MATAYO 22

1Yesu mwatwa emĩsyo kandi omugulu abya akabũga n'abandu ati, 2Obwami bw'elubula buli ng'omwami oyo wakokotaya erirya ly'erĩherũkya busana n'omugala wuwe. 3Neryo mwatuma abagombe buwe eriyabwira bagenĩ b'erirya ĩnene ly'erĩherũkya abatumirawako ambu base, nĩkwa mobatanza erĩhĩka. 4Kandi mwatuma abandi bagombe ati, Mubwire abatumirawako muti, Lebaya, nabĩrĩkokotya erirya; esyonde syage, n'esyosabwe syabĩrĩsĩnzwa, n'ebyosĩ bĩlũmĩre. Mwase okw'irya ly'erĩherũkya! 5Nĩkwa abagenĩ abo mobatatsomana, mobaya oko mĩbĩrĩ yabo, omuguma omw'irima liwe, n'ogundi omo dũka yiwe. 6N'abandi bagenĩ mobahamba abagombe buwe, mobayirabo nabi, mobĩtabo. 7Nĩkwa omwami oyo mwahitana kutsibu, mwatuma emilondo yiwe, mwaherya abĩtĩ abo, kandi mwahĩsya omũyĩ wabo. 8Neryo mwabwira bagombe buwe ati, Erĩherũkya lĩlũmĩre, nĩkwa abatumirawako sibabya batolere. 9Neryo mugende omo syombalu, n'abosĩ mũkandĩeya eyo, mubirikirebo okw'irya ly'erĩherũkya. 10Abagombe abo mobagenda omo syombalu mobahĩndanĩa abosĩ begayayo, ababi n'ababuya. Litya enyũmba y'erĩherũkya moyũsũla mw'abagenĩ. 11Nĩkwa omugulu omwami ahĩkamo erĩrebya abagenĩ, mwalangira omundu oyutambite olukimba lw'erĩherũkya. 12Neryo omwami mwabũlya ati, Mwĩra wetu, ulingira muno uti iwe utambite olukimba lw'erĩherũkya kwehĩ? Naye mwabya bũkũtũ. 13Neryo omwami oyo mwabwira bagombe ati, Mumubohe oko byala n'oko bisando, mumuguse omo mwĩrĩmya, eyo hasyabya eririra n'erikeregeta ameno. 14Neryo Yesu mwabũga ati, Abangi bakabirikirawa, nĩkwa ni bake abakayisogawa. 15Neryo Abafarĩsayo mobagenda mobaya embĩta ngoko bangatega Yesu omo bĩnywa. 16Neryo mobatuma abiga babo haguma n'Abanya Herode uku Yesu bati, Mũkangĩrĩrya, tũnasĩ k'uli w'ekwenene, kandi ũkakangĩrĩraya enzira ya Nyamuhanga omo kwenene, sulitsomana mundu, sulitsomana amalengekanĩa w'abandu, kandi sulisombola ebitaga n'ebite bitaga. 17Neryo utubwire ng'ukaganĩrayakĩ. Emigambo ĩkatũlĩgĩra erisolera Kaĩsarĩ, kutse iyihi kwehĩ? 18Nĩkwa Yesu mwaminya obubi bwabo neryo mwabũga ati, Ĩnywe batebya! Busana nakĩ mukanyirengako kwehĩ? 19Mũnyĩkangaye ekĩtsĩpa ky'erisolera. Neryo mobamuletera edĩnarĩ. 20Yesu mwabũlyabo ati, Ekĩsosekanĩo n'amasako ni byandi kwehĩ? 21Nabo mobamũsũbĩrya bati, Ni bya Kaĩsarĩ. Neryo Yesu mwabwirabo ati, Mulihe Kaĩsarĩ ebindu bya Kaĩsarĩ, kandi mulihe Nyamuhanga ebindu bya Nyamuhanga. 22Neryo omugulu bowa ebĩ mobasweka, mobamũsĩga, mobagenda. 