MATAYO 21

1N'omugulu bahĩka hakũhĩ n'eYerũsalema, mobahĩka eBetefage, oko Kitwa ky'eMĩzeĩtũnĩ. Neryo Yesu mwatuma abiga babiri, 2ati, Mwingire omo kayĩ akali embere syenyũ neryo mũkandĩeya epunda ĩnĩnahangĩreho n'ekyana kyayo haguma nayo. Muhangulesyo, mundeteresyo. 3Kandi omundu amababwira kĩnywa, mũkandĩbũga muti, Omukama ali n'obwaga bwasyo, neryo-neryo akandisyatumasyo. 4Neryo ebĩ mobyabya busana n'erĩberererya ebyabũgawa n'omũmĩnyererĩ, ati, 5Mubwire mwali w'eSĩonĩ, muti: Lebaya omwami wawe amasa uk'uwe, Iye ni w'omutima molo, kandi akahekawa n'epunda, Kye kyana ky'epunda kikamuheka. 6Neryo abiga mobagenda mobakola ngoko Yesu ategekabo. 7Mobaleta epunda eyo n'ekyana kyayo, mobahĩra kusyo kw'esyongimba syabo, neryo Yesu mwĩkala kuyo. 8Kandi abangi b'oko ndeko mobasanza esyongimba syabo omo nzira, n'abandi mobatwa ebisanza by'emiti, mobasanzabyo omo nzira. 9N'esyondeko mobagenda embere wa Yesu, n'abamukwama mobabirikira, bati, Omugala wa Dawĩdĩ apipawe! Nyamuhanga ahire mũyĩsa oko yukasa omo lĩna ly'Omukama! Nyamuhanga w'ahendata kutsibu apipawe! 10Neryo Yesu abere ĩngĩra eYerũsalema, omũyĩ gosĩ mobahũlũngũkanĩa, bati, Oyo nindi kwehĩ? 11N'esyondeko siti, Oyũ nĩ mũmĩnyererĩ Yesu oyũkalũa eNazaretĩ y'eGalĩlaya. 12Neryo Yesu mwaya omo Hekalũ mwahigirabo eyĩhya abosĩ abagula, n'abagũlĩraya omo Hekalũ, kandi mwakubula ehimesa hy'abahĩnganaya esyofranka n'ebĩtũmbĩ by'abagũlaya ehĩrĩkũkũ. 13Nĩkwa Yesu mwabwirabo ati, Kĩsakĩre kiti, Enyũmba yage yasyahulwa mo nyũmba y'erisabiramo, nĩkwa ĩnywe mukayirayo mo bwĩkalo bw'abanyeyĩ. 14N'esyondĩmatĩme n'ebirema mobamũhĩkako omo Hekalũ naye mwalamyabo. 15Nĩkwa abahererĩ bakulu n'abakangĩrĩrya b'Emigambo mobahitana omugulu balangira emyatsi y'eriswekera eyo akola, kandi ngoko bana babirikira omo Hekalũ bati, Eripipwa uku Mugala wa Dawĩdĩ! 16Mobabwira Yesu bati, Wamowa ebyo aba bakabũga kwehĩ? Neryo Yesu mwabwirabo ati, Ega, nenyũ simwetasoma amasako ati, Wabĩrĩtegekania eripipa busana nawe erĩkalũa omo muno w'abana n'aw'esyomekeke kwehĩ? 17Neryo Yesu mwasĩgabo mwahuluka omo mũyĩ, mwaya eBetanĩa, mwagotserayo. 18Neryo engyakya omugulu Yesu asuba omo mũyĩ, mwakwa enzala. 19Neryo abere alangira omuti w'omũtĩnĩ oko mũsĩke w'enzira mwaya oko muti oyo, nĩkwa mwatabana kugo ko kindu, bye n'ebikoma bisa. Neryo Yesu mwabwira omuti w'omũtĩnĩ ati, Siwendisyaswaheta na kera! N'omuti w'omũtĩnĩ oyo muma neryo-neryo. 20Neryo abiga babere balangira ekyo, mobasweka bati, Ko muti w'omũtĩnĩ amuma ati neryo-neryo kwehĩ? 21Neryo Yesu mwasũbĩryabo ati, Kwenene ngabũga nenyũ nyiti, Mwamabya n'erĩkĩrĩrya, isimwetika-tika, simwendisyakola ekiriakolawa oko muti w'omũtĩnĩ kisa, nĩkwa mwamabũga n'ekitwa ekĩ muti, Kulika, ugusawe omo ngetsi, kyasyakolwa kitya. 22Kandi emyatsi yosĩ eyo mũkabũlaya omw'isaba, ĩmũkĩkĩrĩraya, mwasyabanayo. 23Neryo Yesu abere ahĩka omo Hekalũ, abahererĩ bakulu n'abakulu b'abandu mobamũhĩkako inianemũkangĩrĩrya. Mobamubwira bati, Ukakola emyatsi eyĩ omo hamũlĩ yahi kwehĩ? Kandi nindi wakuha ehamũlĩ eyĩ kwehĩ? 