Emigambo n'Abafarĩsayo, abatebya! Kusangwa mũkeraya endambi y'olũtehĩ n'ekibindi, nĩkwa omwisi wabyo moswĩre erinyega n'esyongumbu sy'omubiri. 26Uwe Mũfarĩsayo ndĩmatĩme, ũtsũke erĩerya olũtehĩ n'ekibindi by'omwisi neryo eyĩhya wabyo iyatoka eriera nibya. 27Obũlĩge kwĩnywe bakangĩrĩrya b'Emigambo n'Abafarĩsayo, abatebya! Kusangwa muli ng'esisinda esĩhakabĩrye embemba, esikaminyikala eyĩhya mo nyibuya, nĩkwa omwisi wasyo moswĩre amakũha w'abaholĩ n'esyonye syosĩ. 28Nenyũ nibya mukaminyikala eyĩhya mo batunganene oko bandu bosĩ, nĩkwa omwisi moswĩre amatebo n'amalolo. 29Obũlĩge kwĩnywe bakangĩrĩrya b'Emigambo n'Abafarĩsayo, abatebya! Kusangwa mũkahĩmba amasinda w'abamĩnyererĩ n'erĩsũga amasinda w'abatunganene. 30Kandi mũkabũga muti, Kumbe twalibyaho oko biro by'abotata wetu, nga sitwetabya omo luhota haguma nabo erĩũta omusasi w'abamĩnyererĩ. 31Neryo mũkalĩga ko muli abagala b'abĩta abamĩnyererĩ. 32Neryo mũsũlaye olulengo l'omusango lw'abotata wenyũ. 33Ĩnywe nzoka, ĩnywe bana b'esyonzoka! Mwasyabala muti olubanza lw'omuliro w'eKũlĩmũ. 34Neryo, lebaya, ngabatumira abamĩnyererĩ, n'abandu b'amenge, n'abakangĩrĩrya. Mwasyĩta abandi ba kubo, n'eribambabo oko misalaba, n'abandi mwasyaswĩryabo emikoba omo manyũmba wenyũ w'erĩhĩndanamo, kandi mwasyendereryabo oko mũyĩ n'oko mũyĩ. 35Neryo erisuyira ly'abĩtĩ b'abandu bosĩ abate ko musango. lyasyabya kwĩnywe erĩtsũka erĩkwa lya Abelĩ oyutunganene, n'erĩhĩka okw'ĩkwa lya Zakarĩa, mugala wa Berekĩa, oyo mwĩtĩra omo katĩkatĩ k'eHekalũ n'ekiherero. 36Kwenene ngabũga nenyũ, nyiti erisuyira busana n'emyatsi yosĩ eyĩ lyasyahĩka oko bandu b'olulengo olũ. 37Uwe Yerũsalema, Yerũsalema! Ũkĩta abamĩnyererĩ, n'erĩĩta omo mabwe abakwenda abo Nyamuhanga akatuma uk'uwe! Engendo singahi nabya nyanzĩre erĩhĩndanĩa abana bawe bo haguma, ng'erĩbũtĩ ko lĩkahĩndanaya ehĩpyege hyalyo omo bĩpũpa byalyo. Nĩkwa momutanza! 38Mũlebaye, oko wenyũ kw'amasĩganĩbwa ĩkokwene. 39Kusangwa ngababwira, nyiti, Simwendisyaswanyilolako erĩhĩka aho mwasyabũgĩra muti, Nyamuhanga atsumule oyukasa omo lĩna ly'Omukama!

will be added

X\