23Oko kiro ekyo Abasadũkayo mobahĩka uku Yesu. Aba ni bandu abakabũga bati, sihali erĩlũbũka. 24Mobamũbũlya bati, Mũkangĩrĩrya, Musa mwabũga ati, Omundu amahola isiawite bana, mugala wabo asyĩmya omũkalĩ oyo iniabutira mugala wabo y'abana. 25Nĩkwa haguma netu habya bagala babo balinda, ow'erĩmbere mwahĩkya omũkalĩ, neryo mwahola, isialyabuta mwana, neryo mwasĩgĩra mugala wabo y'omũkalĩ. 26Litya mugala wabo w'akabiri mwakola atya, n'ow'akasatu mwakola atya erĩhĩka oko w'akalinda. 27N'enyũma w'abosĩ omũkalĩ oyo naye mwahola. 28Neryo oko kiro ky'erĩlũbũka, omũkalĩ oyo asyabya wandi oko balinda abo kwehĩ? Kusangwa abosĩ ĩbabĩrĩmwĩmya. 29Nĩkwa Yesu mwasũbĩryabo ati, Mukatala, sĩmwasĩ Amasako, kutse amaka wa Nyamuhanga. 30Kusangwa oko mugulu w'erĩlũbũka bali ng'abamalaĩka omo lubula. Sĩbehĩkaya kutse erĩherũkanĩa. 31Nĩkwa busana n'erĩlũbũka ly'abaholĩ simwetasoma ebyo Nyamuhanga ababwira kwehĩ ati, 32Ĩngye indi Nyamuhanga wa Abrahamũ, na Nyamuhanga wa Ĩsaka, na Nyamuhanga wa Yakobo. Nyamuhanga si Nyamuhanga w'abaholĩ, nĩkwa ni Nyamuhanga w'abaliho. 33Omugulu esyondeko syowa ebĩ, mobaswekera erĩkangĩrĩrya liwe. 34Nĩkwa omugulu Abafarĩsayo bowa ko Yesu abĩrĩtũlerya Abasadũkayo, mobahĩndana haguma. 35N'omuguma wa kubo oyo wabya mũkangĩrĩrya w'Emigambo mwabũlya Yesu ekĩnywa erimulengako, ati, 36Mũkangĩrĩrya, ekihano kikulu omo Migambo ni kyahi kwehĩ? 37Neryo Yesu mwamubwira ati, Wanze Omukama Nyamuhanga wawe n'omutima wawe gosĩ, n'ekĩrĩmũ kyawe kyosĩ n'obũlengekanĩa bwawe bosĩ. 38Ekihano kikulu n'eky'erĩmbere kyekyo. 39Omugambo w'akabiri owali ngago, ati, Wanze mũlĩkyenyũ ngoko ũyanzĩre. 40Oko bihano bibiri ebĩ, Emigambo yosĩ ya Musa n'erĩkangĩrĩrya ly'abamĩnyererĩ bihangene. 41Neryo omugulu Abafarĩsayo bahĩndana haguma, Yesu mwabũlyabo, 42ati, Mũkaganĩrayakĩ busana na Kristo kwehĩ? Ni mugala wandi kwehĩ? Nabo mobamubwira bati, Ni mugala wa Dawĩdĩ. 43Neryo Yesu mwabwirabo ati, Omũlĩmũ Abũyĩrĩre asondola Dawĩdĩ eriahula Kristo mo Mukama ati kwehĩ? ati, 44Omukama mwabwira Omukama wage ati, Wĩkale oko byala byage by'amali, Erĩhĩka aho nasyahĩrĩra esyonzĩgũ syawe omwisi w'ebisando byawe. 45Neryo Dawĩdĩ amabya akamwahula mo Mukama, Kristo ni mwana wa Dawĩdĩ ati kwehĩ? 46Neryo mohatabya mundu oyo watoka erĩsũbĩrya Yesu omwatsi, kutse erĩtsũka ekiro ekyo, sihabya mundu oyo walenga erĩswamũbũlya mwatsi.

will be added

X\