MATAYO 20

1Kusangwa obwami bw'elubula bulingene n'omwenye kitaka oyo watsinduka erĩsondya abahĩngĩ busana n'eririma liwe ly'ebĩnyũ. 2Naye mwalĩga eririha abahĩngĩ abo ekĩtsĩpa kiguma oko kiro kiguma, neryo mwatumabo omw'irima liwe ly'ebĩnyũ. 3Neryo omukulima oyo mwahuluka oko saa ĩsatu mwalangira abandi ibanimene buyira omo katale. 4Neryo mwabwirabo ati, Nenyũ muye omw'irima ly'ebĩnyũ, n'esitolere nasyabahasyo. Neryo mobayayo. 5Kandi mwayayo oko saa y'endatu, n'oko saa y'omwenda, neryo mwakola atya. 6N'oko saa y'erĩkũmĩ n'enguma mwaswahuluka, mweya abandi ibanimene. Neryo mwabwirabo ati, Busana nakĩ mwimene hano ho buyira omusibo gosĩ kwehĩ? 7Nabo mobamubwira bati, Sitwetabana mundu w'erituha mũbĩrĩ. Neryo mwabwirabo ati, Nenyũ muye omw'irima ly'ebĩnyũ. 8Neryo erĩgolo-golo lyabere ryahĩka, omwenye eririma ly'ebĩnyũ mwabwira omwĩmanĩrĩ wuwe ati, Ũbirikire abahĩngĩ ulihebo obũhĩngĩ bwabo erĩtsũka oko b'enyũma ũhĩke oko batsũka. 9Neryo abandu abatsũka omũbĩrĩ esaa erĩkũmĩ n'enguma mobalihwa ekĩtsĩpa kiguma. 10Neryo abandu abatsũka erihabwa omũbĩrĩ mobahĩka mobaganĩrya bati bakandĩĩmya bingi kw'aho; nĩkwa obuli mundu mwalihwa kĩtsĩpa kiguma. 11Neryo babere bahambakyo, mobayikuna oko mwenye esyombibi, 12bati, Abandu b'enyũma aba bamakola esaa nguma nyisa, nawe wabiririhabo ngatwe, tũlũe tũsĩbĩre tukanuba omo mũbĩrĩ, n'eryuba likatutera. 13Nĩkwa omwenye eririma mwasũbĩrya omuguma wa kubo ati, Mwĩra wage, sinditakuyira nabi, motutalagana nawe busana n'ekĩtsĩpa kiguma kwehĩ? 14Wĩmaye esyawe, ugende. Nĩkwa nyanzĩre eriha omundu w'enyũma oyũ ngawe. 15Sindi n'ehamũlĩ erikola omo byage ngoko nyanzĩre kwehĩ? Kandi ukatsura kusangwa indi mubuya kwehĩ? 16Litya ow'enyũma asyabya w'erĩmbere, kandi ow'erĩmbere asyabya w'enyũma. 17Neryo omugulu Yesu asonda erihetukira eYerũsalema, mwatwala abiga ĩkũmĩ n'ababiri ĩbobene aho lutambi, neryo omo nzira mwabwirabo ati, 18Lebaya, tukahetukira eYerũsalema, n'Omugala w'Omundu asyahoterwa oko bahererĩ bakulu n'abakangĩrĩrya b'Emigambo, nabo basyamutswera ambu ahole. 19Kandi basyamuhotera oko Bihanda erĩmũsekererya n'erĩmũswĩrya emikoba, n'erimubamba oko musalaba, n'enyũma w'ebiro bisatu asyalũbũkĩbwa. 20Neryo nyĩnya w'abagala ba Zebedayo mwahĩka uku Yesu haguma n'abagala buwe, neryo mwamũnamira, mwamũbũlya omwatsi. 21Neryo Yesu mwamũbũlya ati, Ukasondakĩ kwehĩ? Naye mwamubwira ati, Uhane, uti abagala bage babiri aba, bĩkale muguma oko byala byawe by'amali, n'omuguma oko malembe omo Bwami bwawe. 22Nĩkwa Yesu mwamũsũbĩrya ati, Sĩmwasĩ ebyo mũkabũlaya. Ĩnywe mwangatoka erĩpũlya oko lũtehĩ olo ngandĩpũlyako kwehĩ? Nabo mobamũsũbĩrya bati, Twanganatoka. 23Neryo Yesu mwabwirabo ati, Mwasyapũlya oko lũtehĩ lwage, nĩkwa erĩĩkala oko byala byage by'amali, n'oko malembe, si ryage eribahalyo, nĩkwa ni ry'abo Tata wage abĩrĩkokoteryalyo. 24Nĩkwa omugulu abandi biga ĩkũmĩ mobowa ekĩ, mobahitana uku balĩkyabo abo babiri. 25Nĩkwa Yesu mwabirikira abosĩ bo haguma, mwabwirabo ati, Mũnasĩ kw'abatabalĩ b'abandu bakatabalirabo, n'abakulu babo bakahamulabo. 26Nĩkwa ko bite bitya omo katĩkatĩ kenyũ. Nĩkwa oyo wanzĩre eribya mukulu omo katĩkatĩ kenyũ, asyabya mugombe wenyũ, 27kandi oyo wanzĩre eribya w'erĩmbere omo katĩkatĩ kenyũ asyabya mugombe wenyũ. 28Kusangwa Omugala w'Omundu mwatasa erikolerwa, nĩkwa asa erikola, n'eriha engebe yiwe mo bũgũlĩ busana n'abandu bangi. 29Neryo omugulu babya bakalũa eYerĩko, endeko nene moyakwama Yesu. 30Neryo lebaya, esyondĩmatĩme ĩbĩrĩ babya bĩkere oko mũsĩke w'enzira mobowa ambu Yesu akalabaho, mobabirikira kutsibu bati, Mukama, utuganyire, uwe Mugala wa Dawĩdĩ. 31Neryo endeko mobakungabo n'eribwirabo bati, babye bũkũtũ. Nĩkwa mobabirikira kutsibu bati, Mukama, utuganyire, uwe Mugala wa Dawĩdĩ! 32Neryo Yesu mwahangana mwabirikirabo, ati, Mukasonda inabakolerakĩ kwehĩ? 33Nabo mobamubwira bati, Mukama, twanzĩre ĩwalĩbũla ameso wetu. 34Neryo Yesu mwakwĩrabo bũlĩge, neryo mwatũla oko meso wabo; neryo-neryo mobabana erilangira, mobamukwama.

will be added

X\