24Yesu mwasũbĩryabo ati, Nage ngandĩtababũlya kĩnywa kiguma, mwamanyibwirakyo, nage ngandibabwira nga nĩ hamũlĩ yahi ikaleka inakola emyatsi eyĩ. 25Erĩbatĩsya lya Yoane lyalũahi, lyalũa elubula kutse lyalũa oko bandu kwehĩ? Nabo mobatsũka erĩkanĩrya omo katĩkatĩ kabo bati, Twamabũga tuti lyalũa elubula, akanditubwira ati, Busana nakĩ momũtĩkĩrĩrya Yoane kwehĩ? 26Kandi twamabũga, Tuti lyalũa oko bandu, tukubaha endeko, kusangwa abosĩ bakaganza Yoane kw'ali mũmĩnyererĩ. 27Neryo mobasũbĩrya Yesu bati, Sĩtwasĩ. Neryo Yesu mwabwirabo ati, Nage sindiendibabwira nga ni hamũlĩ yahi ikaleka inakola emyatsi eyĩ. 28Nĩkwa mũkaganĩraya muti kwehĩ? Omundu abya n'abagala babiri, neryo mwahĩka oko w'erĩmbere ati, Mwana, ugende ukole omũbĩrĩ omw'irima ly'ebĩnyũ mũnabwĩre. 29Neryo omwana oyo mwamũsũbĩrya ati, Sĩnyanzĩre, nĩkwa enyũma mwabinduka, mwayayo. 30Neryo tata oyo mwasa oko mwana w'akabiri, mwamubwira ngoko abwira ogundi. Nĩkwa omwana mwamũsũbĩrya ati, Ega Mukama, nĩkwa mwatagenda omw'irima. 31Oko babiri abo nindi wakola erisonda lya tata wuwe kwehĩ? Mobabũga bati, Ow'erĩmbere. Neryo Yesu mwabũga nabo ati, Kwenene ngabũga nenyũ, nyiti, Abasolesya n'abamalaya basyabatanga omo Bwami bwa Nyamuhanga. 32Kusangwa Yoane mwabahĩkako omo nzira y'eritunganene, nenyũ momutamwĩkĩrĩrya; nĩkwa abasolesya n'abamalaya mobamwĩkĩrĩrya. Nenyũ nomo mwanalangira mutya, momutabinduka erireka ebibi, mũkamwĩkĩrĩrya. 33Muhulikirire ogundi mũsyo. Habya omundu mwenye kitaka oyo wahera eririma ly'ebĩnyũ, kandi mwatĩmbya kulyo kw'ekĩyĩte, kandi mwatakula endindo y'erikamira mw'ebĩnyũ, kandi mwahĩmbaho enyũmba eyĩsũngũlĩkĩre. Neryo mwasĩgĩrayo abalĩmĩ, neryo mwaya oko lugendo omo kindĩ kihugo. 34Omugulu. w'eriera ly'ebĩnyũ abere asonda erĩhĩka, omwenye kitaka mwatuma bakobe buwe oko balĩmĩ abo eribana oko bĩgũma biwe. 35Abalĩmĩ abo mobahamba abakobe buwe, mobaswĩrya omuguma, mobĩta ogundi, kandi ogundi mobamũswĩrya amabwe. 36Kandi mwaswatuma abandi bakobe bangi kwilaba ab'erĩmbere, neryo abalĩmĩ mobaswakolabo batya. 37Nĩkwa enyũma mwatuma mugala wuwe kubo ati, Basyasĩkya mugala wage. 38Nĩkwa omugulu abalĩmĩ abo balangira omugala oyo, mobabwirana bati, Oyũ ni mugala w'omwenye eririma. Mwase, tũmwĩte, neryo eririma lyasyabya lyetu. 39Neryo mobahamba mugala oyo, mobamukurira eyĩhya w'eririma ly'ebĩnyũ, mobamwĩta. 40Yesu mwabũlya ati, Omugulu omwenye eririma ly'ebĩnyũ asyasa, asyakolakĩ n'abalĩmĩ abo kwehĩ? 41Nabo mobamubwira bati, Kwenene asyaherya abandu babi abo, n'erĩsĩgĩra eririma ly'ebĩnyũ eryo ly'abandi balĩmĩ, abasyamuha ebĩgũma by'ebĩnyũ oko kirimo kitolere. 42Kandi Yesu mwabũlyabo ati, Simwetasoma Amasako aya ati, Erĩbwe eryo abahĩmbĩ babana nga buyira, Erĩ molyabya erĩbwe ly'esondo. Omwatsi oyũ mwakolwa n'Omukama, Ni w'eriswekera omo meso wetu! 43Neryo ngababwira nyiti, Obwami bwa Nyamuhanga mwasyasagulwabo, kandi bwasyahabwa ekihanda ekikabana ebĩgũma ebitolere. 44N'oyo wasyatererwako n'erĩbwe erĩ asyabũnangika mo bitswe-bitswe; nĩkwa erĩbwe eryo lyamatogera oko mundu, lyasyamũbũnzũngũla mo lũtũtũ.] 45Neryo omugulu abahererĩ bakulu n'Abafarĩsayo bowa emĩsyo yiwe, mobaminya kw'akahulabo. 46Nĩkwa omugulu basonda-sonda erihamba Yesu, mobubaha esyondeko, kusangwa mobaganza Yesu mo mũmĩnyererĩ.

will be added

X\